Malakyas 3
3
1Dungugani, Yawi at Madaragang at longan te, “Fatsanya aw ku nasugu fag taw laman nanfamasadan ban sa ku ngaba dalan. Ay ay Fun Diyus ay fagfanyaun umdasug way sigad sat bale. Umdasug ay fagfanyaun fiya fiya fag nasugu at nanfagbulun ku fatuyanan.”
2-3Sinu ban at maasungatan gina Diyus kadasug fag menit? Ay sinu ban at maasalubang gina umsure? Kanya kadasug kata sik afuy nu mafafadalusan sik bakal ay kata yangay sik sabun at mafafasine. Ay nanfasine ban at ngay taganyun, kanya Lebi fag fulan taw, kata nu gfadalusan sik pilak ay gintu, laman masine tuwa ban nu gbanwan ay nu ganyun sas Yawi. 4Nu katanya tuwa, Yawi gdog yay umkumsig taw Uda ay taw Erusalem at ngay anyun kata ebi ataw.
5Yawi at Madaragang nalong sa sangay taw Israel te, “Umdasug aw laman nanfatuyan aw te, go sinu ku fagfauriun ay ku yud fagfauriun. Nanfatuyan aw mafali sat ngay mabara, sat ngay takamayun, sat ngay takamuwagan tagfatuyan, sat ngay tagfanluk nu gsali sat ngay tagfagbulun, sat ngay tagfalingun at ngay burangday fag mangena ay ngay ulila, ay sat ngay taw at yud gfalag at fagmasineun sa sangay taw siginan tibak talun. Katanya ku fagbulun ban sa ayu, at yud kalimu angku.”
Nu Gfon at Fasafuluwan
6Yawi at Madaragang nalong yangay fiya te, “Aw wan Yawi at yud ginbalian. Katanya wayay am Akub at kadagdagan ay fagyudun namin. 7Kata way am ay ngay aguyangan; wam nafaning ku ngay suguwan. Ay katsi afolii tuwa sa angku, Yawi at Madaragang, ay tumarabang aw ayu. Ay roro e fagintoun yay am te, ‘Setain nu maafoli ami sa emu?’ 8Ay e fagintoun kyangay sa ayu te, ‘Go masine manga sik taw nu nanfamul sis Diyus?’ Yaya! Wa long umgurungan katanya. Roro kamul way am si angku. Ay roro e fagintoun yay am te, ‘Tain nu kamul ami siginan emu?’ Kamul way am teway wam gfon ay fasafuluwan ay ay ngay anyun sa angku. 9Katanya ku fagnafauriun fagdaul ay talun. 10Roro katsi, glong aw ayu te, ‘Faskudi angku, Yawi at Madaragang. Ubai ay fasafuluwan fagayu sa ku bale at fagfafulan fagmabalanun laman umke fakonun si ku bale. Nu katanya tuwa ay fagbulun, gfamoyan aw, ay ngayu ku famanyun at kumdasug sa ayu. 11Kwa gfabayan ay ngay tanum nu e manrabraban, ay ngay ubas nu gfangarabas at ngay buwadan. 12Ay fagayu taw sa sangay talun fangayan ayu te, sik taguseganan, teway masine gbanwan sa ay talun. Aw wan Yawi at Madaragang tagelongan.’ ”
13Yawi gdog yay nalong te, “Malimata ay longan sa angku baliwa. Roro e fagintoun yay am te, ‘Taw em nafalimatan sa emu baliwa?’ 14Teway glong way am te, ‘We fanambagun nu nanfaning tam sas Diyus. Taw ban at fanambagun nu gfaning tuwa tam at ngay suguwan? Ay taw yangay ban at fanambagun nu gfalag tam sas Diyus te, glodlowan tam mabaluwanan ay nangubun tam tam ngay asalanan? 15Mafalong yay tam daw te, sik tagfandaragang fag taw mabayan tuwa nu gbanwan. Madyay kanya ngap tagfagbulun mauri kabalan tuwa. Ay dewa ka fag ngay taw igfaskud Diyus, wa nafauri anya.’ ”
16Ay rodi, at ngay tagfaning Yawi gsulitanan. Ay Yawi nadungug at ngay nasulitanan. Ay nariruk at ngay ngayan sa at fafil sis Yawi at daga salubangan, laman di kalyam tagfaning anya ay at kintuyan sa anya.
17Yawi at Madaragang nalong te, “Kayunya magbilug akwan gina aw nanfili anya kata sik mafanud fag fagmabalanun. Kafanyu aw anya, katvngvd sik ama nu kafanyu at unga at tagfanfaning anya. 18Nu katanya, at ngay taw gdog yay ban fiya lumag at fagsamanun at masine ay at mauri, ay at fagsamanun tagfaning ay at yud gfaning angku.”
Currently Selected:
Malakyas 3: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
