Waroma 8

Kukala moyo kwa ndighi za Roho wa Kuela

1Kwa hung'u, ndamu sikwesi kutaghanyo kungi kwa walye wakalagha wawatane na Kristo Jesu. 2Kwani Sheria ya Roho, iyi itiletelagha umana kwa kuwatana na Kristo Jesu, yanifungula kufuma kele Sheria ya kaung'a na kifwa. 3Agha sighedimile kudeo ni Sheria, kwa undu ghwa unyonge ghwa kidamu, Mlungu kaghadea. Kaitaghanya kaung'a kele kidamu kwa kumtuma Mwana wake, uyu ajile kwa ngila ya kidamu io ya kikaung'a eri aitaghanye kaung'a kwa muli. 4Mlungu wanadeile hung'u eri hachi ya Sheria ikatiso kwetu isi tikalagha kwa ngila ya Roho, ela si kuirimira gha kidamu. 5Awo wakalagha kwa ngila ya kidamu, akili zawe zanalongozogho ni ghalye ghashailo ni kidamu. Nawo walye wakalagha selyi Roho iwauzagha, akili zawe zanalongozogho ni Roho selyi ashaile. 6Ikakala akili zako zendelongozo ni kidamu kudua ni kifwa; ikakala akili zako zendelongozo ni Roho kudua upatagha umana na sere. 7Kwa hung'u mundu ukalagha mumaiza wa Mlungu ilyi akili zake zalongozo ni kidamu; kwani seiwatagha Sheria ya Mlungu, na sedimagha kuiwata. 8Awo wawatagha kidamu chawe siwedimagha kumuboela Mlungu.

9Ela inyo simkalagha selyi kidamu chenyu chimuuzagha, mwanakalagha selyi Roho emuuzagha, ngera fulo Roho wa Mlungu ewo amweni kwenyu. Uyo wose sewesi Roho ya Kristo si wake ungi. 10Ela ngera Kristo ewo amweni kwenyu, hata ngera sani mili ifwighagha kwa undu ghwa kaung'a, Roho iwo moyo kwenyu kwa kukala mwamalila kuiko wahachi na Mlungu. 11Ngera Roho wa Mlungu uyu amzusile Jesu kufuma kifweni akalagha amweni kwenyu, aho uyo amzusile Kristo kufuma kifweni, ujeihawa mili yenyu yefwa umana kwa Roho yake akalagha amweni kwenyu.

12Kwa hung'u, wana wakwetu, nisi wadeni, ela si yekala selyi kidamu chetu chishaile. 13Kwani ilyi mwakala kwa ngila ya kidamu chenyu, mfwighagha; ela ilyi mwaulagha madeo ghenyu gha kikaung'a kwa Roho, mjekala moyo. 14Walye walongozogho ni Roho wa Mlungu niwo wana wa Mlungu. 15Kwani ilya Roho muhawilo ni Mlungu si Roho yemdea mkale wasunyi na kumngiza wogha; ela ni Roho yemdea mkale wana wa Mlungu, na kwa ndighi za Roho tamlilila Mlungu, “Abba, Aba!” 16Roho ya Mlungu yenyi yawatana na roho zetu kughamba nisi wana wa Mlungu. 17Kwa kukala nisi wana wake, tijepata mibaraka aikilile wandu wake, na sena tijepata ngila mojori na Kristo agha Mlungu amwikilile; kwani ngera tasirima na Kristo tijewatana naye kele ubwaa ghwake.

