Lukas 14

Isus Nafafiya sik Ama Mabaga at Bilug

1Sik Fakamatoun fag Menit, Isus nasakbo sa sik taw Parisiyu at tagfangguna bale laman gfangon sanya. Ay ngay taw sanya gulit Isus. 2Ay sanya sas Isus at daga salubangan sik ama mabaga at bilug. 3Ay Isus ginto sanya fag ngay tagfoyung Muisis at Suguwan ay sa sangay taw Parisiyu te, “Go sik taw nu gfafiya at ke daylan sis Fakamatoun fag Menit, gfaning tuwa tam Suguwan, ay go yaya?” 4Ay kanya fag ngay taw wa gbalus. Ay rodi Isus nated at ke daylan ay nafafiya ay anggan nafalo wa anya. 5Ay Isus ginto sa ka fag ngay taw te, “Go ay sisiyan nu mtong ay ate ay baka sasad tabyu sis Fakamatoun fag Menit, go wam nanbul mafali?” 6Ay we mafabalus at fagintoun.

Isus At Foyungan sa Tagfababaun baliwa

7Ay Isus nu nalag te, at nagewan fag ngay taw gfili at masine fag ngay faglunggungan sis fagmafulun, kanya nafoyung sanya fag ngay taw sik fafaskudanan. Glong te, 8“Fagalay e nagewan emu sa sik fagfadaduwaan, lag o malunggung sat mafilian fag ngay faglunggungan, labon manga e nagewan yay glabi emu. 9Ay at nagewan ayu fag duwa umkakbang sa emu ay lumong te, ‘Alini yap o. Tuy tuwa fag taw tagmalunggung sanya.’ Ay nu katanya, kapla way o galin sa tiba daga fag faglunggungan. 10Ay roro fagalay e nagewan emu, nu malunggung o sai way tiba daga fag faglunggungan, laman at nagewan emu nu nkakbang sa emu ay nalong sa emu te, ‘Sama, stei tuwa sit mafilian fag faglunggungan.’ Ay fagayu at lumag katanya, sumeg emu. 11Sik taw nu gfandaragang way at longan ay anggan at fagbulun, bandi ban e fababa way anya. Ay roro sik taw nu nafababaun tuwa at longan ay anggan at fagbulun, bandi ban e faabat tuwa anya.” 12Ay Isus nalong yangay sa at nagewan anya te, “Fagalay o nan-gewan nantangalian ay ate nanyafun sam bale, lag nan-gewan fagtvngvd am ngay fagwes, ay am ngay fadugsay, ay am ngay kalongan, ay anggan am ngay fasabale at mabalan. Anway bandi kanya nan-gewan yangay emu, ay nanfafoli yangay ban sa emu ebi ataw am nafagbulun. 13Nu katanya, fagalay o kamasadan sik ngay fakonun, gewani at yud e kwa fag ngay taw, ay at yud mafalelegan at take fag ngay taw, ay at yud malo fag ngay taw, ay anggan at yud glag fag ngay taw. 14Ay nu katanya, e mamanyun ban emu. Kanya fag ngay taw wa ban mafafoli sa emu ebi ataw am nafagbulun sa anya, ay roro bandi ban e fafoli yay sa emu, kaduge ban at matuyan fag ngay taw gdog yay gleleg.”

Isus At Fafaskudanan sa sik ngay Fakonun Ayuwayu

(Mat. 22:1-10)

