Lukas 12

Isus Gfatagak Sat ngay Tagadal

(Mat. 10:26-27)

1Kadugenya, sik ngay taw ayuwayu ndasug sas ke Isus, at kayuwan gsidsiyadan wa tiba. Ay Isus glong sat ngay tagadal te, “Tagaki taw Parisiyu tagfalaganan at ugali, manafaningan am. 2Nus nge wain at masuksukan katsi, e sumaful yay ban. 3Nu katanya, ay nalong sad marum, e fasure ban sasad mayamag. Ay naibug sisad suluk, e muro yay ban sas wa bilug fulan.”

Sinui tuwa Tam Fakalimuun

(Mat. 10:28-31)

4“Ku ngay fagwes, glong aw ayu te, lag kalimu tagfate ay bilug, ay nu nafate wan kabat wan niya. 5Ay gfatagak aw ayu te, tuyi tuwa ay fakalimuun: Alimui Diyus at ke fagmadaragangun gfate ay bilug, ay anggan mukas ay falad sad lino afuy. Kin, iglong aw ayu te, alimui wa fiya anya. 6Sik maya at fansali, wa ngayu, go kin? Dewa katanya, Diyus di kalyam nus di sadik maya. 7Ay anggan ay buk fagayu Diyus mafatap tuwa. Nu katanya, lag kalimu, anway ay kamafanudan, glabi yay am fiya fiya sik ngay maya.”

Nu Gfoyung Tam Isus sa sangay Taw

(Mat. 10:19-20; 10:32-33; 12:32)

8Iglong aw ayu te, “Sik taw nu nafoyung tuwa tiba te, ‘Aw, gafanud aw sas Isus,’ anggan aw, Taw at Baguwama, gfoyung akyangay ban sas Diyus at ngay tagfabarita te, ‘Kanya ku taw.’ 9Roro ngap, kanya fag taw nu kamayud way angku katsi sa tiba, anggan aw kamayud akyangay ban anya sas Diyus at ngay tagfabarita. 10Ay nus nga sinu at ke mauri fag longan sa angku, Taw at Baguwama, baliwa, mafafalyam tuwa. Ay roro nus nga sinu at ke mauri fag longan sa at Masine fag Falad baliwa, wa mafafalyam.

11“Ay dewa e nataban ban ayu sa sangay taw Udyu at ngay bale fakafulan, ay sat ngay fun, ay anggan sat ngay tagmagurang, lag am gafanawa te, ‘Tain ro siring ku famalus? Ay tain manga ro ku longan?’ 12Anway ginanya ro at Masine fag Falad moyung yay ayu at malungud ay famalus.”

Sik Mabalan fag Ama at yud Mamatanganan

13Ay sanya ginan sas wa taw, e sik taw nalong sas Isus te, “Em Takamoyung, longi sa ku fadugsay te, ‘Foni yap angku ebi em tama at nanuranan tiba.’ ” 14Ay Isus nabalus te, “Sama, go sangay sik tagbuknga#12:14 tagbuknga: Sis Faniganun, hukom. aw, ay ate sik takafud ay nanuranan?” 15Ay rodi Isus nalong sa sangay taw tagsanya te, “Tagaki tuwa laman ay amatanganan di gyafaayuun, anway sik taw at nanuranan wa gfaaba at leleg, dewa ngayu dawdaw at nanuranan.” 16Ay Isus nafafaskudanan te, “Ebi e sik taw mabalan. Ay siginan at tanuman, ngayu at naani. 17Ay ka fag taw gamatangan te, ‘Tain ban ku fagbulun? Kwe fagfasakboan ku ngay naani.’ 18Ay kanya namatangan te, ‘Rumasras akyay fagfafulan fag ngay bale, ay nangawat akyay glabi yap kanya, ay gfasakbo aw sanya ku ngay naani ay anggan ku ngay nanuranan. 19Ngayu ku nanuranan katsi. Sak wan, dewa ban ngayuk banwa kamato kway, ay gfangon, ay ginum, ay gfanabayanun.’ 20Ay Diyus nalong anya te, ‘At yud mamatanganan! Katsi ro sad yabi umkate wo. Ay nu katanya, dada ban fagayu am nasandig fag ngay nanuranan, am fasadan sa way emu mandi?’ 21Katanya sik taw takaumsig nangabalan at fakadasugan, ay roro Diyus nu glag wa ngap mabalan.”

