Madeo 27

Paulo kughenda na meli Roma

1Nao kughenda kuitiso kamba titambe kwa meli hata Italia, wakawaika Paulo na wafungo wambawe isi ya Juliasi afisa wa askari wa Kiroma waitogho kikosi cha Augusto. 2Tikangila meli ya Adinarito yeluo ighendagha kele bandari za Asia, nao tikauka, naye Aristarko wa Makedonia kufuma Thesalonike oluo ngila mojori nesi. 3Nao ilyo ikesho tikafika Sidoni. Juliasi kakala na ngolo yaloli, kamudumusila Paulo aghende kuonana na wagheni wake, eri apatilo ivi eshaile. 4Tikatamba kufuma alye, na kwa kukala mbeo yeluo ikekwita kutijila, tetambile tikeirima andu kukingike kwa kisiwa cha Kupro. 5Tikawambuka bahari ya Kilikia na Pamfulia na tikafika Mura kele Lukia. 6Nao alye ofisa kadoka meli kufuma Alekzandaria ighendagha Italia, kwa hung'u katingiza kele iyo meli.

7Tikatamba kwa meli mbole mbole kwa majua ghaenga, na kwa wasi mubwaa tikafika mbalimbali ya muzi ghwa Nido. Mbeo ikatiima kughenda hambiri gasi ilya, kwa hung'u tikatamba isi isi ya andu kukingike kwa kisiwa cha Krete, tikeitila rasi ya Salmone. 8Tikaitila kavui na pwani kwa wasi mubwaa tikafika andu kuitogho Bandari Yaloli, kavui na muzi ghwa Lasea.

9Tikakala luma alye, hata ikakala ni ndengwa kutamba baharini, kwa kukala iyo ngelo majua gha kufunga gheluo ghadua. Kwa hung'u Paulo kawafunda, 10“Mabwana, selyi nionagha charo ichi chetu cha baharini kufuma aha chikalagha cha ndengwa, si kwa misigo na meli tu, ela hata kulaghaza roho zetu.” 11Ela ulya mubwaa wa askari kasikila ghalye ghaghoriro ni mlongozi meli na mundu wa meli na sasikile gha Paulo. 12Ilya bandari siyeluo yaloli ingi yekala ngelo ya ishika, kwa hung'u wandu wengi wakaona ni kirani waghende hambiri na charo cha baharini na watime ikadimika wafike Foinike. Iyi yeluo ni bandari ya Krete ilolagha kusini ya magharibi na kaskazini ya magharibi, nawo wakale alye ngelo ya ishika.

Mbeo mbwaa baharini

13Nao mbeo ikakwita kufuma kusini, nawo wakaririkanya kamba wapata ichi weshaile, kwa hung'u wakaukisa nanga na meli ikaghenda kavui na pwani ya Krete. 14Ela iyo shwa ng'ori ikeja mbeo mbwaa iitogho “Mbeo ya Kaskazi” ikakwita kufuma kele kisiwa. 15Ikaikwita ilya meli, na kwa kukala siyedimike kuisima mbeo, tikaisigha meli ituko ni mbeo. 16Tikakingilo mbeo kwa kuitila Kusini ya kisiwa kichache chiitogho Kauda. Nao kwa wasi tikadima kuiuja mashua ya meli. 17Walye wandu wa meli Wakairuta mashua na kuifunga na gunga gii kele meli, wekeogha kamba wadima kungila kele msanzaghala kavui na pwani ya Libya. Kwa hung'u wakaseleza nguo yeghenza meli na kuisigha meli ighenzo ni mbeo. 18Mbeo mbwaa ikaendelea kukwita na kwa hung'u ilyo ikesho lyake wakadyowa kutagha misigo ya meli baharini, 19Na ijua lya katatu wakatagha vilambo va meli baharini na mikonu yawe. 20Kwani kwa majua mengi siteonile ijua ango ndonde, na mbeo yeluo ikekwita kwa ndighi. Na hata makosereo ghekila ghakaduwa.

