Lō͘-ka Hok-im 3

Si-sóe-chiá Iok-hān ê Sóe-lé kap Thoân-tō

(Thài 3.1-12; Khó 1.1-8; Iok 1.19-28)

1 Lô-má hông-tè Thê-pì-liû thóng-tī tē-cha̍p-gō͘ nî, Pâng-siu Pí-lia̍p-to choh Iû-thài chóng-tok, Hi-lu̍t choh Ka-lī-lī hun-hong ê ông, i ê sió-tī Hui-le̍k choh Í-thó͘-lī-a kap Te̍k-lia̍p-khó-nî tōe-hng hun-hong ê ông, Lū-sat-liap choh A-pí-lī-nî hun-hong ê ông, 2A-ná kap Kai-a-hoat choh tōa-chè-si ê sî, Siōng-tè ê ōe lîm-kàu Sat-ka-lī-a ê kiáⁿ Iok-hān, hit-sî i tī khòng-iá. 3Iok-hān chiū khì Iok-tàn-hô it-tài ta̍k só͘-chāi soan-iông kóng, “Tio̍h hóe-kái, niá-siū sóe-lé, Siōng-tè chiū sià-bián lín ê chōe!” 4Chiàu sian-ti Í-sài-a ê chheh kì-chài:

Ū siaⁿ tī khòng-iá teh hoah:

Tio̍h ūi Chú chún-pī tō-lō͘,

ūi-tio̍h I siu-ti̍t sió-lō͘.

5It-chhè ê soaⁿ-kok tio̍h thūn hō͘ tīⁿ;

só͘-ū tōa-soaⁿ sió-soaⁿ tio̍h siah hō͘ kē;

oan-khiau ê lō͘ tio̍h kái hō͘ ti̍t;

khâm-khia̍t ê lō͘ tio̍h siu hō͘ pîⁿ!

6Bān-bîn lóng ōe khòaⁿ-kìⁿ Siōng-tè ê chín-kiù.

7 Iok-hān kā lâi beh niá-siū sóe-lé hiah-ê kûn-chiòng kóng, “Lín chiah-ê to̍k-chôa, sím-mi̍h-lâng kéng-kò lín siám-pī Siōng-tè teh-beh hoat ê siū-khì? 8Tio̍h ēng hêng-ûi chèng-bêng lín ū hóe-kái! Lín m̄-thang ka-kī siūⁿ-kóng ‘A-pek-la-hán sī goán ê chó͘-sian’, góa kā lín kóng, Siōng-tè ōe-tàng ēng chiah-ê chio̍h-thâu chō kiáⁿ-sun hō͘ A-pek-la-hán. 9Pó͘-thâu í-keng khòa tī chhiū-thâu; só͘-ū bô kiat hó ké-chí ê chhiū lóng beh kā chhò--khí-lâi, hiat-lo̍h hé.”

10Chèng-lâng mn̄g Iok-hān, “Án-ni, goán tio̍h chòe sím-mi̍h?”

11I ìn kóng, “Ū nn̄g niá saⁿ--ê, tio̍h pun hō͘ bô--ê; ū chia̍h-mi̍h--ê, mā tio̍h án-ni chòe.”

12Ū chi̍t-kóa ba̍uh-sè--ê mā lâi beh niá-siū sóe-lé. In mn̄g Iok-hān, “Lāu-su, goán tio̍h chòe sím-mi̍h?”

13I kā in kóng, “Kui-tēng ê sè-kim í-gōa m̄-thang ke siu.”

14Ū chi̍t-kóa kun-jîn mā mn̄g i, “Goán tio̍h chòe sím-mi̍h?”

I kā in kóng, “M̄-thang kā lâng khióng-hat the̍h-chîⁿ; mā m̄-thang kā lâng khà-iû; só͘ niá ê sin-súi tio̍h boán-chiok.”