Isus At Foyungan sa baliwas Fagafanawaun

(Mat. 6:25-34)

22Ay Isus nalong sat ngay tagadal te, “Nu katanya, lag gafanawa te, daginan ban ay fakonun, ay daginan ban ay balukas. 23Anway ay leleg at kamafanudan glabi yay sa sik fakonun ay sik balukas. 24Amatangani nu kin, sik ngay uwak. Kanya wa gtanum, ay wa gani, ay wa gfaful sas bale fagfafulan. Ay dewa katanya Diyus gfaon tuwa. Ay glabi yay sa sangay uwak nu mafanud am. 25Go sangay nu gafanawa tuwa ro am, mafafamut yay am ay leleg te, sadi yak menit? 26Ay nu dway am mafafagbulun takatanya fag fagbulun sirut, taw ro ay fagafanawaun sa ay fakaumsigun tiba? 27Linggati nu kin, nin fag ngay sariksik, madyay kadaul tuwa mandi. Ay wa gfagbulun ay wa kawat at balukas. Ay iglong aw ayu te, dewa Sulumun sik takadungug dawdaw fag taw, we nasulun at namasine fag balukas katvngvd kanya fag ngay sariksik nu masine. 28Diyus nafatugbung ngay funfun at ke sariksik sa sangaba talun laman masine nu kalag. Dewa at ngay makmak melo katsi, balabag ban mukas wa sasad afuy. Ay am, glabi yay am sik funfun, madyay Diyus nafon tuwa ayu ay balukas. Go kin? Am mangaro sik ngay taw way am at yud matvngvd at fagafanudun! 29Nu katanya, lag gafanawa te, daginan ro ay fakonun. Ay daginan ro ay fanginum. Nus nge wain dangay gafanawa. 30Anway fagayu taw sas fagdaul daga at yud gafanud sas Diyus, at fagsarapun fiya fiya tagste way fagayu takarasras. Ay ay Tama gsaful wa gugat ay fagayudanun nus nge wain. 31Nu katanya, fagunai tuwa nu kaumsig am sas Diyus at fagmagurangan, ay kanya mon wa long fagayu nus nga setaw ay nayudanan.”

Fagmabalanun sas Banwa

(Mat. 6:19-21)

32“Lag am gafanawa, dewa am yud ngayu at maful, anway ay Tama at fakaumsigun gmagurang ban am sat fagmagurangan. 33Fabilii ay nanuranan ay foni ay ba singku sa sangay yud e kwa, laman umke nafaful ban am nanuranan sas banwa. Sanya di kadan ay di kamin, ay di e kamul gsakbo. Ay anggan di e dafang at nanfamin. 34Nus nganday ay fagmabalanun, sanya yangay ay amatanganan.”

At Matagakan fag ngay Fanuguwan

35“Mafamasadani tuwa gugat. Ay lag gfalayung ay salung. 36Faningi tuwa kata sik taw tagfanya at fun nu kadasug siginans fagfadaduwaan, laman nu e naatuk wa at dingding sakbawan mafali tuwa nu gluwang. 37Guseganan tuwa ka fag ngay fanuguwan nu antuwa mafuluwan gina at fun kadasug. Matuyan iglong aw ayu te, at fun nanfamasadan ay nanfalunggung at ngay fanuguwan sa at fagfangonan, ay nanfon anya at yafun. 38Ay at fun nu ndasug dewa nus nga ginain fag lungud nu glag at ngay fanuguwan nu mafuluwan tuwa, guseganan wa fiya ka fag ngay fanuguwan. 39Ay nasaful watam te, sik tagbilug bale nu nasaful way te, go ginain fag lungud at takamul nu kadasug, kanya wa ro gfabayan nu e sumakbo sat bale. 40Katanyai yangay anggan am. Mafamasadani tuwa gugat, anway nu kadasug aw, Taw at Baguwama, gina way ban am yud matagakan fag lungud.”

