Lō͘-ka Hok-im 2

Iâ-so͘ ê Chhut-sì

(Thài 1.18-25)

1Hit-sî, Lô-má hông-tè Ò-kó͘-su-to͘ pan-pò͘ bēng-lēng, kiò choân-kok ê jîn-bîn lóng teng-kì hō͘-kháu. 2Chit-ê thâu chi̍t piàn ê hō͘-kháu-phó͘-cha sī Ku-lí-liú chòe Sū-lī-a chóng-tok ê sî si̍t-si--ê. 3Chèng-lâng lóng tńg-khì ka-kī ê kò͘-hiong teng-kì hō͘-kháu.

4 Iok-sek mā tùi Ka-lī-lī ê Ná-sat-le̍k khì Iû-thài ê Pek-lī-hêng, chiū-sī Tāi-pi̍t chhut-sì ê siâⁿ, in-ūi i sio̍k Tāi-pi̍t ê ke, sī Tāi-pi̍t ê sè-hē. 5Iok-sek kap i ê bī-hun-chhe Má-lī-a chòe-hé khì teng-kì. Hit-sî, Má-lī-a í-keng hoâi-īn. 6In tī hia ê sî, Má-lī-a seng-sán ê sî kàu, 7chiū siⁿ thâu-chiūⁿ-kiáⁿ; i ēng pò͘ kā I pau, hō͘ I khùn tī chô--ni̍h, in-ūi kheh-koán bô só͘-chāi thang hō͘ in tòa.

Bo̍k-chiá kap Thiⁿ-sài

8Hit tōe-khu ū chi̍t-kóa kò͘-iûⁿ ê lâng tī iá-gōa, mî--sî lûn-liû teh kò͘ in ê iûⁿ-kûn. 9Chú ê chi̍t ê thiⁿ-sài tùi in chhut-hiān; Chú ê êng-kng sì-bīn kā in chiò, in chiū hui-siông kiaⁿ-hiâⁿ. 10Thiⁿ-sài kā in kóng, “M̄-bián kiaⁿ! Góa kā lín pò chi̍t ê beh hō͘ bān-bîn tōa hoaⁿ-hí ê hó siau-sit. 11Kin-á-ji̍t, tī Tāi-pi̍t-siâⁿ ū chi̍t ūi Kiù-chú ūi-tio̍h lín chhut-sì, chiū-sī Chú Ki-tok. 12Lín ōe khòaⁿ-tio̍h chi̍t ê eⁿ-á ēng pò͘ pau--teh tó tī chô--ni̍h; che hō͘ lín chòe kì-hō.”

13Hut-jiân, ū chi̍t tōa-tīn thian-kun kap hit-ê thiⁿ-sài chòe-hé siōng-chàn Siōng-tè kóng:

14Goān êng-kng kui tī chì-koân ê Siōng-tè;

goān I sù hô-pêng hō͘ tōe-chiūⁿ I só͘ ì-ài ê lâng.

15Chiah-ê thiⁿ-sài lī-khui in chiūⁿ-thiⁿ ê sî, kò͘-iûⁿ--ê lóng kóng, “Lán lâi-khì Pek-lī-hêng, khòaⁿ Chú pò lán chai chit-ê só͘ hoat-seng ê tāi-chì.”

16In chiū kóaⁿ-kín khì, chhē-tio̍h Má-lī-a kap Iok-sek, í-ki̍p tó tī chô--ni̍h ê eⁿ-á. 17In khòaⁿ-liáu, chiū chiong thiⁿ-sài tùi in kóng chit-ê eⁿ-á ê tāi-chì pò lâng chai. 18Thiaⁿ-tio̍h kò͘-iûⁿ--ê só͘ kóng chiah-ê ōe ê lâng lóng kám-kak chin kî-koài. 19Put-kò Má-lī-a chiong chiah-ê tāi-chì lóng khǹg tī sim-lāi, put-sî teh siūⁿ.

