Lō͘-ka Hok-im 21

Kóaⁿ-hū ê Hōng-hiàn

(Khó 12.41-44)

1Iâ-so͘ gia̍h-thâu khòaⁿ-tio̍h hó-gia̍h-lâng chiong in ê hiàn-kim hiàn lo̍h-khì hōng-hiàn-kūi. 2I koh khòaⁿ-tio̍h chi̍t ê sàn-chhiah ê kóaⁿ-hū hiàn nn̄g ê tâng-chîⁿ-á lo̍h--khì. 3Iâ-so͘ kóng, “Góa si̍t-chāi kā lín kóng, chit-ê sàn-chhiah ê kóaⁿ-hū hiàn--ji̍p-khì--ê pí chèng-lâng hiàn--ê koh-khah chōe. 4In-ūi in lóng sī hiàn in ēng chhun--ê, m̄-kú chit-ê kóaⁿ-hū sui-jiân chin sàn-chhiah, iáu-kú the̍h só͘-ū ê seng-oa̍h-hùi lóng hiàn--lo̍h-khì.”

Iâ-so͘ Ū-giân Sèng-tiān Siū Húi-hoāi

(Thài 24.1-2; Khó 13.1-2)

5Ū lâng teh tâm-lūn Sèng-tiān sī ēng hó chio̍h kap hōng-hiàn ê mi̍h lâi chong-sek--ê. Iâ-so͘ kóng, 6“Ji̍t-chí teh-beh kàu, lín teh khòaⁿ ê chiah-ê it-chhè lóng ōe siū thiah-húi, thiah kah bô nn̄g tè chio̍h sio-tha̍h.”

Chai-lān kap Pek-hāi

(Thài 24.3-14; Khó 13.3-13)

7Bûn-tô͘ mn̄g Iâ-so͘, “Lāu-su, chit-ê tāi-chì sím-mi̍h sî ōe hoat-seng? Chit-ê tāi-chì beh hoat-seng ê sî ū sím-mi̍h tiāu-thâu?”

8Iâ-so͘ kóng, “Tio̍h kín-sīn, m̄-thang siū bê-he̍k. In-ūi ū chin chōe lâng ōe lī-iōng góa ê miâ lâi, kóng ‘Góa chiū-sī Ki-tok’, koh kóng ‘Sî-ki teh-beh kàu lah’. Lín m̄-thang tè in khì. 9Lín thiaⁿ-tio̍h chiàn-cheng kap pō-loān ê siau-sit, m̄-bián kiaⁿ-hiâⁿ. Chiah-ê tāi-chì it-tēng ōe tāi-seng hoat-seng, m̄-kú chiong-kio̍k bōe sûi-sî kàu.”

10Iâ-so͘ kè-sio̍k kā in kóng, “Bîn-cho̍k ōe khí-lâi kong-kek bîn-cho̍k, kok-ka kong-kek kok-ka. 11Ū tōa tōe-tāng, chin chōe só͘-chāi ū ki-hng kap un-e̍k, koh ū thang-kiaⁿ ê kéng-siōng kap tōa kî-chek tùi thiⁿ-téng chhut-hiān. 12Chiah-ê tāi-chì hoat-seng í-chêng, lâng ōe lia̍h lín, pek-hāi lín, kā lín kau hō͘ hōe-tn̂g kap kaⁿ-ga̍k. Lín ōe ūi-tio̍h góa ê iân-kò͘ hō͘ lâng lia̍h-khì kun-ông kap chóng-tok ê bīn-chêng. 13Chit-ê sī lín chòe kiàn-chèng ê ki-hōe. 14Só͘-í, lín ê sim tio̍h lia̍h hō͘ tiāⁿ, m̄-bián seng siūⁿ-beh án-chóaⁿ piān-bêng. 15In-ūi góa beh sù lín kháu-châi kap tì-hūi, hō͘ lín ê tùi-te̍k bô chi̍t ê ōe-tàng tùi-khòng á-sī hoán-pok. 16Liân lín ê pē-bú, hiaⁿ-tī, chhin-cho̍k, kap pêng-iú mā ōe kā lín chhut-bōe; lín tiong-kan ū lâng ōe hō͘ in hāi-sí. 17Lín ōe in-ūi góa ê miâ hō͘ chèng-lâng oàn-hūn. 18Put-kò lín liân chi̍t ki thâu-mn̂g to bōe sit-lo̍h. 19Tio̍h jím-nāi chiah ōe tit-tio̍h sìⁿ-miā.”

