約翰福音 19

1後來，彼拉多叫人導耶穌出去用鞭給伊拍。 2許個兵用刺仔編一頂王冠給伊戴佇頭殼頂，閣給伊幔一領紫色的長袍。 3𪜶倚去，對伊講：「猶太人的王萬歲！」然後給伊搧嘴䩃。

4 彼拉多閣出來外面，對許個猶太人講：「恁看，我導伊出來互恁，互恁知我查𣍐出伊有罪。」 5耶穌就出來，戴刺仔的王冠，幔紫色的長袍。彼拉多給𪜶講：「看，此個人！」

6祭司長及聖殿的警衛看著耶穌就大聲喝：「給釘十字架！給釘十字架！」

彼拉多對𪜶講：「恁家己給伊導去釘十字架，因為我查𣍐出伊有罪。」

7許個猶太人應講：「阮有律法，照律法伊應該死，因為伊封家己做上帝的子。」

8 彼拉多聽著𪜶按呢講就愈驚。 9伊閣入去總督府，問耶穌講：「你對叨位來？」

毋拘耶穌無給伊應。 10彼拉多對伊講：「你毋給我講噢？豈毋知我有權通放你，嘛有權給你釘十字架？」

11耶穌應講：「若毋是上帝賜你權柄，你無權通辦我。因為按呢，給我交互你彼個人，伊的罪閣較重。」

12 彼拉多聽著此個話愈想欲放耶穌，毋拘許個猶太人一直喝講：「你若放此個人，你就毋是羅馬皇帝凱撒的朋友。無論什麼人封家己作王就是背叛凱撒。」

13 彼拉多聽著諸個話就導耶穌出來，家己坐佇審判席。彼個所在叫做「鋪石地」，希伯來話叫做加巴大。

14彼日是𨃟過節的前日，時間差不多中晝。彼拉多對許個猶太人講：「看，恁的王！」

15𪜶就喝講：「互死，互死！給釘十字架！」

彼拉多對𪜶講：「恁愛我將恁的王釘十字架噢？」

祭司長講：「凱撒以外，阮無王！」

16後來彼拉多將耶穌交互𪜶去釘十字架。

耶穌受釘十字架

(太 27.32-44；可 15.21-32；路 23.26-43)

𪜶就給耶穌押去。 17耶穌出來，背家己的十字架，來到彼個叫做「頭殼碗嶺」的所在，希伯來話叫做各各他。 18𪜶佇遐給耶穌釘佇十字架；以外有兩個人及伊做夥釘，一旁一個，耶穌佇中央。 19彼拉多寫一塊罪狀，釘佇十字架頂，頂面寫：「拿撒勒人耶穌，猶太人的王。」 20有真多猶太人讀著罪狀，因為耶穌互人釘十字架的所在倚近耶路撒冷，閣罪狀是用希伯來文、拉丁文、希臘文寫的。 21猶太教的祭司長對彼拉多講：「毋通寫『猶太人的王』，著寫『此個人自稱：我是猶太人的王』。」

22 彼拉多應講：「我所寫的已經寫啦，無欲改！」

23許個兵將耶穌釘十字架了後，提伊的外袍分做四份，一人一份。𪜶閣提伊的內衫；此領內衫無敆綴，頂下織做一塊。 24所以，𪜶參詳講：「此領拆開，咱來抽籤看是啥人的。」這是欲應驗聖經的話：

𪜶分我的外袍，

為著我的衫抽籤。

諸個兵抵照按呢做。

25耶穌的老母、伊的阿姨、革羅罷的某馬利亞，及末大拉的馬利亞攏徛佇耶穌的十字架邊。 26耶穌看著伊的老母，閣看著伊所疼彼個門徒徛佇邊仔，就對伊的老母講：「阿母，看，你的子！」

27後來伊對彼個門徒講：「看，你的老母！」對彼時起，彼個門徒給耶穌的老母接轉去𪜶兜。

耶穌的死

(太 27.45-56；可 15.33-41；路 23.44-49)

28此個事以後，耶穌知一切的代誌已經完成，為著欲應驗聖經的話就講：「我嘴焦。」 29佇遐有一個貯滿酸酒的瓶，𪜶就用海綿浸酒，縛佇牛膝草尾，㧣到伊的嘴。 30啖了後，耶穌講：「完成啦！」

講了，頭勾落去，氣就斷。

耶穌的脇下受鑿

31彼日是拜五，是備辦日。因為隔日是特別的安歇日，猶太人的領袖為著無愛佇安歇日留身屍佇十字架頂，就求彼拉多教人摃斷受刑者的腳骨，通將身屍收落來。 32許個兵就去，將及耶穌做夥釘十字架頭一個及另外一個的腳骨摃斷。 33𪜶來到耶穌遐，看著伊已經死，就無給伊的腳骨摃斷。 34毋拘有一個兵用槍鑿耶穌的脇下，隨時有血及水流出來。 35看著的人已經有作證，是欲互恁嘛信；伊的見證是真實，伊知伊所講的是事實。 36諸個代誌發生是欲應驗聖經的話：「伊的骨連一支都𣍐摃斷。」 37閣另外有一句經文講：「𪜶會仰望𪜶用槍給伊鑿的人。」

耶穌的安葬

(太 27.57-61；可 15.42-47；路 23.50-56)

38諸個代誌了後，有一個亞利馬太人約瑟來求彼拉多准伊去收耶穌的遺體。伊因為驚猶太教當局，所以祕密作耶穌的門徒。彼拉多允准，約瑟就去收耶穌的遺體。 39閣以前曾佇暗時去見耶穌彼個尼哥德慕嘛帶約三十公斤的沒藥抄沉香的芳料來。 40𪜶兩人將耶穌的遺體收落來，照猶太人安葬的慣例給伊抹芳料，閣用幼麻布給伊包紮。 41耶穌釘十字架的所在有一坵園，園內有一個猶毋曾葬過人的新墓。 42因為彼日是拜五，是猶太人的備辦日，墓閣無遠，𪜶就給耶穌安葬佇遐。

Currently Selected:

約翰福音 19: TTVH

Highlight

Copy