20Kò͘-iûⁿ--ê tńg--khì, in-ūi só͘ thiaⁿ--kìⁿ só͘ khòaⁿ--tio̍h it-chhè ê tāi-chì lóng kap thiⁿ-sài tùi in kóng--ê oân-choân kâng-khoán, chiū chiong êng-kng chheng-chàn kui hō͘ Siōng-tè.

Kā Iâ-so͘ Hō-miâ

21Eⁿ-á chhut-sì tē-poeh ji̍t, kā I kat-lé ê ji̍t kàu, in chiū kā I hō-miâ kiò-chòe Iâ-so͘; chit-ê miâ sī Má-lī-a iáu-bē hoâi-īn ê sî thiⁿ-sài kā I hō--ê.

Chiong Iâ-so͘ Hiàn Hō͘ Chú

22Chiàu Mô͘-se ê Lu̍t-hoat, kiat-chēng-lé ê ji̍t kè-liáu, Iok-sek kap Má-lī-a phō eⁿ-á khì Iâ-lō͘-sat-léng beh chiong I hiàn hō͘ Chú. 23Chiàu Chú ê Lu̍t-hoat kì-chài, “Thâu-chi̍t-the ê ta-po͘-kiáⁿ lóng tio̍h sèng-pia̍t kui hō͘ Chú.” 24Koh chiàu Chú ê Lu̍t-hoat kui-tēng tio̍h hiàn chi̍t tùi pan-kah, á-sī nn̄g chiah hún-chiáu-á-kiáⁿ chòe seng-lé.

25Hit-sî, tī Iâ-lō͘-sat-léng ū chi̍t ê lâng miâ kiò-chòe Se-biān. Chit-ê lâng gī koh kèng-khiân, it-ti̍t teh kî-thāi Í-sek-lia̍t ê ho̍k-heng. Sèng Sîn ū kap i tông-chāi. 26I tit-tio̍h Sèng Sîn ê khé-sī, chai-iáⁿ i sí í-chêng it-tēng ōe khòaⁿ-tio̍h Chú só͘ èng-ún ê Ki-tok. 27I hō͘ Sèng Sîn kám-tōng ji̍p-khì Sèng-tiān. Tú hit-sî, Iâ-so͘ ê pē-bú phō eⁿ-á Iâ-so͘ ji̍p--lâi, beh chiàu Lu̍t-hoat ê koàn-lē kā I kú-hêng gî-sek. 28Se-biān ēng siang-chhiú phō eⁿ-á, chheng-chàn Siōng-tè kóng:

29Chú ah, taⁿ chiàu lí ê ōe,

hō͘ lí ê po̍k-jîn pêng-pêng-an-an lī-khui sè-kan;

30in-ūi góa í-keng ū chhin-ba̍k khòaⁿ-tio̍h lí ê chín-kiù,

31chiū-sī lí ūi bān-bîn só͘ chún-pī--ê.

32I chòe khé-sī Gōa-pang-lâng ê kng,

chòe lí ê chú-bîn Í-sek-lia̍t ê êng-kng.

33Iâ-so͘ ê pē-bú thiaⁿ-tio̍h Se-biān kóng-khí koan-hē eⁿ-á ê sū, chin tio̍h-kiaⁿ. 34Se-biān kā in chiok-hok, koh tùi eⁿ-á ê lāu-bú Má-lī-a kóng, “Chit-ê eⁿ-á siū soán-li̍p sī beh hō͘ Í-sek-lia̍t tiong chin chōe lâng poa̍h-tó, chin chōe lâng peh--khí-lâi, koh chiâⁿ-chòe siū kong-kek ê kì-hō, 35hō͘ chin chōe lâng sim-lāi ê ì-liām lō͘-hiān; lí pún-sin ê sim mā ōe hō͘ lāi-kiàm chha̍k thàng--kè.”

