Lukas 15

Isus At Fafaskudanan sa sik Tupa at Nalyam baliwa

(Mat. 18:12-14)

1Sik menit, at ngay taget buwis ay anggan at ngay tagasalanan inkakbang sas Isus laman nandungugan. 2Ay taw Parisiyu ay ngay tagfoyung Muisis at Suguwan kalimata ay gibugan sit dayu te, “Ka fag taw gfasakbo ngay tagasalanan ay gfasfuwan anya gfangon!”

3Ay nu katanya, Isus nafafaskudanan te, 4“Sik taw nu e 100k tupa, ay at sadi nu nalyam way, kanya gubun yay at 99 sas talun at yud e taw laman nansarap at sadi at nalyam. 5Ay nu nalag tuwa long guseganan dawdaw gfasanan guli. 6Ay nu ndasug wa sat bale, nagewan yay at ngay iba ay anggan at ngay fagwes. Ay nalong te, ‘Useganani fasfuwani angku, anway nalag akwan ku tupa aro at nalyam.’ ” 7Ay Isus nafamut te, “Katanya yangay sas banwa, glabi yay nu guseganan sa at sadik tagasalanan nu naubun tuwa at asalanan, ay sangap daw at 99k taw tagamatangan te, ‘Wami e fagubunun em asalanan.’ ”

Isus At Fafaskudanan sa sik Singku at Nalyam baliwa

8“Sik mangena nu e safuluk salafi, ay at sadi nu nalyam, kanya nasulsul at salung, ay nalanu at bale ay igsarap dawdaw yap ngay nalag. 9Ay nu nalag wan, kanya nafaful at ngay iba ay anggan at ngay fagwes te, ‘Useganani fasfuwani angku, anway nalag akwan ku salafi aro at nalyam.’ ” 10Ay Isus nafamut te, “Katanya yangay sas banwa. Guseganan dawdaw Diyus at ngay tagfabarita dewa sadik tagasalanan nu naubun tuwa at asalanan.”

Isus At Fafaskudanan sa sik Baguwama at Kinyayu

11Ay Isus nafafaskudanan yangay te, “Ebi e sik mangama at baguwama duwa. 12Ay at fuyu nalong sat tama te, ‘Mama, foni wa angku am fagagbilugun am fagafonun sa angku!’ Ay at tama nafaafudan wan fagayu at fagafonun sat baguwama fag duwa. 13Ay bandi tv, at fuyu nafabili wan fagayu at tama nafon anya, ay nalo wa sas tibak talun ngayayu. Ay nu ndasug wa sanya, kanya gsali wan fagayu sat ngay fagalabianun. 14Ay nu namin wa fagayu at singku, bandi inke fanlunus mason sanya fag talun. Ay ka fag baguwama gatakan dawdaw. 15Katanya wayay, ka fag baguwama nkakbang sa sik taw sanya fag talun. Ay ka fag taw nasugu anya laman nanfatongan at ngay butan. 16Ay katvngvdan ka fag baguwama nu kalunus kaumsig wa kon at fatongan butan, teway we gfon anya at fakonun. 17Ay bandi ka fag baguwama gamatangan te, ‘Sa ku mama at ngay fanuguwan ngayu tuwa at fakonun, ay e sawad yay. Ay aw ste, katvngvdan aw kalunus gakateun kwan. 18Nu katanya, umfoli kwa siring sa ku mama, ay nanlong ban aw sa anya te, “Ku mama, nasalan aw sas Diyus ay anggan sa emu. 19Ay wa masine nu gngayan o angku te, am baguwama. Amatangani way ban angku te, aw at sadi am fanuguwan.”’ 20Ay ka fag baguwama noli sat tama. Ay dewa ngayayu, at tama nabantay wa anya ay kafanyu dawdaw. Ay matarung nu nkakbang sa at baguwama, ay nagafus ay naayuk. 21Ay at baguwama nalong sat tama te, ‘Ku mama, e nasalan aw sas Diyus, ay anggan sa emu. Ay wa masine nu gngayan o angku te, am baguwama.’ 22Ay at tama nasugu at fanuguwan te, ‘Talayuni! Fastei at tiba tungud at masine fag balukas, ay fabalukasani sa ku baguwama. Ay fasuluni sik fanumyu sit sumyu ay sik sinilas sit darafa. 23Ay buli tam nafataba fag baka lawis ay fatei, ay nangasfuwan tam nanguseganan. 24Anway tuy ku baguwama, ebi kata sik kinkate, ay katsi kata nu gdog yay gleleg. Ay ebi kanya nalyam wan, ay katsi nalag kyay.’ ” Ay kanya fagayu gfasigad guseganan.

25“Ay ginanya, ka fag mama at baguwama at turungana sa yays gamasun. Ay nu guli wan ay nu kakbang wa sat bale, ka fag turungana nadungug nu gfauni ngay famaawangan ay at ngay taw garingang ayuwayu. 26Ay nu katanya, nagewan sik fanuguwan ay ginto te, ‘Taw ro at ngay taw fagaringangun ayuwayu?’ 27Ay ka fag fanuguwan nabalus te, ‘Am ariyan indasug wan. Ay am mama nafate at nafataba fag baka lawis anway am ariyan infoli yay we fanlonganan at bilug.’ 28Ay at turungana kadotama dawdaw ay wa gasakboun sasad bale. Ay at tama nalaklo laman nanfalukmeanan at turungana ay nanfasakbo. 29Ay at turungana glong sat tama te, ‘Amatangani, ngayu wak banwa nu gfaning aw emu. Ay dakdi batang kamabo emu. Ay dewa katanya, wo batang nafon angku nus di sadik kambing lawis, laman nanguseganan aw gfasfuwan ku ngay fagsud. 30Ay kanya, am fuyu, ebi at nafamin am ngay fagagbilugun sat ngay fakamayunan fag mangena. Ay kanya nu ndasug wa ste, nafate tuwo tam nafataba fag baka lawis.’ 31Ay at tama gbalus te, ‘Sama, faggugat si tuwo angku. Ay fagayu ku fagagbilugun, anggan wa emu. 32At tagtungul ta fagbulun guseganan yakman tam, anway ebi am ariyan kata wa nkate, ay katsi gleleg yay. Ay ebi kanya kata wa nalyam, ay katsi ste tuwa!’ ”

Currently Selected:

Lukas 15: TAWEAST

Highlight

Copy