Lukas 2

Isus nu Kasalug

(Mat. 1:18-25)

1Ginanya fag ngay menit, talun Ruma at fun fiya fiya at ngayan Agustus. Kanya nasugu te, “Riruki fagayu taw at ngayan si ku fagmagurangan fagdaul.” 2(Ginanya yay at taguna nu griruk, gina Kirinyu at gubernadur sis talun Sirya. 3Ay fagayu taw noli yay sat fulan mandi, laman nanfariruk at ngay ngayan.)

4Ay Use nalo wan siginans fulan Nasaret sis Galiliya fag talun, ay indasug sas talun Udiya, sas fun Dabid at fulan, at ngayan Betleem. Anway Use, fun Dabid at kadagdagan at sadi. 5Ay Use nataban wan at fasad ban mangena Maria, laman nanfariruk at ngayan sanya. Ginanya Maria gfafiyon wan. 6Ay kaduge sanya, indasug wan at lungud Maria nu gfasalug. 7Ay kanya nafasalug at turungana sik ama, ay naumut, ay nafatungkud sisad fagfafangonan balan, teway at fakadasugan fag ngay bale nkapnu wan.

Sik ngay Tagtanud Tupa Nalag Diyus At ngay Tagfabarita

8Sa sangaba day fulan Betleem e fagfasabsaban balan, ay sanya e ngay tagtanud tupa gtanud at ngay tupa kaba yabi. 9Ay tam Fun Diyus at tagfabarita at sadi insure sa ka fag ngay tagtanud, ay tam Fun Diyus fagmasineun nadamlag sat ngaba dayu. Ay ka fag ngay tagtanud matvngvd dawdaw nu kalimu. 10Ay ka fag tagfabarita nalong te, “Lag kalimu, iste aw laman nanfoyung sa ayu sik masine fag barita, ay sik fagusegananun ban dawdaw sas fagayu taw. 11Anway ay Tagfalangfe katsi nsalug wan sas fun Dabid at fulan. Ay kanya tam Fun Isus, tam Diyus at nafili. 12Ay katatuy ay fagsafulan: Lumag ro am anya nu maumutan ay matagilid sisad fagfafangonan balan.”

13Ay rodi tv, insure sik ngay tagfabarita ayuwayu. Gfasfuwan ka fag tagfabarita at sadi, kanya fagayu gseg Diyus te,

14“Segi tam Diyus sas banwa.

Ay sas daga e fagmanabayanun sas Diyus at fakesugun fag ngay taw!”

15Ay ka fag ngay tagfabarita nu noli wa sas banwa, ka fag ngay tagtanud glodlongan te, “Bastam. Glo watam sas fulan Betleem laman nanlag watam at kindasug, tam Fun Diyus nafoyung antam.” 16Ay ka fag ngay tagtanud gasubuwan way ngap nu glo, ay nu ndasug nalag wa fiya Maria ay Use, ay anggan at ngenge at matagilid sisad fagfafangonan balan. 17Ay kanya nu nalag wan, nafoyung at nadungug sa baliwa at ngenge. 18Ay fagayu at nadungug sa ka fag ngay tagtanud at longan, nadulawan dawdaw. 19Ay Maria di kalyam aro ataw fagayu at nadungug, ay faggugat gamatangan tuwa anggan at masuwad. 20Ay ka fag ngay tagtanud tupa noli wan. Ay igseg sas Diyus anway at nadungug ay at nalag, kata wa fiya ka fag tagfabarita nalong.

At Magurang Nafangayan Isus

21Nu ndasug wan at fawaluk menit, at magurang nafaning wa taw Udyu at ugali nu gtuli. Ay ginanya gfangayan wa at ngenge te, Isus. Igfaning at tagfabarita at fangayanan ebi ataw gina yay gyud gfafiyon.

At Magurang Naubanan Isus sas Diyus Bale

22Ay indasug wa ka fag menit nu gfaning Muisis at longan sa nu gfasine at tina ay anggan at ngenge, Use ay Maria nauba Isus sas Erusalem laman nanfaagbilug anya sas Fun Diyus. 23Anway marirukan si tam Fun Diyus at Suguwan te, “Fagayu at turungana fag ama, sis Diyus way.” 24Ay at magurang nafon sik anyun, igfaning sa tam Fun Diyus at Suguwan te, “Duwak malabyung ay ate duwak linatad riyangan.”

