創世記 42
42
約瑟的兄弟去埃及買米糧
1 雅各聽著埃及有五穀，就給伊許個子講：「恁是按怎猶啲相相。」 2閣講：「我聽著埃及有五穀，恁著落去遐，買一寡糧食，互咱通度活，才免死。」 3約瑟十個兄哥就攏落去埃及買米糧。 4毋拘雅各無互約瑟的小弟便雅憫及𪜶兄哥做夥去，因為伊驚便雅憫抵著傷害。
5 雅各的子及許個來買米糧的人做夥來，因為迦南地嘛有飢荒。 6彼時啲治理埃及地的是約瑟，賣米糧互彼所在的人民的，嘛是伊；約瑟許個兄哥來，仆落拜伊。 7約瑟看著伊的兄哥，會認得𪜶，毋拘假毋識，用嚴轄的口氣問𪜶：「恁對叨位來？」
𪜶應講：「阮對迦南地來欲買米糧。」
8 約瑟會認得伊許個兄哥，毋拘𪜶𣍐認得伊。 9約瑟想起以前夢見關係𪜶的夢，就對𪜶講：「恁是偵探，來探查阮遮無設防的所在。」
10𪜶對約瑟講：「阮的主，毋是按呢，你的僕人是來欲買糧食。 11阮攏仝老父，是老實人；你的僕人毋是偵探。」
12 約瑟給𪜶講：「毋是！恁來是欲探查阮遮無設防的所在。」
13𪜶講：「你的僕人攏總有十二個兄弟，仝老父，住佇迦南地；上細的現在及阮老父做夥；有一個無去啦。」
14 約瑟給𪜶講：「我抵即講恁是偵探，實在無毋著。 15我愛恁證明恁是老實。我指埃及王的性命咒誓，恁煞尾小弟若無導來遮，恁一定𣍐當離開此個所在。 16恁著派一個轉去導恁小弟來，其他的攏關佇遮，按呢證明恁有老實；若無，我指埃及王的性命咒誓，恁確實是偵探。」 17約瑟就將𪜶關佇監裡三日。
18到第三日，約瑟對𪜶講：「我是驚畏上帝的人；恁若照我的話做，就免死。 19恁若真正是老實人，恁兄弟的中間著留一個關佇監裡，其他的人通帶米糧倒去救恁家內枵餓的人。 20恁若將煞尾小弟導來我遮，就通證明恁講話老實，恁嘛免死。」
𪜶就照按呢做。 21𪜶互相講：「咱實在對咱的小弟犯真大的罪；咱看著伊痛苦給咱哀求的時，嘛無插伊，所以咱受報應，抵著即大的災難。」
22 呂便應𪜶講：「我豈無給恁講，毋通傷害彼個少年人，毋拘恁攏毋聽。所以流伊的血的罪，現在啲給咱討。」 23𪜶毋知約瑟聽有𪜶啲講的話，因為佇𪜶的中間有翻譯官啲翻譯。 24約瑟越轉身離開𪜶去哮，後來閣轉來及𪜶講話。約瑟對𪜶中間揀西緬，佇𪜶目睭前給伊縛起來。
約瑟的兄哥轉去迦南地
25 約瑟吩咐人將五穀給𪜶的布袋貯滿滿，將𪜶逐個人的銀還𪜶，下佇𪜶的袋仔內，閣用路中需要的食物互𪜶；許個人就照按呢做。 26約瑟的兄哥將米糧下佇驢仔頂，離開遐倒去。 27到歇暝的所在，𪜶中間有一個解開伊的袋仔，欲提飼料互驢仔食，才看著銀猶佇袋仔內，下佇布袋口。 28伊就給伊的兄弟講：「恁看！我的銀閣倒轉來，猶原佇我的袋仔內。」𪜶就驚甲神不附體，愕愕惙，互相講：「上帝哪按呢對待咱？」
29𪜶倒去迦南地，到𪜶老父雅各遐，將抵著的事攏給伊講： 30「彼所在的主人給阮講真嚴轄的話，給阮當做是偵探。 31阮給伊講：『阮是老實人，毋是偵探。 32阮有十二個兄弟，攏仝老父；有一個無去，上細的小弟現在及阮老父佇迦南地。』 33彼所在的主人給阮講：『恁若欲互我相信恁是老實人，恁著留一個兄弟佇我遮，其他的人通帶米糧倒去，救恁家內枵餓的人； 34恁導煞尾小弟來我遮，我就知恁毋是偵探，是老實人；按呢，我就將恁的兄弟交還恁，恁嘛通佇遮自由行動。』」
35後來，𪜶將𪜶的袋仔倒出來，無拍算，𪜶逐個人的錢袋仔攏佇𪜶的布袋內；𪜶及𪜶老父看著錢袋仔攏驚一趒。 36𪜶的老父雅各給𪜶講：「恁互我失去我的子；約瑟無去，西緬嘛無去，恁閣欲導便雅憫去。諸個代誌哪會攏發生佇我身上！」
37 呂便給伊的老父講：「我若無導便雅憫倒來交互你，你通刣我兩個子。做你將便雅憫交代我，我一定會給伊導倒來互你。」
38 雅各講：「我無欲互我的子及恁去；伊的兄哥已經死，只有賰伊一個。伊若佇路中抵著災害，就是恁害我白頭毛悽慘落陰間。」
Currently Selected:
創世記 42: TTVH
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2021
