使徒行傳 19

保羅佇以弗所

1 亞波羅佇哥林多的時，保羅經過內陸的地區，來到以弗所，佇遐有抵著幾若個門徒。 2伊問𪜶：「恁信主的時有領受聖神無？」

𪜶應講：「無，阮到今毋曾聽著講有聖神。」

3 保羅閣問講：「按呢，恁領受的是什麼洗禮？」

𪜶應講：「是約翰的洗禮。」

4 保羅講：「約翰的洗禮是悔改的洗禮；伊叫以色列人著信隨佇伊後面來彼位，就是著信耶穌。」

5𪜶聽了就奉主耶穌的名領受洗禮。 6保羅一下給𪜶按手，聖神就降臨佇𪜶身上，𪜶就用靈語講話，閣宣講上帝的信息。 7𪜶攏總有十二個人。

8 保羅連續三月日久入去會堂好膽傳道，及人辯論上帝國的事，苦勸𪜶信主。 9不過有一寡人固執毋信，佇會眾面前誹謗主的道路。保羅就導門徒離開𪜶，逐日佇推喇奴的講堂及人談論。 10按呢繼續兩年久，所有住佇亞細亞省的人，無論猶太人抑是希臘人，攏有聽見主的信息。

士基瓦的子

11上帝用保羅的手行奇異的神跡； 12甚至有人提保羅用過的手巾抑是圍裙囥佇病人身上，𪜶的病就好去，邪神就對𪜶出去。 13彼時有幾若個行江湖啲趕鬼的猶太人，嘛想欲借主耶穌的名制壓邪神附身的人，講：「我奉保羅所傳耶穌的名命令恁出去！」 14猶太的祭司長士基瓦的七個子嘛啲做此款代誌。

15毋拘邪神應講：「耶穌我識，保羅我嘛識，恁咧，恁是什麼人？」

16彼個互邪神附身的人扼倚去攻擊許個行江湖的，給𪜶制伏，互𪜶受傷，赤身露體對彼間厝逃走。 17住佇以弗所所有的猶太人及希臘人聽著此項代誌攏真著驚；主耶穌的名大受尊崇。 18有真多已經信的人出來，公開承認閣報人知𪜶過去所做的代誌。 19有真多行邪術的人提𪜶的冊來，囥歸堆，佇眾人的面前放火燒。𪜶計算冊的價值，大約有五萬個銀元。 20對按呢，主的信息一直傳開，大大興旺。

佇以弗所的暴動

21諸個代誌了後，保羅受聖神感動，決定欲經過馬其頓及亞該亞去耶路撒冷。伊講：「我到遐以後嘛一定著去訪問羅馬。」 22伊就差兩個助手提摩太及以拉都去馬其頓，家己暫時留佇亞細亞。

23抵彼時，關係主的道路佇以弗所引起嚴重的擾亂。 24有一個叫做底米特的拍金師傅，伊用銀造女神亞底米的廟的模型，互一寡師傅賺𣍐少錢。 25底米特給許個師傅及所有的同業集倚來，對𪜶講：「各位，恁知咱是靠此個工藝啲賺錢。 26現在恁有看著閣有聽著此個保羅啲做的代誌。伊講：『人的手所造的攏毋是神。』諸個話毋若佇以弗所，嘛差不多佇全亞細亞省，有互真多人受教唆去隨𪜶。 27按呢，毋若咱此個事業會拍歹名聲，連偉大的女神亞底米的廟都會互人輕視，全亞細亞省及全世界所啲拜此個女神的尊嚴嘛會受破壞！」

28群眾一下聽著諸個話非常受氣，大聲喝：「以弗所人的亞底米真偉大！」 29全城攏亂起來；眾人拖保羅的同伴馬其頓人該猶及亞里達古，歸陣做一下衝入去劇場。 30保羅想欲入去群眾內面，毋拘門徒給伊阻止。 31有幾若個亞細亞省的官員，是保羅的朋友，嘛差人去勸保羅毋通入去劇場。 32彼時歸個會場亂操操，一人喝一項；大部分的人毋知𪜶是按怎啲聚集。 33群眾中間有人將擾亂的責任歸互亞歷山大，因為猶太人給伊拺出去頭前。亞歷山大就比手勢叫𪜶安靜，想欲給𪜶辯明。 34𪜶一下認出伊是猶太人，就攏齊聲喝：「以弗所人的亞底米真偉大！」按呢直直喝，喝兩點鐘久。

35彼個城的書記官互群眾攏安靜了後，講：「以弗所人，啥人毋知以弗所城是偉大的亞底米廟及對天落落來彼塊聖石的守護者？ 36既然無人會當否認此個代誌，恁應該安靜，毋通衝動。 37恁拖諸個人來遮，毋拘𪜶並無搶寺廟，嘛無褻瀆咱的女神。 38底米特及伊的師傅若欲控告，有開庭的日子及主持訴訟的官長，𪜶通提出告訴。 39恁若有其他的要求，通佇定期的會議解決。 40今仔日所發生的代誌，咱驚了會互人追究責任，閣對此款的混亂，咱嘛提𣍐出理由通辯解。」 41講諸個話了後，伊就宣布散會。

Currently Selected:

使徒行傳 19: TTVH

Highlight

Copy