21Nawo wakala majua mengi siwelyile kindu chingi, Paulo kakala kimusi hambiri yawe, kawauza, “Alume, kumacho monisikizile na kulegha kutamba kufuma Krete; na macha sitehakilikilo na kulaghaza vindu vose hung'u. 22Ela namulomba mukale na ngolo! Sikwesi mundungi wenyu ehaitisagha umana ghwake, meli niyo ihaitagha. 23Kwani ihwayu malaika wa Mlungu uyu niwo wake na nimutasagha, wananijilile, 24na kunuza, ‘Swaoghe Paulo! Ni suti umange hambiri ya Kaisari, na Mlungu kwa uloli ghwake wakuhawa awa wandu wose utambanyagha nawo.’ 25Na kwa hung'u, Alume kaleni na ngolo! Kwani nadumusa Mlungu udeagha selyi anuzile. 26Ela ni suti tighenzo pwani ya kisiwa kimoju.”

27Cheluo kiro cha ikumi na ine, nesi teluo tiketwalo ni mbeo mbwaa kele bahari ya Adria. Kavui kiro ghati wandu wa meli wakaririkanya weo avui na isanga lyiomile. 28Kwa hung'u, wakaseleza gunga ifungilo na kindu chigwaile na wakaona kumalika kwa meji ni mita mirongo mine, hambiri sena wakadea ukwenyi na wakapata mita mirongo mitatu. 29Nao wekeogha kamba meli yetu yadima kungila kele lwala, wakaseleza nanga ine na nyuma ya meli na wakalomba kuele. 30Wadei kazi wa meli wakashaya kulaghaya kufuma kele meli; wakaseleza mashua mejini wekekudea kamba wendeghenda kuseleza nanga hambiri ya meli. 31Ela Paulo kamuza ulya afisa na askari, “Wadei kazi wa meli wakalegha kukala kele meli simukilagha.” 32Kwa hung'u askari wakapasa gunga yeluo ikewata mashua na wakaisighilila ighende. 33Nao kufika kavui na kuela, Paulo kawalomba wose walye chakulya, kewauza; “Mwakala majua ikumi na mane simolyile kindu chingi na mkedafwa agha ghekujagha. 34Namlomba ndamu mulye chakulya, mwanachishaile eri mukale moyo. Kumbukeni sikwesi mundungi wenyu elaghazagha hata sisiri yake.” 35Naye Paulo aghenda aghora hung'u kawata mkate, kamkasa Mlungu hambiri yawe wose kaghuvunja na kudyowa kulya. 36Nao wose wakapata ngolo wakalya chakulya. 37Nesi teluo wandu maghana maili na mirongo mfungate kele meli. 38Nao kila mundu aghenda alya na kughuta, wakagotuisa misigo kele meli, kwa kuikumba ngano baharini.

Kuvunjika kwa meli

39Nao kughenda kuela, wadei kazi wa meli wakalemo ni kutambula ilya pwani, ela weonile mwanya ghuo na msanzaghala, nawo wakaona ni kirani waghenze meli alye. 40Kwa hung'u wakakumba nanga na kuzisigha zimalike baharini. Iyo ngelo yenyi wakabobolesa gunga yefungile sukana, wakanula nguo yeghenza meli yeluo hambiri eri mbeo ighenze meli pwani. 41Ela waghenda wafika andu bahari mbili zikoghanilagha, meli ikamangalila. Gasi ya hambiri ikangila msanzaghaleni hata siyadime kusheghesheka na gasi ya nyuma ikavunjovunjo ni mivomivo ya bahari. 42Askari weshaile kuwaulagha wafungo wose eri ungi sabung'e hata pwani na kulaghaya. 43Ela afisa wa askari kawaima, kwa kukala oshaile kumukiza Paulo. Ela iye kaghora, wandu wose wedima kubung'a wachumbe wabung'e hata kele isanga lyiomile jako, 44nao wazima wose wairime wekewata mbao ango vindu vivunjike va meli. Na hung'u niko tifikile banana itose kele isanga lyiomile.

Currently Selected:

Madeo 27: SAGALLANT

Highlight

Copy