Sik Fanuguwan at Matuyan ay at yud Matuyan

(Mat. 24:45-51)

41Ay Pedru ginto sas Isus te, “Em Fun, go am fagfafaskudanun ami wan, ay go sas fagayu taw tuwa?” 42Ay tam Fun Isus nabalus te, “Katatuy at matuyan ay at mamatanganan fag fanuguwan: At fun nalong anya te, ‘Tanudi ku ngay fanuguwan ay fafangoni tuwa anya gina sis fanfangonan.’ 43Ay bandi guseganan tuwa ka fag fanuguwan gina at fun indasug ay nalag te, ‘Ku fanuguwan gfaning tuwa mangaro ku longan fagayu.’ 44Ay matuyan iglong aw ayu te, ka fag fun nafatanud wa sanya fag fanuguwan fagayu at ngay nanuranan. 45Ay roro ka fag fanuguwan nu gamatangan way te, ‘Iglugo yay ku fun nu kadasug.’ Ay kaduge at fun yud sanya kanya gfalang way at ufud fag ngay mangama ay mangena. Ay manga gfangon way ay ginum fangaranug. 46Ay roro sik menit at fun umdasug ban gina at fanuguwan yud gtagak fag lungud. Ay at fun gfauri ban ka fag fanuguwan, ay faful wa ban sas mauri fag ngay taw.

47“Sik fanuguwan at nasaful at fun fakaumsigun, ay roro wa gfaning, kanya ban e malang gugat gugat anya. 48Ay roro sik fanuguwan at yud nasaful at fun at fakaumsigun, ay gfagbulun way mauri, e malang yangay ban anya, ay roro di ban matvngvd. Anway at nafon nu ngayu, ngayu yangay ban at fagetun siginan anya. Ay at nafon nu ngayu dawdaw, ngayu yangay ban dawdaw at fagetun siginan anya.”

Isus At Fagnastiyeun Nanfasadsamanan way at ngay Taw

(Mat. 10:34-36)

49Ay Isus nalong te, “Ku fagnastiyeun nangubanan aw sik afuy ste swa daga. Ay ku fakaumsigun gigang tuwa gugat. 50Ay bagu umgurungan katanya, ngayu yayk mataka ku fagdalanun. Ay kwa ban ganabayan yap ngay umtabu katanya.

51“Go gamatangan am te, ku fagnastiyeun nanfanabayan aw at ngay taw ste swa daga? Yaya, bunwa katanya! Iglong aw sa ayu te, ku fagnastiyeun, nanfasadsamanan akway at ngay taw. 52Sik bale at taw nu lima, at tulu gfaringangan ban sat duwa. Ay at duwa gfaringangan ban sat tulu. 53Katatuy at fagnasadsamananun ban: Sik mama gfaringangan sat baguwama. Ay sik baguwama gfaringangan sat tama. Ay sik mina gfaringangan sat baguyna. Ay sik baguyna gfaringangan sat tina. Ay at nugangina gfaringangan sat nugang fag mangena. Ay at nugang fag mangena gfaringangan sat nugangina.”

Asafuli at ngay Takagurungan Katsi fag ngay Menit

(Mat. 16:2-3)

54Ay Isus nalong yangay sa sangay taw te, “Nu nalag am sik linyabu marum nu kasure siginans fakayabian, glong wam daw te, moyan ro, ay gmoyan wa fiya. 55Ay nu e abagat wan, glong am te, sumudyang ro, ay gsudyang wa fiya. 56Am, sik ngay tagfanluk way am! Nasaful wam at fagsafulan sa tam daga ay sa tam kiwang. Ay roro taw ay fagyudun gsaful takagurungan katsi fag ngay menit?”

Isus At Foyungan sa baliwas Takadotama

(Mat. 5:25-26)

57“Taw ro ay fagyudun gfafidfilian te, inday at matuyan fag fagbulun? 58Kaduge o glo gfaygaluwan takadotama emu sas tagbuknga, gina am sa sangaba dalan, fasinei wan ay fanlonganan, laman takadotama emu wa fasa fadasug emu sas tagbuknga. Ay laman tagbuknga wa fasa fadasug emu sat tagtanud sungsungan, ay sumungsung emu. 59Glong aw sa emu te, wa long o malfas siginan at sungsungan yap ngay ban o fasali am naasalanan fagayu.”

Currently Selected:

Lukas 12: TAWEAST

Highlight

Copy