15Ay at sadi at malunggung sis day fagfangonan nu nadungug Isus at longan, nalong sas Isus te, “Guseganan tuwa ka fag taw nu nanfangon ban sas Diyus at fagmagurangan taw!” 16Ay Isus nalong te, “Ebi e sik taw nafamasadan sik ngay fakonun ayuwayu ay nagewan ngayuk taw. 17Ay nu ntama wan, kanya nasugu at fanuguwan sa ebi ataw at nagewan fag ngay taw laman nanlong te, ‘Adasugi wan. Nafamasadan wan fagayu.’ 18Ay fagayu at faggewanun gsudan way e nasalaganan. Ay taguna at nagewan glong te, ‘Bagu akway nabili ku daga, ay nanlag kyay ro sanya. Ay get aw sa emu te, lag kalimata angku.’ 19Ay at sadi nalong te, ‘Bagu akway nabili ku safuluk baka, ay nanfaskud akyay te, go masine tuwa nu garadu. Ay get aw sa emu te, lag kalimata angku.’ 20Ay at sadi nalong te, ‘Bagu kway indaduwa ay kwa ro sumanya.’ 21Ay ka fag fanuguwan noli wan ay nafoyung fagayu sat fun. Ay at fun indotama dawdaw nu nadungug at fanuguwan at longan, ay nalong yangay sat fanuguwan te, ‘Loi yangay mafali sa sangay dalan daul ay sa sangay dalan sirut sa tam fulan fagdaul, ay tabani at yud e kwa fag ngay taw, ay at yud mafalelegan at take, ay at ngay yud glag, ay anggan at ngay yud malo.’ 22Ay at fanuguwan nu nfoli wan, nalong te, ‘Ku fun, nafaning akwan am longan. Ay ya nkapnu am bale.’ 23Ay ka fag fun nalong sat fanuguwan te, ‘Loi yangay sa sangaba day fulan fag ngay dalan, ay fabuluni tabani stiye sanya ginan am nalag fag ngay taw, laman umkapnu ku bale.’ 24Glong aw ayu te, aro ku nagewan fag ngay taw, nus di sadi, we mafaon ku nafamasadan fag ngay fakonun ayuwayu.”

Nu Gfaning Tam Tam Fun Isus

(Mat. 10:37-38)

25Ngayuk taw nangalo Isus gina glo sas Erusalem. Ay Isus inbiling ay nalong te, 26“Sik taw takesug at tama, ay at tina, ay at mangena, ay at ngay sisiyan, ay at ngay fadugsay, ay dewa at leleg mandi, nu glabi way nu kesug angku, kanya bunwa ku tagadal. 27Ay nus nga sinu nu dway mandi gfasan at salibagan kayu ay nangalo angku, kanya bunwa ku tagadal.#14:27 At masuwad: Nus nga sinu at yud gfaning angku teway kalimu kate, kanya bunwa ku tagadal. 28Nus nga sinu am, nu kaumsig am nangawat sik bale ngabat, nangamatangan yay am taguna te, ‘Go ban insak tuwa ku fansali ay gfatabu aktuwa ban?’ 29Anway nu nafasigad wo naturuk, ay nu dway o nafatabu, fagayu taglag gfalingun emu te, 30‘Kanya fag taw, dewa nafasigad, wa mangaro mafafatabu at bale.’ 31Sinu fag fun tagamatangan nanfabarangyan sa tibak fun at yud namatangan te, ‘Tain ban nu mabo tam ka fag fun at ngay sundalu, anway tam sundalu 10,000k way, ay ka fag fun at sundalu 20,000k tuwa?’ 32Ay ka fag fun nu gamatang galabawan way, kanya sumugu sik ngay fanuguwan sa tibak fun, kaduge at tibak fun at ngay sundalu ngayayu, laman matvngvd nu nanget te, ‘Tain ban tam fagbulun laman manabayan tuwa ban tam?’ 33Ay nu katanya, at yud naubun fagayu nus nge wain, kanya bunwa ku tagadal.”

Isus At Fafaskudanan sa sik Asing baliwa

(Mat. 5:13; Mar. 9:50)

34“Masine sik asing. Ay roro sik asing nu dway e tamis, tain ya ro nu gdog yangay tam gfatamis? 35Ka fag asing nu dway e tamis we fanambagun dewa sas tanum ay dewa sas gamasun. E mukas wan. Nus nge sinu gdungugan, amatangani tuwa!”

Currently Selected:

Lukas 14: TAWEAST

Highlight

Copy