15Bîn-chiòng teh kî-thāi, tāi-ke sim-lāi siūⁿ-kóng Iok-hān kiám-chhái sī Ki-tok ê sî, 16Iok-hān tùi tāi-ke kóng, “Góa ēng chúi kā lín sóe-lé; m̄-kú ū chi̍t ūi pí góa khah ū koân-lêng--ê teh-beh lâi, góa liân kā I tháu ôe-tòa to bōe-kham--tit. I beh ēng Sèng Sîn kap hé kā lín sóe-lé. 17I ê chhiú the̍h pòa-ki#3.17 “Pòa-ki” sī chi̍t chióng lông-khū, ēng lâi hun-khui be̍h-á kap be̍h-hiūⁿ. beh chiong be̍h-tiâⁿ ê be̍h pòa chheng-khì, be̍h-á siu-ji̍p chhng-khò͘, be̍h-hiūⁿ#3.17 “Be̍h-hiūⁿ” sī be̍h-kó khah iù ê pō͘-hūn. Be̍h-kó sī be̍h-á siak liáu ê be̍h-châng. chiū ēng bōe hoa ê hé kā i sio-tiāu.”

18 Iok-hān tùi bîn-chiòng thoân hok-im, ēng chin chōe bô kâng-khoán ê kóng-hoat kā in khoàn-bián. 19Put-kò Iok-hān chek-pī hun-hong ê ông Hi-lu̍t, in-ūi i ū chhōa tē-hū Hi-lô-tí chòe bó͘, koh in-ūi i ū chòe chin chōe pháiⁿ tāi-chì. 20Chiah-ê í-gōa, i ū chòe chi̍t hāng koh-khah pháiⁿ ê tāi-chì, chiū-sī kā Iok-hān koaiⁿ-lo̍h kaⁿ.

Iâ-so͘ Niá-siū Sóe-lé

(Thài 3.13-17; Khó 1.9-11)

21Bîn-chiòng lóng niá-siū sóe-lé liáu-āu, Iâ-so͘ mā lâi niá-siū sóe-lé. I teh kî-tó ê sî, thiⁿ khui, 22Sèng Sîn kàng-lo̍h tī I téng-bīn, hêng-chōng chhin-chhiūⁿ hún-chiáu; koh tùi thiⁿ ū siaⁿ kóng:

Lí sī góa só͘ thiàⁿ ê Kiáⁿ,

lí, góa chin ì-ài.

Iâ-so͘ ê Ka-phó͘

(Thài 1.1-17)