Ū-giân Iâ-lō͘-sat-léng ê Bia̍t-bông

(Thài 24.15-21; Khó 13.14-19)

20“Lín khòaⁿ-tio̍h Iâ-lō͘-sat-léng hō͘ kun-tūi pau-ûi ê sî, chiū chai chit-ê siâⁿ teh-beh húi-bia̍t lah. 21Hit-sî, tī Iû-thài ê lâng tio̍h tô-cháu khì soaⁿ-lāi; tī siâⁿ-lāi--ê tio̍h lī-khui; tī chng-kha--ê m̄-thang ji̍p-siâⁿ. 22In-ūi che sī Pò-èng ê Ji̍t-chí, sī beh èng-giām Sèng-keng só͘ kì-chài ê it-chhè. 23Tī hiah-ê ji̍t-chí, ū sin-īn--ê kap hō͘ eⁿ-á chia̍h-lin ê hū-jîn-lâng hui-siông put-hēng! In-ūi tōa chai-hō teh-beh lîm-kàu chit-ê tōe; Siōng-tè ê tōa siū-khì teh-beh lîm-kàu chit-ê jîn-bîn. 24In ōe hō͘ to-kiàm thâi-sí, mā ōe hō͘ lâng lia̍h-khì ta̍k-kok. Iâ-lō͘-sat-léng ōe hō͘ Gōa-pang-lâng thún-ta̍h, ti̍t-kàu Gōa-pang-lâng ê kî-hān móa.”

Jîn-chú ê Lâi-lîm

(Thài 24.29-31; Khó 13.24-27)

25“Hit-sî, ji̍t, ge̍h, chhiⁿ lóng ōe hián-chhut tiāu-thâu. Tōe-chiūⁿ bān-bîn ōe in-ūi hái-éng hōa-hōa-háu kiaⁿ-hiâⁿ put-an. 26Lâng ōe in-ūi chit sè-kài teh-beh hoat-seng ê tāi-chì kiaⁿ kah hūn--khì, in-ūi thiⁿ-téng ê kng-thé lóng ōe iô-choah. 27Hit-sî, lâng ōe khòaⁿ-kìⁿ Jîn-chú chhiong-móa koân-lêng kap tōa êng-kng chē-hûn lâi-lîm. 28Chiah-ê tāi-chì teh-beh hoat-seng ê sî, lín tio̍h gia̍h-thâu théng-sin, in-ūi lín ê chín-kiù teh-beh kàu lah.”

Tùi Bû-hoa-kó-chhiū Ha̍k-si̍p

(Thài 24.32-35; Khó 13.28-31)

29Iâ-so͘ koh ēng phì-jū kā in kóng, “Lín khòaⁿ bû-hoa-kó-chhiū kap it-chhè ê chhiū. 30Lín khòaⁿ-tio̍h chiah-ê chhiū puh-íⁿ ê sî chiū chai joa̍h-thiⁿ teh-beh kàu. 31Chhin-chhiūⁿ án-ni, lín khòaⁿ-tio̍h chiah-ê tāi-chì hoat-seng ê sî chiū chai Siōng-tè ê chú-koân teh-beh si̍t-hiān. 32Góa si̍t-chāi kā lín kóng, chit sè-tāi iáu-bē kè--khì, chiah-ê tāi-chì lóng ōe hoat-seng. 33Thiⁿ kap tōe ōe siau-sit, m̄-kú góa ê ōe choa̍t-tùi bōe siau-sit.”

Tio̍h Kín-sīn

34-35“Lín ka-kī tio̍h kín-sīn, chiah bián in-ūi tham-chia̍h, chiú-chùi, kap seng-oa̍h ê khòa-lū hō͘ lín ê sim bâ-pì, tì-kàu hit-ji̍t chhin-chhiūⁿ lô-bāng hut-jiân lîm-kàu lín, in-ūi hit-ji̍t ōe lîm-kàu tòa tī choân sè-kài ta̍k só͘-chāi ê lâng. 36Tio̍h put-sî kéng-séng, kî-tó, hō͘ lín ū khùi-la̍t thang tô-pī it-chhè teh-beh hoat-seng ê tāi-chì, thang khiā tī Jîn-chú ê bīn-chêng.”

37Chit kúi ji̍t, Iâ-so͘ ji̍t--sî lóng tī Sèng-tiān kà-sī lâng, mî--sî chhut-siâⁿ khì Kaⁿ-ná-soaⁿ kè-mî. 38Chèng-lâng lóng thàu-chá chiū khì Sèng-tiān thiaⁿ Iâ-so͘ kóng tō-lí.

Currently Selected:

Lō͘-ka Hok-im 21: TTVR

Highlight

Copy