創世記 41

約瑟給王解夢

1兩年後，埃及王作夢。伊夢見伊徛佇尼羅河邊， 2看著七隻肥閣媠的牛母對河裡起來，佇蘆竹仔內啲食草。 3隨後，有七隻瘦閣歹看的牛母對河裡起來；及頭前許個牛母做夥徛佇河邊。 4諸個瘦閣歹看的牛母給彼七隻肥閣媠的牛母食了了。埃及王就醒起來。 5伊閣睏，閣眠夢，夢著一欉麥仔出七穗飽水閣好看的麥穗。 6後來，伊閣看著彼欉麥仔出七穗麥穗，冇冇閣互東風吹甲臭焦。 7諸個冇的麥穗給彼七穗飽水閣好看的麥穗吞落去。埃及王醒起來，才知是眠夢。 8到天光，埃及王心內操煩不安，就派人召埃及所有的術士及有智慧的人來。王就將伊的夢給𪜶講；毋拘𪜶無法度給王解夢。

9彼時酒政長對埃及王講：「我今仔日才想著我有失錯。 10較早，王對你的僕人發受氣，將我及廚房長關佇侍衛長府內的監牢。 11阮兩個仝一暝作夢，有無像款的意思。 12有一個希伯來的少年人就是侍衛長的奴隸，及阮關做夥；阮給伊講阮的夢，伊就給阮解夢。 13後來阮兩個人的結果，攏照伊所給阮解說的，王給我復職，廚房長受吊死。」

14 埃及王派人去召約瑟來，𪜶就趕緊帶伊出監。約瑟就剪頭毛修面，換衫，來見埃及王。 15埃及王給約瑟講：「我夢著一個夢，無人會當給我解說。有人給我講，你聽著夢就會解夢。」

16 約瑟應講：「這毋是在佇我，是上帝欲將平安福氣的路指示埃及王。」

17 埃及王給約瑟講：「我夢著我徛佇尼羅河邊， 18有七隻肥閣媠的牛母對河裡起來，佇蘆竹仔內啲食草。 19隨後，有七隻瘦閣歹看的牛母起來；佇埃及地，我猶毋曾看著即呢僫的牛。 20諸個瘦閣歹看的牛母給彼七隻肥的牛母食了了； 21吞落腹了後，彼七隻瘦閣歹看的牛母，看𣍐出有什麼各樣，猶原赫呢瘦閣歹看；我就醒起來。 22我閣夢著一欉麥仔，出七穗飽水閣好看的麥穗。 23後來，彼欉麥仔閣出七穗麥穗，冇冇閣互東風吹甲臭焦。 24諸個冇的麥穗給彼七穗好的麥穗吞落去。我將諸個夢講互術士聽，毋拘𪜶無法度給我解說。」

25 約瑟對埃及王講：「王的夢其實是一個；上帝將伊欲做的事指示王。 26七隻媠的牛母及七穗好的麥穗是指七年；此兩個夢是仝一個意思。 27許個隨後起來的七隻瘦閣歹看的牛母，及七穗冇閣互東風吹臭焦的麥穗，嘛是指七年，代表七年的飢荒。 28這是我對王所講的：上帝將伊欲做的事，對王顯示。 29埃及全地會有七年好年冬； 30後來會有七年歹年冬，甚至埃及全國攏𣍐記得以前的豐收，全地會互飢荒毀壞； 31因為後來的飢荒真傷重，煞𣍐記得以前曾有豐收。 32王兩遍的眠夢，是上帝啲指示伊決定欲做，閣真緊欲完成的事。

33「所以王著揀一個聰明閣有智慧的人，派伊管理埃及全國。 34王閣著派官員管理全國；佇七年好年冬，埃及全地的收成著五份抽一份。 35請王命令𪜶收集好年冬收成的五穀，積聚佇粟倉，派人管理，通做逐個城的糧食。 36積聚起來的糧食，通做埃及全地將來七年飢荒的路用，才免此個國家因為飢荒滅亡。」

約瑟奉命治理埃及

37 埃及王及伊所有的人臣攏贊成此個計劃。 38埃及王對伊的人臣講：「咱豈會當尋著一個人，親像此個人有上帝的神佇伊的內面？」 39埃及王對約瑟講：「上帝已經將此個代誌攏指示你，可見無人親像你即呢聰明有智慧。 40你通管理我的朝廷；我的人民攏著服從你，互你管理；只有坐佇王位的我比你較大。」 41埃及王閣給約瑟講：「我派你管理埃及全地。」 42埃及王就將伊做印鑑的手指剝起來，掛佇約瑟的指頭仔；給伊穿幼麻布的衫，將金袚鍊掛佇伊的頷頸。 43王閣互約瑟坐朝廷的第二號車；開道的叫講：「閃開！」按呢，埃及王派約瑟管理埃及全地。 44埃及王對約瑟講：「我是王，若無你允准，佇埃及全地，不准人隨便辦代誌。」 45埃及王給約瑟號名叫做撒發那特‧巴內亞，閣將希利坡里城的祭司波提‧非拉的查某子亞西納互伊作某。約瑟就佇埃及地出巡。

46 約瑟開始服事埃及王的時三十歲。伊離開埃及王，去埃及全地巡視。 47七個好年冬，地的出產大豐收。 48約瑟收集埃及地七個好年冬所有的五穀，積聚佇逐個城；逐個城周圍田地的糧食，攏積聚佇附近的城內。 49約瑟積聚五穀，多甲親像海邊的沙，無法度算，因為算𣍐了。

50歹年冬猶未到以前，希利坡里城的祭司波提‧非拉的查某子亞西納給約瑟生兩個子。 51約瑟給大子號名叫做瑪拿西；伊講：「上帝互我𣍐記得我所有的困苦，及思念我的老父全家的苦情。」 52伊給第二個子號名叫做以法蓮；伊講：「上帝互我佇我受苦的所在興旺。」

53 埃及地七年好年冬一下過去， 54七年飢荒就來，抵抵照約瑟所講的；逐國攏有飢荒，干焦埃及全地有米糧。 55到埃及全地糧食無夠的時，人民來對王哀求米糧；王對埃及的人民講：「恁去尋約瑟，伊給恁講什麼，恁攏照按呢去做。」 56彼時逐國攏有飢荒，埃及地嘛真傷重；約瑟開逐所在的粟倉，賣米糧互埃及人。 57逐國飢荒真嚴重，逐所在的人攏去埃及，去約瑟遐買米糧。

Currently Selected:

創世記 41: TTVH

Highlight

Copy