Waroma 7

Fwana ifumanyagha na kulola

1Namanya mtambukilogho ni agha nishaile kughora, wana wakwetu, kwa kukala inyose mwaimanya Sheria. Sheria yanamtawalagha mundu ngelo ewo moyo. 2Yendefwanana na muke ausilo, ngelo mlume wake ewo moyo wafungo ni Sheria, ela ilyi mlume wake afwa, wafunguka kele Sheria yemfungile na mlume wake. 3Kwa hung'u kakala na mlume mzima ngelo mlume wake ewo moyo upang'ogho mzingi; ela mlume wake kafwa, ukalagha muke afunguka kisheria, na sekalagha wazinga ilyi auso ni mundu mzima.

4Niko kwenyi iwo kwenyu wana wakwetu. Nanyose mwafwa kwa kuirima sheria, kwa kukala ninyo muli ghwa Kristo; kwa hung'u inyo ninyo wake uyu azukile kufuma kifweni eri mumuvalile Mlungu mavalo. 5Kwani ngelo teluo tikekala kidamu, tamaa za kaung'a zeluo zikeuka kwa ngila ya Sheria yeluo ikedea kazi kele mili yetu, nesi teluo tifweni kwa kazi za kifwa. 6Ela ndamu, tafunguka kufuma kele sheria, kwa kukala tanafwile kele ghalye ghetideile wasunyi. Hata sitiitumikilagha ilya ngila ya kale ya Sheria iwandiko, ela tatumika kele ngila mbishi ya Roho.

Sheria na kaung'a

7Ndamu tighore ije? Tighore Sheria yenyi niyo kaung'a? Hata! Ela ni Sheria inideile nikaimanya kaung'a. Ni kumacho semanyile kukala na iziso ni kimuni ngera Sheria siyeghorire, “Swakale na iziso.” 8Kaung'a yanapatile ngila yenula mbari zose za tamaa amweni kwangu kwa kuhawo ulalo ni ughu mlomu. Kwani andu sikowesi sheria kaung'a ni kindu chifwile. 9Imi mwenyi ngelo moju neluo moyo mbali na Sheria, ela mlomu ghuja, kaung'a ikauka, 10na nikafwa. Mlomu gholuo ghoniletela umana, ghukaniletela kifwa. 11Kaung'a ikapata ulalo ghonikalila kuitila kwa mlomu; na kwa ngila ya mlomu kaung'a ikaniulagha.

12Kwa hung'u, Sheria yenyi ni ya kuela, na mlomu ni ghwa kuela, ghwa hachi na ghwaloli. 13Ndamu ni kughamba ghalye ghaloli nigho ghaletile kifwa changu? Hata! Ni kaung'a ideile hung'u, kaung'a kwa kutumia ghalye ghaloli, yananiletelele kifwa, eri ufulo ighulu ya kaung'a ghuoneke. Kwa hung'u kwa ngila ya mlomu, kaung'a yaoneka selyi iwase na ndighi.

Uta amweni ya mdamu

14Tamanya kamba Sheria ni ya Roho, ela imi nimi mdamu wa muli, nitaghilo kukala msunyi wa kaung'a. 15Sitambukilo ni agha nideagha; kwani sideagha agha nishaile, ela nadea agha seshaile. 16Ngelo nideagha agha seshaile yendeonyeza kamba nadumusa Sheria ni ya hachi. 17Kwa hung'u simi ungi nideagha agha; ela ni kaung'a iyi ikalagha amweni kwangu. 18Namanya ghaloli ghengi sigheo amweni kwangu, ni udamu ghwangu ghwenyi. Kwani hata ngera sani nanashaile kudea ghaloli, sidimagha kungi. 19Sidimagha kudea ghalye ghaloli nishaile; ela nadea ghalye ghawase seghashaile kughadea. 20Ngera nadea ghalye seshaile kughadea, uku ni kughamba simi ungi nideagha, ela ni kaung'a iyi iwo amweni kwangu.

21Kwa hung'u nendeona ni iyi Sheria ideagha kazi; ngelo nishaile kudea ghaloli, nasaghula kudea ghawase. 22Ngoloni kwangu komweni nanaboelogho ni Sheria ya Mlungu. 23Ela nendeona Sheria nzima ikedea kazi kele muli ghwangu, Sheria ilwanagha na Sheria idumusilogho ni akili yangu; yanidea nikale msunyi wa Sheria ya kaung'a iyi ideagha kazi kele muli ghwangu. 24Mundu afuruse imi! Nani edimagha kunikiza na ughu muli ghunighenzagha kele kifwa? 25Ndemfunyila Mlungu asanta kwa ngila ya Bwana wetu Jesu Kristo!

Hung'u, niko nio ndamu, imi mwenyi kwa akili yangu nadima kutumikila Sheria ya Mlungu tu kwa akili, ngelo udamu ghwangu ghuo ghuketumikila Sheria na kaung'a.

Currently Selected:

Waroma 7: SAGALLANT

Highlight

Copy