Matiyu 5

Isus At Foyungan sa baliwas Fagusegananun

(Lukas 6:20-23)

1Ay Isus nu nalag sik ngay taw ayuwayu, kanya nasas tungud muyud ay malunggung sanya. Ay at ngay tagadal inkakbang anya. 2Ay Isus gfoyung sanya fag ngay taw te,

3“Nu gfoyung tuwam ay yud nakasakan sas Diyus, useganani tuwa, teway umful tuwam sas Diyus at fagmagurangan taw.

4Dewa am kabalu katsi, useganani tuwa, teway Diyus gfataluwan yay ban ayu.

5Nu gfababaun tuwam, useganani tuwa, teway mul tuwam ban Diyus at nafamasegan.

6Nu e fasadanan tuwam nanfagurungan Diyus fakaumsigun, useganani tuwa, teway Diyus tumarabang ayu laman gfafagurungan tuwa.

7Nu kafanyu tuwam ay iba katsi, useganani tuwa, teway e mfanyu yangay ban ayu.

8Nu gfaning tuwam fiya fiya sas Diyus, useganani tuwa, teway lumag tuwa ban am ay Diyus.

9Nu gfalukmeanan tuwam ay iba, useganani tuwa, teway gfangayan ban ayu te, Diyus wam at unga.

10Dewa am gafaurianan sa ay nafaningan Diyus fakaumsigun, useganani tuwa, teway umful tuwam sas Diyus at fagmagurangan taw.

11“Dewa e gfalingun ayu, ay dewa e gfauri ayu, ay dewa e glong mauri sa ayu baliwa sa ay naafanudan sa angku, useganani tuwa. 12Dewa katanya, useganani dawdaw, teway gbiya ban ay nabul sas banwa. Katanya yangay ebi at ngay taw at fagbulun, nafauri yangay Diyus at ngay taglong, at naguna ayu.”

Isus At Fafaskudanan sa sik Asing ay sa sik Salung baliwa

(Mar. 9:50; Lukas 14:34-35)

13“Am wan takata sik asing ste swa daga. Ay roro sik asing nu dway e tamis, tain ro nu gdog yangay tam gfatamis? Yaya, wa long kafatamis. Ka fag asing we fanambagun. Ukasi wan ay dewa ro e nasiyad.

14“Am wan takata sik salung ste swa daga. Ka fag salung kalag tuwa kata sik fulan daul sis tungud bugsul ay wa masuksuk. 15Sik taw nu nasulsul at salung, di nansuklub bugyas. Nanfatsa tuwa at fagfatungkudan, laman dumamlag fagayu taw sanya fag basad bale. 16Ay ugali katai sik salung nu gdamlag sas fagayu taw. Ay at ngay taw nu lumag te, masine ay ugali, sumeg ay Tama sas banwa.”

Isus ay Muisis at Longan

17“Lag am gamatangan te, ku fagnastiyeun nanfasaman aw Muisis at Suguwan ay anggan Diyus at ngay taglong at ngay foyungan. Ku fagnastiyeun nanfagurungan aw katanya. 18Matuyan iglong kwa ayu te, dewa ban gyud e banwa ay e daga, nus di sadik afud sirut Muisis at Suguwan di gfasaman yap ngay umgurungan fagayu. 19Nu katanya, nus nga sinu at nafamabo nus di sadik afud sirut Muisis at Suguwan, ay manga nu nafoyung sa tiba te, katanyai anggan am, e gfangayan wa ban ka fag taw te, tiba daga fag taw sas Diyus at fagmagurangan taw. Ay roro nus nga sinu tagfaning fiya fiya Muisis at Suguwan ay nu gfoyung tuwa te, faningi tuwa angku, e gfangayan ban ka fag taw te, tiba tungud fag taw sas Diyus at fagmagurangan taw. 20Amatangani: nu dway am lumabi tagfoyung Muisis at Suguwan ay taw Parisiyu nu gfaning Diyus at fakaumsigun, wa long am umful sas Diyus at fagmagurangan taw.”

Isus At Foyungan sa baliwa Takadotama

(Lukas 12:57-59)

21Ay Isus glong yangay te, “Nadungug wam at foyungan ebi sa tam ngay aguyangan te, ‘Lag am kamate.’ Anway nus nga sinu at nafate taw, umfaurianan ban. 22Ay glong akyangay sa ayu te, nus nga sinu takadotama sat fadugsay, umfaurianan ban. Ay nus nga sinu at lumong sat tiba te, ‘Wo e fanambagun,’ e tumaban anya sas Taw Udyu Tiba Tungud Tagmagurang laman nanfaurianan. Ay nus nga sinu at lumong sat fadugsay te, ‘Wo e amatanganan,’ kanya suma was lino afuy. 23Nu katanya, nut si os fagyagoan laman nanfon am anyun sas Diyus, ay nu e namatangan yay o am nasalan sam fadugsay, 24famatoi yap am anyun sis fagyagoan. Ay fasinei yap am fagbulun sa am fadugsay, ay nu nsine wan, afolii yangay fiya ay foni wa long am anyun sas Diyus.

