Madeo 28

Alye Malta

1Nao tifika banana kele isanga lyiomile tikamanya kamba chilya kisiwa chanaitogho Malta. 2Wandu wa alye weluo waloli kwetu. Mvula idyowa kunya na kukala na mbeo, wakakoza moto wakatikaribisha tibughawe. 3Paulo kausa ijilo lya nguni, na ilyi eluo kekumba motoni, nyoka ikafuma kwa undu ghwa mruke ghwa moto, ikakurigharigha kele mkonu ghwake. 4Wandu wa alye waiona nyoka ikejenena mkonuni kwa Paulo wakaghamba, “Uyu mundu ni muulaghi, ela hachi siyimsighagha akale moyo kungi, hata ngera sani wakila kele bahari.” 5Ela Paulo kaighungudula nyoka motoni hata saonile ilagho lyingi. 6Nawo weluo wekedafwa ngera uvimbagha ango ugwighagha afwe. Ela waghenda wadafwa luma na kuona sedeikagha ilagho lyingi, wakakirimuwa, wakaghora. “Ni mlungu.”

7Na kavui na alye koluo na mbuwa ya Publio, mubwaa wa kisiwa. Naye katikaribisha kirani kwa majua matatu sa wagheni wake. Tatie Publio woluo ulilini mkongo wa msuko na kufwaha bighati. 8Paulo kangila kele chumba chake, kalomba na kuikilila mikonu yake ighulu yake, naye kaboa. 9Nao agha ghadeika, wandu wose weluo wakongo alye kele kisiwa, wekeja wakaboeso. 10Nawo wakatihawa manosi mengi na ngelo yeuka na meli wakatingizila vilya teshaile kwa charo.

Kufuma Malta hata Roma

11Nao nyuma ya miezi mitatu tikauka na meli ifumile Alekzandaria iitogho “Milungu ya Mahega” yeluo kele kisiwa chilya na ishika. 12Tikafika kele muzi ghwa Sirakusa, tikakala alye kwa majua matatu. 13Kufuma alye tikatamba na meli tikafika muzi ghwa Regio. Nao ilyo ikesho lyake mbeo ikadyowa kupita kufuma kusini, na nyuma ya majua maili tikafika kele muzi ghwa Potioli. 14Alye tikadoka wandu wadumuse wakatilomba tikalanye nawo kwa jumwa. Na hung'u tikafika Roma. 15Wana wakwetu wa Roma wasikila uvoro ghwetu wakatimarira kele soko ya Apio na Nyumba ndatu za wagheni. Naye Paulo aghenda awaona, kamkasa Mlungu na kupata ngolo.

Paulo Roma

16Nao tifika Roma, Paulo kadumusilo kukala mwenyi na askari omulindagha.

17Nao nyuma ya majua matatu Paulo kawapang'a vilongozi va Wayahudi wa alye wakughane. Nawo waghenda wakoghana kawauza, “Wana wakwetu, Hata ngera sani sideile ikosa lyingi kwa wandu wa muzetu ango ada tiziirimagha kufuma kwa wana ake, Nanafungilo kufuma Jerusalemu na kungizo kele mikonu ya Waroma. 18Waghenda wanikotela makotelo wakashaya kunifungula, kwa kukala siweonile ikosa lyingi kwangu lyenifweni kufwa. 19Ela Wayahudi waghenda walegha agha, ikanifwana nilombe rufani kwa Kaisari hata ngera sani seluo na ilagho lyingi ighulu ya wandu wangu. 20Ni kwa undu ughu neonile nimpang'e muje tionane na tihelee, kwa kukala nio na iyi minyororo kwa undu ghwake uyu ekosereogho ni wandu wa Israeli.” 21Nawo wakamuza, “Sitipatile barua zingi kufuma Judea ighulu yako ango sikwesi mundungi wa wana wakwetu ajile kufuma alye na uvoro ghungi ango kughora ilagho lyingi lyiwase ighulu yako. 22Ela tanashaile tisikile malagho ghako, kwa kukala tamanya kamba ilagho ilyo lyanaghoro laghelaghe kila andu na uwe nuwe mumoju wawe.”

23Nao wakaika ijua lyeonana na Paulo, wengi wawe wekeja lyilya ijua, andu Paulo eluo kekala. Naye kufuma naikesho hata na nahafukeni kawaghorera na kuwamanyisa uvoro ghwa uzuri ghwa Mlungu. Katima selyi edimagha kuwaruta kwa Jesu ketumia ghawandiko kele Sheria ya Musa na Mawandiko gha wana tondolo. 24Wamoju wawe wakadumusa malagho ghake, ela wamoju wakalegha kudumusa. 25Nao wakauka kughenda sikwewo na masikilano, nyuma ya Paulo kughora ilagho ilyi imojori, “Roho wa Kuela wanaghorire fulo kwa wana akeo kwa ngila ya tondolo Isaya! 26Kwani wanaghorire

‘Ghenda ughore na awa wandu:

Kusikila mujesikila na simumanyagha;

kulola mjelola na simuonagha.

27Kwa kukala ngolo za awa wandu zanagwaile,

wafunga masikilo ghawe,

na wafunga meso ghawe.

Ango macho meso ghawe ghaona,

na masikilo ghawe ghasikila.

Na ngolo zawe zamanya,

na kunighalukila imi, aghora Mlungu,

na macho nawaboesa.’”

28Naye Paulo kamalila, “Ndamu manyeni kamba uvoro ghwa Mlungu ghwa ukizi ghwaghenzo kwa wandu wa mbari nzima. Nawo wejeghusikila.”

[ 29Nao nyuma ya Paulo kughora hung'u Wayahudi wakaghenda wekedeilana nganyi wenyi.]

30Na kwa miaka mili Paulo oluo kekala nyumba eluo keilipila mwenyi na oluo kekaribisha wandu wose wejile kumwona. 31Kachila gha Uzuri ghwa Mlungu na kufundisa malagho gha Bwana Jesu Kristo, kaghora mwazi mwazi sikweo na wuimo ghungi.

Currently Selected:

Madeo 28: SAGALLANT

Highlight

Copy