Ubwaa ghukujagha

18Nendeona kamba masirimi gha iyi ngelo sighedimagha kukataniso hata kuchache na ubwaa ghujeoneka kwetu. 19Vindu vose viumbilo vio vikedafurira kwa beha kuona Mlungu kewamanyisa wana wake. 20Kwani vose viumbilo vataghanyo kukala sivifweni kamare, si kwa kushaya venyi, ela ni kwa kukala Mlungu oshaile ikale hung'o. Hata hung'u sani, koluo ilyi ikosereo, 21kamba ijua imoju vose viumbilo vijefunyo kufuma usunyi ghwawe ghoola, na kupata ubwaa ghwa wana wa Mlungu. 22Kwani tamanya kamba iyi ngelo, vose viumbilo vashonona kwa kuhariso sa kulumo kwa muke kovala mwana. 23Hata si vose viumbilo ekeng'weri visirimagha, ela isi natose tio na Roho iwo inosi lya hambiri lya Mlungu, natose tio tikeshonona ngelo tio tikemdafwa Mlungu atidee wana wake na kutiokola kamare. 24Kwani tanakizilo kwa undu ghwa ikosereo; ela ilyi taona chilya tikosereagha, ilyo fulo si ikosereo lyingi. Kwani nani ekosereagha kindu echionagha? 25Ela ilyi takoserea kindu sitechionagha, tarumaghia tikechidafurira. 26Niko kwenyi na Roho naese akujagha atiwarure, kwa kukala tio wanyonge, kwani sitiweni selyi itifweni tilombe; ela Roho mwenyi watilombela Mlungu, kwa ngila ya malagho sighedimagha kughoro. 27Naye Mlungu aonagha ngolo za wandu, wamanya maghelelo gha Roho; kwa kukala Roho yalombela wandu kuirimana na mashayo ghake Mlungu.

28Tamanya kwa ngila zose kamba Mlungu wanadeagha kazi kwa uloli ghwa wose wamshaile, nawo ni walye awapang'ile kwa ilengo lyake. 29Walye Mlungu amalile kuwasaghula, wawaika na mbali wakale sa Mwana wake, eri kamba Mwana akale wa hambiri kele wana wakwawe wengi. 30Kwa hung'u Mlungu wanawapang'ile walye awaikile na mbali; na walye awapang'ile kawadea wakale wasikilane naye; nawo walye awadeile wasikilane naye kawadea wapate ubwaa ghwake.

Mashayo gha Mlungu kwa ngila ya Jesu Kristo

31Ndamu kwa agha ghose, tighore ije? Ngera Mlungu ewo gasi yetu, nani ewo kinyume chetu? 32Iye hata samleghelele Mwana wake, ela kamfunya akale sadaka kwa undu ghwetu itose. Iye amfunyile Mwana wake, uleghagha ije kutihawa isi kila kindu tuu? 33Nani edimagha kuwashitakia wasaghulo wa Mlungu? Mlungu mwenyi wawahawa hachi! 34Ndamu mundungi wadima kumutaghanya? Hata Kristo Jesu, uyu afwile, ango azukile na ewo mkonu ghwa kijo ghwa Mlungu. Iye watilombela kwa Mlungu! 35Nani ndamu edimagha kutitaghanya na mashayo gha Kristo? Ni wasi ango ni masirimi, ango ni kugusoguso, ango ni njala, ango ni suhuna, ango ni ndengwa, ango ni kifwa? 36Mawandiko gha Kuela ghaghora,

“Kwa undu ghwako tio kele ndengwa ya kifwa ijua lyose ilanzi;

Tendekala sa ng'onzi zighenzogho kushinjo.”

37Hata, kwa malagho agha ghose takala wasimi kwa ngila ya uyu etishaile. 38Kwani namanya kamare sikuwesi kindu chingi chidimagha kutitaghanya na mashayo gha Mlungu; hata kifwa ango umana; hata wana malaika ango watawali wazima wa mlunguni ango udimo; hata gha indakwenyi ango ghekujagha; 39hata urumenguni ighulu ango urumenguni na mweni; sikwesi kindu chingi chiumbilo chidimagha kutitaghanya na mashayo gha Mlungu tio nagho kwa ngila ya Kristo Jesu Bwana wetu.

Currently Selected:

Waroma 8: SAGALLANT

Highlight

Copy