Matiyu 6

At Foyungan sa baliwa nu Gfon

1“Maadani tuwa labon manga nu gfagbulun am at masine gfalagan way am sas taw. Nu katanya way ay fagbulun, wam e fagsegun famanyun siginan ay Tama sas banwa. 2Ay nu katanya, fagalay am gtarabang at yud e kwa fag taw lag nanfoyung ay iba, kata ngay tagfalukanan at fagbulun sa sangay bale fakafulan ay sa sangaba dalan laman ngay taw sumeg anya. At matuyan, kanya nabul wan si anya at famanyun. 3Fangkabat nu gtarabang am sat yud e kwa, lag gfasaful dewa sa am fagwes fiya fiya, 4laman we gsaful nu gtarabang am. Ay ay Tama way at taglag ay fagbulun at tagfon famanyun sa ayu.”

Isus At Foyungan sa baliwa nu Gdarangin

(Lukas 11:2-4)

5“Fagalay am gdarangin, lag am gfaning sa sangay tagfalukanan at fagbulun. Kanya at fakaumsigun malindug nu gdarangin sis bale fakafulan ay sa sangay sagbatan dalan laman at ngay taw lumag anya. At matuyan, kanya nabul wan si anya at famanyun. 6Fangkabat, fagalay am gdarangin, sakboi way sa ay basad bale, ay dingdingi ay sakbawan. Ay darangini wa long sa ay fagyudun glag fag Mama. Ay ay Mama way at taglag ay fagbulun at tagfon famanyun sa ayu.

7“Ay gina am gdarangin, lag ayuwayu glong nu dway e masuwad, kata at yud gsaful Diyus fag ngay taw. Anway kanya fag ngay taw gamatangan te, ‘Nu nafaayu aktuwa long ku longan, dumungug wa ro fiya ku darangin.’ 8Lag am gfaning takatanya fag ngay taw. Anway ay Mama nasaful wan nus nge wain ay fagetun bagu am get sa anya. 9Nu katanya, katatuyi nu gdarangin am:

‘Em Mama sas banwa,

at masine, ngay taw segi am ngayan. Katanyai!

10Oi tuwa tagmagurang emi, ay ste swa daga am fasadan tuwa em fagfaningun kata nu sis banwa.

11Ay foni emi em fakonun kayu menit.

12Ay falyami em ngay asalanan, kata nu gfalyam ami em iba at ngay asalanan sa emi.

13Ay lag gfabayan nu gsalan ami sa emu, ani tuwa falangfei emi siginan at mauri.

[Anway o at madaragang fag Fun, ay at takadungug fag Diyus faggugat ban.]’

14“Ay nu nafalyam tuwam ay iba at asalanan sa ayu, anggan ay Tama sas banwa nafalyam yangay ban ay asalanan. 15Roro nu dway am nafalyam ay iba at asalanan, anggan ay Tama sas banwa wa ban gfalyam ay asalanan.”

Isus At Foyungan sa baliwa nu Gfe lungud gyud Gfangon laman Gdarangin

16“Ay gina am nanfe lungud gyud gfangon laman gdarangin, lag am gfaning tagfalukanan fag ngay taw. Kanya tumlungud wa yud gfasineun at bilug laman at ngay taw sumaful te, katanya nafe lungud gyud gfangon laman gdarangin. At matuyan, kanya nabul wan si anya at famanyun. 17Fangkabat fasinei tuwa ay bilug gina am gfe lungud gyud gfangon laman gdarangin, 18laman ngay taw wa sumaful te, ‘Katsi mangaro kanya gfe lungud gyud gfangon laman gdarangin.’ Tagsaful ay Tama way ay fagyudun glag. Ay ay Tama way at taglag ay fagbulun at tagfon famanyun sa ayu.”

Fagmabalanun sas Banwa

(Lukas 12:33-34)

19“Lag gfaful ay ngay fagmabalanun ste swa daga, anway ngay dafang kon way, ay at nenay grasras way, ay e ngay takamul way igsakbo sa ay bale laman nanbul ay ngay fagmabalanun. 20Ay ay fagfafulun tagsa tuwas banwa fag fagmabalanun. Sanya di e dafang, ay di e nenay tagrasras, ay di e takamul gsakbo laman nanbul ay ngay fagmabalanun. 21Anway nus nganda am fagmabalanun sanya yangay am amatanganan.”

Tam Bilug at Salung Tam Mata

(Lukas 11:34-36)

22“Am bilug at salung am mata wan. Ay am mata nu maliyo tuwa nu glag, fagdaul am bilug mayamag tuwa. 23Ay roro am mata nu dway maliyo nu glag, anggan fagdaul am bilug marum way. Ay nu katanya, si emu fag salung nu dway gdamlag, sek, marum wa dawdaw.”

Wa Mafafaning Duwak Fun

(Lukas 16:13; 12:22-31)

24“We taw mafafasfuwan gfaning duwak fun, anway kesug tuwa at sadi, ay kalimata way at sadi. Ay gfaning tuwa at sadi, ay wa gfaning at sadi. Katanya wa ngaro fiya, watam mafafasfuwan gfaning sas Diyus ay sas fagmabalanun.

25“Nu katanya, glong aw ayu te, lag am gafanawa te, daginan ay fakonun, ay ay fanginum, ay ay balukas. Anway tam Diyus nu nafon tuwa ayu ay leleg ay ay bilug, mon wa fiya ayu ay fakonun ay ay balukas. 26Linggati nu kin, nin fag ngay manuk tungud. Kanya wa gtanum, ay wa gani, ay wa gfaful at fakonun sat fagfafulan fag bale, roro ay Tama sas banwa gfaon tuwa fag ngay manuk. Ay nu kesug ayu glabi yay kanya fag ngay manuk. Go kin? 27Ay go sinu sa ayu at mafafaaba at leleg sik kadugayun sirut? Yaya long!

28“Taw ro ay fagafanawaun te, ‘Wami e balukas?’ Linggati nu kin, nin fag ngay sariksik sangaba talun, madyay kadaul tuwa mandi. Ay wa gfagbulun ay wa kawat at balukas. 29Ay iglong aw ayu te: dewa Sulumun sik takadungug dawdaw fag taw, we nasulun at namasine fag balukas katvngvd kanya fag ngay sariksik nu masine. 30Diyus nu gfasine tuwa ngay makmak sangaba talun, dewa melo katsi, balabag kayango wan ay glabe wan, am, glabi yay am dawdaw sa sik makmak, madyay Diyus gfon tuwa ayu ay balukas. Go kin? Am mangaro sik ngay taw way am at yud matvngvd nu gafanud! 31Nu katanya, lag am gafanawa te, daginan ro ay fakonun. Ay daginan ro ay fanginum. Ay anggan, daginan ro ay balukas. 32Tagamatangan takatanya at yud way gsaful tam Diyus fag ngay taw. Roro ay Tama sas banwa nasaful wan kanya fagayu ay fagayudanun. 33Nu katanya, fagunai tuwa nu maful am sas Diyus at fagmagurangan taw ay nu gfaning am Diyus at fakaumsigun, ay Diyus mon tuwa long kanya fagayu ay fagayudanun. 34Ay lag am gafanawa te, ‘Tain ban balabag?’ Katsi agi yap gfamut ay fagafanawaun. Balabag yap ban nu gamatangan am tiba.”

Currently Selected:

Matiyu 6: TAWEAST

Highlight

Copy