Lō͘-ka Hok-im 20

Chit-būn Iâ-so͘ ê Koân-pèng

(Thài 21.23-27; Khó 11.27-33)

1Ū chi̍t ji̍t, Iâ-so͘ tī Sèng-tiān teh kà-sī lâng koh thoân hok-im. Ū chè-si-tiúⁿ, keng-ha̍k-kàu-su, kap tiúⁿ-ló chòe-hé lâi, 2mn̄g I, “Kā goán kóng, lí khò sím-mi̍h koân-pèng chòe chiah-ê tāi-chì? Sím-mi̍h-lâng hō͘ lí chit-ê koân-pèng?”

3Iâ-so͘ ìn kóng, “Góa mā beh mn̄g lín chi̍t kù ōe. Lín kā góa ìn. 4Iok-hān kā lâng sóe-lé ê koân-pèng sī tùi Thiⁿ á-sī tùi lâng lâi--ê?”

5In hō͘-siōng gī-lūn, “Lán nā kóng ‘Tùi Thiⁿ’, I ōe kóng ‘Án-ni, lín sī-án-chóaⁿ bô sìn Iok-hān?’ 6Lán nā kóng ‘Tùi lâng’, chèng-lâng ōe ēng chio̍h-thâu kā lán tìm, in-ūi in lóng sìn Iok-hān sī sian-ti.” 7Só͘-í in ìn kóng m̄ chai tùi tó-ūi lâi.

8Iâ-so͘ kā in kóng, “Án-ni, góa mā m̄ kā lín kóng góa khò sím-mi̍h koân-pèng chòe chiah-ê tāi-chì.”

Pháiⁿ Tiān-lông ê Phì-jū

(Thài 21.33-46; Khó 12.1-11)

9Iâ-so͘ koh ēng chi̍t ê phì-jū kā chèng-lâng kóng, “Ū chi̍t ê lâng khai-khún chi̍t khu phû-tô-hn̂g. I chiong chit-khu hn̂g cho͘ hō͘ tiān-lông, āu-lâi chhut-gōa chin kú. 10Siu-sêng ê sî kàu, i chhe chi̍t ê po̍k-jîn khì tiān-lông hia, beh kā in siu hn̂g--ni̍h ê ké-chí. Tiān-lông kā i phah, hō͘ i khang-chhiú tò--khì. 11Chú-lâng koh chhe pa̍t-ê po̍k-jîn khì. In mā kā i phah, kā i bú-jio̍k, kóaⁿ i khang-chhiú tò--khì. 12Chú-lâng chiū chhe tē-saⁿ ê po̍k-jîn khì. In mā kā i siong-hāi, kā i kóaⁿ--chhut-khì. 13Āu-lâi phû-tô-hn̂g ê chú-lâng kóng, ‘Taⁿ góa tio̍h án-chóaⁿ chòe? Góa beh chhe góa só͘ thiàⁿ ê kiáⁿ khì. In tāi-khài ōe kā i chun-tiōng.’ 14M̄-kú tiān-lông khòaⁿ-tio̍h i, chiū chham-siông kóng, ‘Chit-ê sī i ê kè-sêng-jîn. Lán lâi kā i thâi-sí, án-ni i ê châi-sán chiū pìⁿ-chòe lán ê.’ 15In chiū kā i hiat chhut-khì phû-tô-hn̂g ê gōa-bīn, kā i thâi-sí.

“Án-ni, phû-tô-hn̂g ê chú-lâng ōe án-chóaⁿ kā in chhú-lí? 16I ōe lâi châu-bia̍t chiah-ê tiān-lông, chiong phû-tô-hn̂g cho͘ hō͘ pa̍t-lâng.”

Chèng-lâng thiaⁿ-tio̍h chiah-ê ōe, chiū kóng, “Chhian-bān m̄-thang ū chit-khoán tāi-chì!” 17Iâ-so͘ chù-ì kā in khòaⁿ, kóng, “Sèng-keng só͘ kì-chài--ê sī sím-mi̍h ì-sù:

Khí-chhù sai-hū só͘ khì-sak ê chio̍h

í-keng chiâⁿ-chòe siōng tiōng-iàu ê ki-chio̍h.

18Só͘-ū siak lo̍h-khì hit-tè chio̍h-thâu téng ê lâng, ōe siak kah chhùi-kut-hun-si; hō͘ hit-tè chio̍h-thâu teh--tio̍h ê lâng, ōe teh kah chhùi-kô͘-kô͘.”

La̍p-sè ê Būn-tôe

(Thài 22.15-22; Khó 12.12-17)

19Hit-sî, keng-ha̍k-kàu-su kap chè-si-tiúⁿ chai-iáⁿ Iâ-so͘ kóng chit-ê phì-jū sī teh chí in, chiū siūⁿ-beh tong-tiûⁿ hē-chhiú lia̍h Iâ-so͘, put-kò kiaⁿ chèng-lâng. 20Só͘-í, in chiū chhē ki-hōe, phài bi̍t-thàm ké-chòe láu-si̍t-lâng, beh lia̍h Iâ-so͘ ê ōe-phāng, chiong I kau hō͘ chóng-tok thang ēng i ê koân-pèng i-hoat pān-lí. 21Chiah-ê bi̍t-thàm lâi mn̄g Iâ-so͘ kóng, “Lāu-su, goán chai lí só͘ kóng só͘ kà-sī--ê lóng chin tio̍h, bô phian-sim, chí-ū tiong-si̍t kà-sī Siōng-tè ê tō-lí. 22Goán la̍p-sè hō͘ Lô-má hông-tè Khái-sat ū ha̍h Lu̍t-hoat bô?”