36Koh ū chi̍t ê lú sian-ti An-ná, sī A-siat chi-cho̍k ê Hoat-lōe-le̍k ê cha-bó͘-kiáⁿ. I í-keng chin lāu. I kiat-hun liáu kap tiōng-hu seng-oa̍h chhit nî, 37hiān-chāi í-keng poeh-cha̍p-sì hè.#2.37 “hiān-chāi í-keng poeh-cha̍p-sì hè” mā thang e̍k-chòe “hiān-chāi í-keng chiú-kóaⁿ poeh-cha̍p-sì nî”. I lóng bô lī-khui Sèng-tiān, mî-ji̍t ho̍k-sāi Siōng-tè, kìm-chia̍h kî-tó. 38Tú hit-sî, i mā lâi kám-siā Siōng-tè, tùi só͘-ū teh kî-thāi Siōng-tè kiù-sio̍k Iâ-lō͘-sat-léng ê lâng kóng-khí chit-ê eⁿ-á ê sū.

Tńg-khì Ná-sat-le̍k

39 Iok-sek kap Má-lī-a chiàu Chú ê Lu̍t-hoat oân-sêng it-chhè ê kui-tēng chiū tńg-khì Ka-lī-lī, kàu in ê kò͘-hiong Ná-sat-le̍k. 40Chit-ê gín-á chiām-chiām tōa-hàn, ji̍t-ji̍t ióng-chòng, chhiong-móa tì-hūi; Siōng-tè ê un-hūi kap I tông-chāi.

Gín-á Iâ-so͘ tī Sèng-tiān

41Iâ-so͘ ê pē-bú ta̍k-nî lóng ū khì Iâ-lō͘-sat-léng siú Pôaⁿ-kè-choeh. 42Iâ-so͘ cha̍p-jī hè ê sî, in mā chiàu koàn-lē chiūⁿ--khì. 43Choeh-kî soah, in chhut-hoat beh tńg--khì, gín-á Iâ-so͘ lâu tī Iâ-lō͘-sat-léng. I ê pē-bú lóng m̄ chai, 44siūⁿ-chòe I sī tī chòe-hé kiâⁿ hit-tīn lâng ê tiong-kan. In kiâⁿ chi̍t ji̍t ê lō͘-thêng liáu-āu, chiah khai-sí tī chhin-cho̍k kap se̍k-sāi-lâng ê tiong-kan teh chhē. 45In chhē bô, chiū tò-tńg-khì Iâ-lō͘-sat-léng chhē, 46saⁿ ji̍t āu chiah tī Sèng-tiān khòaⁿ-tio̍h I chē tī kàu-su ê tiong-kan, iā teh thiaⁿ iā teh mn̄g. 47Só͘-ū thiaⁿ-tio̍h I kóng-ōe ê lâng lóng in-ūi I chhong-bêng ê ìn-tap kám-kak tio̍h-kiaⁿ kî-koài. 48I ê pē-bú khòaⁿ-tio̍h I, hui-siông tio̍h-kiaⁿ. I ê lāu-bú tùi I kóng, “Kiáⁿ ah, lí ná thang án-ni tùi-thāi goán? Lí khòaⁿ, lí ê lāu-pē kap góa chin hoân-ló, it-ti̍t teh chhē lí!”

49Iâ-so͘ ìn kóng, “Lín ná tio̍h chhē góa? Kiám m̄ chai góa it-tēng tio̍h tī góa ê Pē ê chhù#2.49 “tī góa ê Pē ê chhù” mā thang e̍k-chòe “ēng góa ê Pē ê sū chòe iàu-kín”.?” 50Put-kò in bōe liáu-kái I tùi in kóng ê ōe.

51Āu-lâi Iâ-so͘ kap in chòe-hé tńg-khì Ná-sat-le̍k, sū-sū sūn-thàn in. I ê lāu-bú chiong chiah-ê tāi-chì lóng khǹg tī sim-lāi. 52Iâ-so͘ ê tì-hūi kap nî-hè ná ke-thiⁿ; Siōng-tè kap lâng mā ná thiàⁿ I.

Currently Selected:

Lō͘-ka Hok-im 2: TTVR

Highlight

Copy