Malakyas 2
2
At Faurianan sa sangay Taganyun at yud Gfaning
1-2Yawi at Madaragang gdog yay fiya nalong sa sangay taganyun te, “Katatuy ku famatagak sa ayu: nu dway am gdungugan ku longan, ay nu dway am gurunganan gfauseganan angku, gfadasug aw sik faurianan sa ayu anggan sa ay nabul fag ngay famanyun. Ku fagnafagbulunun katanya teway wam gurunganan gfauseganan angku.
3“Dungugani! Katanya way am ay, gfaurianan akwan ay ngay kadagdagan. Ay dumafut aw ay naanyun fag ngay balan at bap sa ay fingi ay mukas kyangay ayu sas fakukasan bap. 4Asafuli tuwa te, nafatagak akwa ayu laman gfatunglusanan ku fatuyanan ebi sa ay aguyangan Lebi. 5Ku fatuyanan sas Lebi, nafatuyanan aw sa anya at kasakan fag leleg ay sik fagmanabayanun, nu antuwa ban gfaning angku. Ay katanya wa fiya at nafagbulun. 6Kanya nafoyung tuwa at matuyan ay bundi sas fakamuwaganun. Masine tuwa at fagmasadiun sa angku ay nu gbanwan matuyan tuwa. Ay ngayu tuwak taw at natarabang laman di gfaning asalanan.
7“At matuyan, am fag ngay taganyun, ay fagbulun, tagfoyung am sa sangay taw sa angku baliwa. Ay at ngay taw dungugani tuwa ayu teway am wan ku nasugu fag ngay taw. 8Roro wam nafaning ku suguwan. Ay nafe asalanan am ngayuk taw siginan ay nafoyungan. Aw wan Yawi at Madaragang, glong aw te, ‘Nafabali wam ku fatuyanan sa ay aguyangan Lebi.’ 9Nu katanya, nafalingun aw ayu ay nafaplan sas fagayu taw at faglagan teway wam nafaning ku ngay suguwan, ay nu gfoyung am e filian way am.”
Taw Israel wa Kasakan
10Malakyas nalong sa sangay taw Israel te, “Go sangay bunwa sadi tam tama? Ay go sangay bunwa sadik Diyus at naawat antam? Taw ro tam fagyudun kasakan sa tam ngay iba. Katanya wayay tam fagbulun, watam nafaning Diyus at fatuyanan ebi sa tam ngay aguyangan.
11“Am fag ngay taw Uda, nafamabo am; mason nu mauri ay fagbulun sis fulan Erusalem ay sis fagdaul talun Israel. Ay nafafurat am Yawi bale at nesugan dawdaw teway ndaduwa am sa sik ngay mangena tagseg sa tibak fagsegan. 12Ay sa sangay tagfagbulun katanya, lag ngayan te, taw Israel, anggan at ngay unga ay at ngay fufu, dewa nanganyun sas Yawi at Madaragang.
13“Ay katatuy ya ay nafagbulun: guyway am gugat gugat sas Yawi fagyagoan teway wa kaumsig ay ngay anyun ay wa guseganan. 14Ay roro e fagintoun yay am te, ‘Taw ro Yawi fagyudun kaumsig?’ Teway Yawi wan at tagfatuyan te, nafabali am ay fatuyanan sa ay mangena ay naadaduwan ebi gina am baguwama. Nafabali wam ay fatuyanan te, kasakan tuwa ban am sa ay faduwan. 15Go sangay bunwa Diyus at nafasadi ayu laman ban si anya? Taw ro at fagnafasadiun ayu? Teway at fakaumsigun umke ngay sisiyan tuwam tagafanud. Ay fatuyani te, di am gfabali ay fatuyanan sa ay mangena ay naadaduwan ebi gina am baguwama. 16Anway Yawi, taw Israel at Diyus nalong te, ‘Dakwa kaumsig sik daduwa nu gudgubunan. Sik ama nu gubun way at mangena, malimata way sa anya.’
“Nu katanya matuyani tuwa te, di am gfabali ay fatuyanan sa ay mangena.”
Yawi nu Gfaurianan fag Menit
17Malakyas gdog yay fiya nalong sa sangay taw Israel te, “Yawi kalimata wa dawdaw ay ngay elongan. Ay roro e fagintoun yay am te, ‘Taw sangay em naelongan at nafalimatan anya?’ Glong am te, ‘Dewa tam fagbulun mauri way Yawi kaumsig tuwa ay guseganan.’ Ay gfalingun yay am gelongan te, ‘Dada wan katsi at matuyan fag Diyus?’ ”
Currently Selected:
Malakyas 2: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