23Iâ-so͘ khai-sí thoân-tō ê sî, iok saⁿ-cha̍p hè. Chèng-lâng khòaⁿ I chòe Iok-sek ê kiáⁿ, Iok-sek sī Hi-lí ê kiáⁿ, 24Hi-lí sī Má-thah ê kiáⁿ, Má-thah sī Lī-bī ê kiáⁿ, Lī-bī sī Be̍k-ki ê kiáⁿ, Be̍k-ki sī Ngá-ná ê kiáⁿ, Ngá-ná sī Iok-sek ê kiáⁿ, 25Iok-sek sī Má-tha-thê-a ê kiáⁿ, Má-tha-thê-a sī A-mô͘-su ê kiáⁿ, A-mô͘-su sī Ná-hông ê kiáⁿ, Ná-hông sī Í-su-lī ê kiáⁿ, Í-su-lī sī Ná-kai ê kiáⁿ, 26Ná-kai sī Má-ap ê kiáⁿ, Má-ap sī Má-tha-thê-a ê kiáⁿ, Má-tha-thê-a sī Se-bí ê kiáⁿ, Se-bí sī Iok-sek-khek ê kiáⁿ, Iok-sek-khek sī Iok-tāi ê kiáⁿ, 27Iok-tāi sī Iok-a-ná ê kiáⁿ, Iok-a-ná sī Lī-sat ê kiáⁿ, Lī-sat sī Só͘-lô-pa-pek ê kiáⁿ, Só͘-lô-pa-pek sī Sat-lia̍p-thiat ê kiáⁿ, Sat-lia̍p-thiat sī Nî-lī ê kiáⁿ, 28Nî-lī sī Be̍k-ki ê kiáⁿ, Be̍k-ki sī A-tí ê kiáⁿ, A-tí sī Ko-song ê kiáⁿ, Ko-song sī Í-mô͘-tong ê kiáⁿ, Í-mô͘-tong sī Ní ê kiáⁿ, 29Ní sī Iok-sè ê kiáⁿ, Iok-sè sī Í-lī-í-siā ê kiáⁿ, Í-lī-í-siā sī Iok-lēng ê kiáⁿ, Iok-lēng sī Má-thah ê kiáⁿ, Má-thah sī Lī-bī ê kiáⁿ, 30Lī-bī sī Se-biān ê kiáⁿ, Se-biān sī Iû-tāi ê kiáⁿ, Iû-tāi sī Iok-sek ê kiáⁿ, Iok-sek sī Iok-lâm ê kiáⁿ, Iok-lâm sī Í-lī-a-kèng ê kiáⁿ, 31Í-lī-a-kèng sī Bí-lī-a ê kiáⁿ, Bí-lī-a sī Mái-lâm ê kiáⁿ, Mái-lâm sī Má-ta̍t-tha ê kiáⁿ, Má-ta̍t-tha sī Ná-tan ê kiáⁿ, Ná-tan sī Tāi-pi̍t ê kiáⁿ, 32Tāi-pi̍t sī Iâ-se ê kiáⁿ, Iâ-se sī Gô-pī-tek ê kiáⁿ, Gô-pī-tek sī Pho-a-su ê kiáⁿ, Pho-a-su sī Sat-bûn#3.32 “Sat-bûn”: Ū ê chhau-pún sī “Sa-la”. ê kiáⁿ, Sat-bûn sī Ná-sūn ê kiáⁿ, 33Ná-sūn sī A-bí-ná-ta̍t ê kiáⁿ, A-bí-ná-ta̍t sī A-bîn ê kiáⁿ, A-bîn sī A-nî ê kiáⁿ, A-nî sī Hi-su-lûn ê kiáⁿ, Hi-su-lûn sī Hoat-le̍k-su ê kiáⁿ, Hoat-le̍k-su sī Iû-tāi ê kiáⁿ, 34Iû-tāi sī Ngá-kok ê kiáⁿ, Ngá-kok sī Í-sat ê kiáⁿ, Í-sat sī A-pek-la-hán ê kiáⁿ, A-pek-la-hán sī Tha-la ê kiáⁿ, Tha-la sī Ná-ho̍k ê kiáⁿ, 35Ná-ho̍k sī Se-lo̍k ê kiáⁿ, Se-lo̍k sī La-gô͘ ê kiáⁿ, La-gô͘ sī Hoat-le̍k ê kiáⁿ, Hoat-le̍k sī Hi-pek ê kiáⁿ, Hi-pek sī Sa-la ê kiáⁿ, 36Sa-la sī Kai-lâm ê kiáⁿ, Kai-lâm sī A-hoat-sat ê kiáⁿ, A-hoat-sat sī Siám ê kiáⁿ, Siám sī Ná-a ê kiáⁿ, Ná-a sī La-be̍k ê kiáⁿ, 37La-be̍k sī Má-thó͘-sat-la ê kiáⁿ, Má-thó͘-sat-la sī Í-lo̍k ê kiáⁿ, Í-lo̍k sī Ngá-lia̍t ê kiáⁿ, Ngá-lia̍t sī Má-le̍k-lia̍t ê kiáⁿ, Má-le̍k-lia̍t sī Kai-lâm ê kiáⁿ, 38Kai-lâm sī Í-ná-sū ê kiáⁿ, Í-ná-sū sī Sài-te̍k ê kiáⁿ, Sài-te̍k sī A-tong ê kiáⁿ, A-tong sī Siōng-tè ê kiáⁿ.

Currently Selected:

Lō͘-ka Hok-im 3: TTVR

Highlight

Copy