Simyun Naseg Isus

25E sik mangama sis Erusalem at ngayan Simyun. Kanya sik matuyan fag taw ay sik tagseg Diyus, ay gfanya tuwa gugat at tagfalangfe taw Israel. Ay at Masine fag Falad igmagurang Simyun, 26ay nafoyung anya te, “Ya ban o mkate yap ngay ban o nalag tam Fun Isus, Diyus at nafili fag fun.” 27Ay at Masine fag Falad nafaamatanganan Simyun laman lumo sas Diyus bale. Ay ginanya Maria ay Use nauba at ngenge sanya, laman nanfaagbilug sa tam Diyus, gfaning Muisis at longan. 28Ay Simyun nasalilian Isus, ay naseg Diyus te,

29“Ku Fun Diyus, katsi long masine wan nu kate aw manabayan, am fanuguwan, anway in-gurungan wan am nafatuyanan sa angku,

30anway nalag kwan am nafon fag Tagfalangfe,

31am nafamasadan sas fagayu taw.

32Kanya sik salung sas yud Udyu fag ngay taw.

Ay anggan tagfon fagmasineun sa am ngay taw Israel.”

33Ay Isus at tama ay at tina naylatan Simyun longan sa baliwa at ngenge. 34Ay Simyun nadarangin ka fag talanan. Ay nafoyung yangay sas Maria te, “Amatangani, tuy fag ngenge at fagbulun, tibak taw Israel wa gafanud ay tiba gafanud tuwa. Tuy fag ngenge sik fagsafulan. Ay ngayuk taw lumong ban mauri sa anya baliwa. 35Ay anggan o, kabalu way ban o, kata nu ntubuk o sik fiso. Ay kanya nanfasure yangay ban ngay taw at amatanganan at mauri.”

Ana Naseg Diyus

36Sanya yangay Ana, Diyus at taglong at sadi, Fanuel at baguyna, siginans Asir fag fulan taw. Ana mafufuyna wa dawdaw ay fitu wayk banwa nu madaduwaan, at mangama nkate wan. 37Ay katsi sik burangday#2:37 burangday: Sis Faniganun, balo. way. Ay at banwa 84 wan. Ay kayu menit ay yabi kanya si was Diyus bale gfe lungud gyud gfangon laman gdarangin. 38Ay ginanya Ana nkakbang yangay sas Use ay Maria, ay nauseganan sas Diyus. Ay anggan nafoyung sas Isus baliwa sas fagayu tagfanya Diyus nu gfalangfe fulan Erusalem.

39Ay Use ay Maria nu ntabu wa nu gfaning fagayu at marirukan sa tam Fun Diyus at Suguwan, noli wa sat fulan mandi sas Nasaret, sis Galiliya fag talun. 40Ay at ngenge kadaul ay kabitsug. Ay manga sik mamatanganan tuwa. Ay Diyus gtarabang anya.

Isus sis Diyus Bale

41Kayu banwa Isus at magurang glo wa gugat sas Erusalem gina e fagmafulun sa baliwas Tagfabarita nu Glangfe. 42Ay Isus at banwa nu anwa 12, talanan nalo wa sas Erusalem, kata ebi at ugali. 43Ay nu ntabu wan at fagmafulun, Isus at magurang ay anggan at ngay iba noli wan. Ay roro Isus naguyanan yay sis Erusalem, ay at magurang wa nasaful te, dada wan. 44Ay gamatangan te, nu ndain Isus naalo sa tibak taw taguli. At magurang nu glo fagngabak menit. Ay rodi gsarap wa Isus sa at ngay kalongan, ay ate sa at ngay iba. 45Ay at magurang nu dway nalag Isus, infoli yay sas Erusalem laman nansarap yay sanya. 46Ay sis fatuluk menit at magurang bagu nalag Isus sis Diyus bale, gfasalubangan malunggung ngay tagfoyung Muisis at Suguwan. Ay Isus at fagbulun sanya igdungugan ay gfanginto. 47Ay fagayu at nadungug Isus at longan nadulawan dawdaw sat fagsafulun ay at ngay famalus. 48Ay at magurang nu nalag Isus, nadulawan. Ay at tina ginto Isus te, “Taw ro fakatanyaun am fagbulun? Gafanawa wami dawdaw nu gsarap ami emu!” 49Ay Isus nabalus te, “Taw ro ngani ay fagsarapun angku? Go sangay wam gsaful te, masine nu ste aktuwa gugat si ku Mama bale?” 50Ay at magurang wa nasaful Isus at longan at masuwad.

51Ay Isus gfaygaluwan wa at magurang guli sas Nasaret. Ay kanya gfaning tuwa at magurang at longan. Ay at tina gamatangan faggugat takatanya fagayu. 52Ay kaayu tuwa Isus at fagsafulun. Ay manga at bilug indaul wan. Ay matvngvd tuwa Diyus ay anggan ngay taw nu guseganan anya.

Currently Selected:

Lukas 2: TAWEAST

Highlight

Copy