使徒行傳 18

保羅佇哥林多

1此個事以後，保羅離開雅典去哥林多。 2伊佇遐抵著一個佇本都出世的猶太人，名叫亞居拉，最近才及伊的某百基拉對意大利來，因為皇帝克勞第有命令所有的猶太人攏離開羅馬。保羅去尋𪜶， 3因為仝行業，攏是啲做布棚，就及𪜶住，做夥做工。 4逐個安歇日，保羅攏佇會堂及人辯論，苦勸猶太人及希臘人信主。

5 西拉及提摩太對馬其頓來了後，保羅就全心傳道，對猶太人見證耶穌是基督。 6𪜶給伊反對閣誹謗的時，保羅給衫裡的土粉拌㧒确，對𪜶講：「恁家己欲討死，無我的代誌！對今以後我欲去外邦人遐。」 7然後保羅離開𪜶，去住佇一個敬畏上帝的外邦人叫做提多‧猶士都的厝；伊的厝佇會堂的隔壁。 8會堂的主管基利司布及伊的全家攏信主；閣有真多哥林多人聽了來信，嘛受洗禮。

9有一暗，佇異象中主對保羅講：「毋免驚，著繼續講，毋通恬去， 10因為我及你同在，無人會下手給你傷害；我有真多子民佇此個城內。」 11保羅佇遐住一年半久，將上帝的道教示𪜶。

12 迦流作亞該亞總督的時，猶太人聯合攻擊保羅，給伊掠去法庭， 13告伊講：「此個人煽動人用違背律法的方式敬拜上帝！」

14 保羅抵欲開嘴，迦流對猶太人講：「猶太人，這若是犯法的行為抑是惡質的犯罪，我當然著耐心聽恁的控訴。 15所爭論的既然是關係恁律法的字眼及名稱，恁家己去解決；我毋辦此款代誌！」 16伊給𪜶趕出法庭。 17眾人就掠會堂的主管所提尼，佇法庭前給伊拍。此項代誌迦流攏無插。

保羅倒去安提阿

18 保羅佇哥林多及信徒閣住真多日了後離開𪜶，及百基拉以及亞居拉做夥坐船去敘利亞。出發前，保羅因為有下願，佇堅革哩剪頭毛。 19𪜶到以弗所，保羅及𪜶分開，家己入去會堂及猶太人辯論。 20大家請伊留落來加住幾日仔，伊無答應。 21欲離開的時，伊給𪜶講「若是上帝的旨意，我會閣轉來恁遮」，然後坐船離開以弗所。

22伊佇凱撒利亞落船，對遐上去耶路撒冷，給教會請安，然後落去安提阿。 23保羅佇遐住一段時間了後閣出發，經過加拉太及弗呂家地區，堅固眾門徒的信心。

亞波羅佇以弗所講道

24有一個佇亞歷山大出世的猶太人，叫做亞波羅，來到以弗所；伊有真好的口才，對聖經嘛精通。 25伊對主的道路有受過訓練，熱心宣講，正確教示耶穌的事，不過只有知約翰的洗禮若定。 26伊佇會堂好膽開始講道。百基拉及亞居拉聽著伊的講道就導伊去𪜶兜，閣較正確給伊解說上帝的道路。 27後來亞波羅決定欲去亞該亞，以弗所的信徒就給伊鼓勵，寫批互亞該亞的門徒，請𪜶給伊接待。伊到遐以後，許個對上帝的恩惠來信主的人受著真大的幫贊， 28因為佇公開的辯論，伊用有力的話辯倒猶太人，根據聖經證明耶穌是基督。

Currently Selected:

使徒行傳 18: TTVH

Highlight

Copy