23Iâ-so͘ khòaⁿ-chhut in ê khúi-kè, chiū tùi in kóng, 24“The̍h chi̍t ê gûn-pè hō͘ góa khòaⁿ. Che ū sím-mi̍h-lâng ê siōng kap jī-hō?”

In ìn kóng, “Khái-sat ê.” 25Iâ-so͘ chiū tùi in kóng, “Án-ni, Khái-sat ê mi̍h hō͘ Khái-sat; Siōng-tè ê mi̍h hō͘ Siōng-tè.”

26In tī kong-chiòng bīn-chêng lia̍h bōe tio̍h Iâ-so͘ ê ōe-phāng, koh I ê ìn-tap hō͘ in chin tio̍h-kiaⁿ, chiū tiām--khì.

Sí-lâng Koh-oa̍h ê Būn-tôe

(Thài 22.23-33; Khó 12.18-27)

27Ū chi̍t-kóa chú-tiuⁿ bô koh-oa̍h ê Sat-to͘-kai-phài ê lâng lâi Iâ-so͘ hia, mn̄g I kóng, 28“Lāu-su, Mô͘-se só͘ siá ê Lu̍t-hoat kā goán kóng, ‘Nā ū lâng i ê hiaⁿ sí--khì, bó͘ iáu oa̍h--teh m̄-kú bô kiáⁿ, i choh sió-tī--ê tio̍h chhōa hiaⁿ-só thòe hiaⁿ thoân-chong-chiap-tāi.’ 29Í-chêng bat ū chhit ê hiaⁿ-tī, siōng-tōa--ê chhōa-bó͘, bô kiáⁿ chiū sí--khì. 30Tē-jī--ê, 31tē-saⁿ--ê mā chhōa in hiaⁿ-só. Chhit ê lóng án-ni, bô kiáⁿ chiū sí--khì. 32Āu-lâi, hit-ê hū-jîn-lâng mā sí--khì. 33Án-ni, koh-oa̍h ê sî, chit-ê hū-jîn-lâng sī tó chi̍t ê lâng ê bó͘? In-ūi chit chhit ê lóng bat chhōa i chòe bó͘.”

34Iâ-so͘ kā in kóng, “Kim-sè ê lâng ū kè ū chhōa; 35put-kò ōe-kham-tit tùi sí-lâng tiong koh-oa̍h koh chìn-ji̍p lâi-sè ê lâng chiū bô kè bô chhōa. 36In-ūi in sī koh-oa̍h ê lâng, bōe koh sí, kap thiⁿ-sài siâng-khoán sī Siōng-tè ê kiáⁿ-jî. 37Koan-hē sí-lâng koh-oa̍h ê sū, Mô͘-se í-keng tī ‘Teh to̍h ê chhì-phè’ hit-tōaⁿ keng-chat ū chí-bêng, mā chheng-ho͘ Chú sī A-pek-la-hán ê Siōng-tè, Í-sat ê Siōng-tè, Ngá-kok ê Siōng-tè. 38I m̄-sī sí-lâng ê Siōng-tè, sī oa̍h-lâng ê Siōng-tè. In-ūi tùi Siōng-tè lâi khòaⁿ, in lóng teh oa̍h.”

39Ū kúi-nā ê keng-ha̍k-kàu-su tùi Iâ-so͘ kóng, “Lāu-su, lí kóng-liáu chin hó.” 40In chiū m̄-káⁿ koh kā I mn̄g sím-mi̍h.

Koan-hē Tāi-pi̍t Hō͘-tāi ê Būn-tôe

(Thài 22.41-46; Khó 12.35-37)

41Iâ-so͘ tùi in kóng, “Lâng ná ōe kóng Ki-tok sī Tāi-pi̍t ê hō͘-tāi? 42Tāi-pi̍t pún-sin tī Si-phian kóng:

Chú kā góa ê Chú kóng:

Lí chē góa ê chiàⁿ-pêng,

43thèng-hāu góa hō͘ lí ê tùi-te̍k khut-ho̍k tī lí kha-ē.

44 Tāi-pi̍t to chheng-ho͘ Ki-tok chòe ‘Chú’, Ki-tok ná ōe sī Tāi-pi̍t ê hō͘-tāi?”

Khiàn-chek Keng-ha̍k-kàu-su

(Thài 23.1-36; Khó 12.38-40)

45Chèng-lâng teh thiaⁿ ê sî, Iâ-so͘ tùi I ê bûn-tô͘ kóng, 46“Tio̍h tî-hông keng-ha̍k-kàu-su. In ài chhēng tn̂g-saⁿ kiâⁿ-lâi-kiâⁿ-khì, tī chhī-tiûⁿ-kháu hō͘ lâng chhéng-an, tī hōe-tn̂g chē koân-ūi, tī iàn-hōe chē tōa-ūi. 47In chhim-chiàm kóaⁿ-hū ê ke-hé, thiau-kò͘-ì kî-tó chin tn̂g. In ōe siū koh-khah tāng ê hêng-hoa̍t.”

Currently Selected:

Lō͘-ka Hok-im 20: TTVR

Highlight

Copy