25“Fagalay e kalimata emu, fasinei wa mafali am fanlonganan sa anya kaduge am glo sas fagfasinean fanlonganan, anway nu sanya wam, at tagbuknga gfatsa emu sas tagsungsung laman nansungsung. 26Matuyan iglong aw emu te, wa long o malfas siginan at sungsungan yap ngay ban o fasali am naasalanan fagayu.”

Isus At Foyungan sa baliwas Takamayun

27“Ay nadungug wam ebi at foyungan te, lag kamayun. 28Ay katsi glong kyangay sa ayu te, nus nga sinu at ke linggatan sa sik mangena ay kaumsig wa anya, katanya kamayun wan sa at amatanganan. 29Ay am siyun fag mata nu gfe asalanan way emu, buli wan ay ukasi wan! Anway amasine yap dewa malyam sik afud am bilug, nu gdi e mukas fagdaul am bilug sas lino afuy. 30Ay am siyun fag take nu gfe asalanan way emu, lifungi wan ay ukasi wan! Anway amasine yap dewa malyam sik afud am bilug, nu gdi e mukas fagdaul am bilug sas lino afuy.”

Isus At Foyungan sa baliwas Tagaubunun at Mangena

(Mat. 19:9; Mar. 10:11-12; Lukas 16:18)

31“Ay ebi e foyungan yangay te, sik mangama nu kaumsig nangubun at mangena, awati yap sik famatuyan sa baliwa nu gudgubunan. 32Ay roro glong aw ayu te, sik mangama fagalay naubun at mangena at fanlonganan nu bunway sa baliwa kamayun, gfe asalanan way at mangena fagalay gdog nafanmangama. Ay nus nga sinu at namangenaan ka fag mangena, kanya kamayun wan.

Isus At Foyungan sa baliwas Tagfatvngvd nu Gelongan

33“Nadungug yangay am at foyungan ebi sa tam ngay aguyangan te, ‘Lag gfatuyanan nu dway am gfagurungan. Fagurungani tuwa ay ngay nafatuyanan sa tam Fun.’#5:33 Lebitiku 19:12; Tap 30:2; Diyuterunumyu 23:21. 34Ay katsi glong aw ayu te, fagalay am gfatvngvd ay longan, lag sak glong te, ‘Tam banwa wan at nasaful ku longan,’ anway tam Diyus sanya wan nu gbanwan. 35Ay lag yangay glong te, ‘Tam daga at nasaful ku longan,’ anway kanya tam Diyus at fagsiyadan. Ay lag yangay glong te, ‘Fulan Erusalem nasaful wan ku longan,’ anway kanya fag fulan Tiba Tungud fag Fun at fulan. 36Ay lag yangay glong te, ‘Dewa ro aw umkate,’ madyay dewa ro sadik buk si am alfuyu wo mafatugbung malagsi ay malayung. 37Ay at masine longi way te, ‘Kin’ nu kin, ay ‘Yaya’ nu yaya, anway nu gfatvngvd am ay longan nu nafamut yay am kayunya, kanya siginan was Satanas.”

Lag Gfafoli nu e Nafagbulun sa Emu at Mauri

(Lukas 6:29-30)

38“Ay nadungug yangay am ebi at foyungan te, ‘Nus nga sinu at mul at tiba mata, e mul yangay at mata; ay nus nga sinu at rumabas at tiba bagang, e rumabas yangay at bagang.’ 39Ay katsi glong aw ayu te, lag nanfagbulun mauri sa at nafagbulun sa ayu at mauri. Fagalay e nafalang am siyun fag fingi, fasalubangi am wala fag fingi. 40Sik taw nu nataban emu sa at ngay tagmagurang, ay sanya nu nabul wan am balukas, foni wan anggan am fagumutanun fag falefe. 41Ay fagalay sik sundalu nafabulun dawdaw emu te, ubanani at fangubaun sik kilumitru, ubai at fangubaun duwak kilumitru. 42Nus nga sinu at nanget emu, foni tuwa. Ay faulbusi tuwa sa at nangulbus sa emu.”

Esugi tuwa Ay ngay Fabarangyan

(Lukas 6:27-28,32-36)

43“Ay nadungug yangay am ebi at foyungan te, ‘Esugi tuwa ay ngay iba, ay alimatai ay ngay fabarangyan.’ 44Ay katsi glong aw ayu te, ‘Esugi tuwa ay ngay fabarangyan. Ay darangini tuwa tagfauri ayu.’ 45Nu nafagbulun tuwam katanya, matuyan te, am wan tam Tama sas banwa at ngay unga. Anway bundi fagtvngvd sa at masine fag taw nu gfadamlag at menit anggan tuwa sat mauri fag taw. Ay nu gfamoyan bundi fagtvngvd sat matuyan fag taw, anggan tuwa sat yud matuyan. 46Go nu kesug wam at takesug ayu, go am way ban at ke fanambagun siginans Diyus? Yaya! Anggan at ngay taget buwis kesug yangay at takesug anya. 47Ay ay fagfamatuwanun nu ay fagwes way fagtvngvd, go e faglabiun yay am tibak taw? Yaya! Anggan at yud gsaful Diyus gfamatuwan yangay at fagwes. 48Nu katanya, faggugat matuyani tuwa kata ay Tama sas banwa nu matuyan.”

Currently Selected:

Matiyu 5: TAWEAST

Highlight

Copy