Matiyu 4

Satanas Igfaskud Isus

(Mar. 1:12-13; Lukas 4:1-13)

1Ay at Masine fag Falad nataban Isus sa sik talun at yud e taw, laman Satanas nanfaskud Isus sanya. 2Ay 40k menit ay 40k yabi Isus nu nafe lungud gyud gfangon laman gdarangin, ay kalunus wa dawdaw. 3Ay at tagfaskud at ngayan Satanas indasug ay glong sas Isus te, “Nu o wa fiya Diyus at Baguwama, awati tuy fag ngay batu sik ngay tinafay.” 4Ay Isus igbalus te, “Sis Diyus at longan marirukan te, ‘Sik taw at faglelegun bundi siginans fakonun fagtvngvd, siginan tuwas Diyus at longan sigon.’ ”

5Ay Satanas nataban Isus sas Erusalem, sik mafilian fag fulan. Ay nafat sanya Isus sas Diyus bale sas tungud fungfung sub. 6Ay iglong sas Isus te, “Nu o wa fiya Diyus at Baguwama, arabangi wa daw, anway marirukan sis Diyus at longan te, ‘Diyus sumugu at ngay tagfabarita laman nantarabang emu. Ay kanya sumangfut emu, laman di o umtuktuk sas wa batu’#4:6 Danyu 91:11-12.”

7Ay Isus igbalus te, “Sis Diyus at longan marirukan te, ‘Lag gfaskud am Fun am Diyus.’ ”

8Ay Satanas nataban yangay fiya Isus sa sik tungud bugsul ngabat dawdaw. Ay nafabantay anya fagayu fagmagurangun sas fagdaul daga, ay anggan at fagmasineun sanya. 9Ay Satanas glong sas Isus te, “Mon kwa sa emu fagayu am nalag nu antuwo sumeg angku.” 10Ay Isus nabalus te, “Loi wan, Satanas, anway sis Diyus at longan marirukan te, ‘Segi am Fun am Diyus. Ay kanyai tuwa am fagfaningun.’ ”

11Ay rodi Satanas naubun wa Isus. Ay sik ngay tagfabarita ndasug laman nantarabang Isus.

Isus nu Gfasigad Igfoyung

(Mar. 1:14-15; Lukas 4:14-15)

12Ay Isus nu nadungug te, Uan Tagfasurung insungsung, kanya nfoli wa sas talun Galiliya. 13Roro kanya wa nabanwan sis fulan Nasaret, si yay fulan Kapernaum nu gbanwan. Kanya fag fulan sis tigyangan Lino Galiliya, sas Sibulun ay Naptali at talun. 14Katanya tuway, in-gurungan Isayas sik taglong at foyungan te,

15“Sibulun ay Naptali at daga, at dalan sa baliwas lino. Gfaday muyudan Safa Urdan.

Ay kanya fag duwak talun sis Galiliya, ay tagbanwan sanya bunwa taw Udyu.

16At ngay taw tagbanwan gugat si sad marum suma wa ban at mason fag mayamag. Ay at ngay tagbanwan sad marum ay kalimu kate madamlagan ban.”#4:16 Isayas 9:1-2.

17Siginan ginanya fag menit, Isus gfasigad wa kamoyung sa sangay taw te, “Ubuni wan ay asalanan, anway makbang wan Diyus nu gmagurang taw.”

Isus Nafili Ufat Tagfanguyang

(Mar. 1:16-20; Lukas 5:1-11)

18Ay kaduge Isus glo sa sangaba tigyangan Lino Galiliya, kanya nalag sik dugsay, Simun, (Simun, tiba nu gngayan Pedru) ay Andres. Ka fag duwama kukas at fanggamat uyang sasad lino, anway at fagbulun wan tagfanguyang. 19Ay Isus nalong sas dugsay te, “Aloi angku. Nanfoyung ban aw ayu nu gfaful am ngay taw, kata nu gamat am uyang katsi.” 20Ay rodi ka fag dugsay naubun wan at fanggamat uyang ay naalo wa Isus.

21Ay sanya ginan, Isus nalo yama sirut nalag yangay fiya sik dugsay, Santiagu ay Uan. Kanya fag dugsay Sebidiyu at ngay baguwama. Ka fag dugsay malunggung sisad balutu gfasine at ngay fanggamat uyang. Ay Isus nagewan yangay ka fag dugsay. 22Ay rodi, kanya naubun wan at balutu ay anggan at tama, ay naalo wa Isus.

Isus Igfoyung ay anggan Igfafiya ngay Taw

(Lukas 6:17-19)

23Ay Isus nalo sas fagdaul Galiliya gfamoyung sa sangay taw Udyu at ngay bale fakafulan. Ay at foyungan sanya at Masine fag Barita sa baliwas Diyus nu gmagurang taw, ay nafafiya nus nge wain at taw at daylan sanya. 24Ay indungug wan Isus at nafagbulun sas fagdaul talun Sirya. Ay ngay taw nataban sas Isus fagayu at ke daylan, dewa nus nga setaw at daylan. Ay anggan at ke mafurat fag falad, ay anggan at mason nu tagatakan at daylan, ay anggan at yud malo. Ay Isus nafafiya tuwa fagayu. 25Ay sik ngay taw ayuwayu naalo wa Isus. Kanya fag ngay taw siginans Galiliya, ay Dekapulis, ay Erusalem, ay tiba yak fulan sis Udiya, ay anggan siginans dife Safa Urdan.

Currently Selected:

Matiyu 4: TAWEAST

Highlight

Copy