Uan 21

Isus Insure sat Fituk Tagadal

1Bandi daw sik menit, Isus gdog yay insure sat ngay tagadal sas tigyangan Lino Tiberias. Katatuy nu kasure: 2At ngay tagadal at maful sanya: Simun Pedru, ay Tumas (tibak taw nu gngayan Tumas, Kambal), ay Natanael, kanya taw Kana sis Galiliya fag talun, ay Sebidiyu at duwak baguwama, ay anggan duwa yak tagadal. 3Ay Simun Pedru nalong sat tiba te, “Aw, nanfanguyang kway.” Ay at tiba sigon nalong yangay te, “Kin, anggan ami. Nangufud ami emu.” Ay kanya fag ngay tagadal nasakay wa sa sik balutu. Ay dewa te fagngaba wak yabi nu gfanguyang we nafabul nus di sadi. 4Nu mayamag wa sirut, Isus malindug sis tigyangan lino. Ay at ngay tagadal wa natoglag te, kanya Isus wan. 5Ay Isus nainto sat ngay tagadal te, “Mangamam, go e nafabul tuwam?” Ay at ngay tagadal nabalus te, “Yaya. Wami e nafabul.” 6Ay Isus nasugu te, “Ukasi yangay ay fanggamat uyang sas siyun baliwa fag day balutu, ay gfafabul wa ro am.” Ay at ngay tagadal nafaning wa fiya, ay at kayuwan at nafabul, wa mafaguyud at fanggamat. 7Ay Isus at fakesugun fag tagadal nafoyung sas Pedru te, “Kanya tam Fun wan.” Ay Pedru nu nadungug katanya, nasulun at balukas, anway wa gbalukasan. Ay kanya mafali naarabang sasad lino. 8Ay at tibak tagadal si way at balutu gguyud way at fanggamat uyang at mapnu. Ay kanya ndasug sas tigyangan lino, anway wa ngayayu sas tigyangan. Lima way rok safuluk dufa at kayayuwan. 9Ay at ngay tagadal nu nalfas wan siginan at balutu, nalag sik dayag. Ay sanya e sinugba uyang ay e sik fafa. 10Ay Isus nasugu te, “Fastei tiba ay ba uyang.” 11Ay Simun Pedru nasakay sas balutu ay naguyud at fanggamat uyang sas wa daga. Ay mapnu at nafagamat ay gbiya fag ngay uyang. At kayuwan manga 153k uyang. Ay dewa ngayu wa ngayu at ba uyang, at fanggamat di nrasras. 12Ay Isus nalong sat ngay tagadal te, “Stei wan. Nanyabas watam.” Ay nus di sadi at tagadal we mafainto sas te, “Sinu wo?” Fakatanyaun natoglag te, “Kanya wan tam Fun.” 13Ay Isus nangakbang sas afuy, ay nabul at fafa. Ay nafon sat ngay tagadal. Ay nafon yangay at uyang sigon. 14Siginans Isus nu gdog gleleg, ginanya at fatulu ginan wan Isus nu kasure sat ngay tagadal.

Isus ay Pedru Gsulitanan

15Nu ntabu wan Isus ay at ngay tagadal nu kon, Isus nainto sas Simun Pedru te, “Simun, Uan at baguwama, go kesug tuwo angku glabi yay sanya fagayu?” Ay Simun nabalus te, “Kin, ku Fun. Nasaful wo te, kesug aktuwa emu.” Ay Isus nasugu te, “Tanudi ku ngay tupa.” 16Ay at faduwa ginan Isus nainto sas Simun te, “Simun, go kesug tuwo angku?” Ay Simun nabalus yay fiya te, “Kin, ku Fun. Nasaful wo te, kesug aktuwa emu.” Ay Isus nasugu yangay te, “Tanudi ku ngay tupa.” 17Ay Isus nainto yangay at fatulu ginan sas Simun te, “Simun, go kesug tuwo angku?” Ay Simun kabalu, anway sas Isus at naintoan anya tulu ginan te, “Go kesug tuwo angku?” Ay Simun nabalus yay fiya te, “Ku Fun, nasaful wo fagayu nus nge wain. Ay nasaful yangay o te, kesug aktuwa emu.” Ay Isus nalong te, “Tanudi tuwa ku ngay tupa. 18Matuyan iglong aw emu te, kaduge o mabaguwama, mafasulun yay o am balukas mandi. Ay maalo yay o nus nganday am fakaumsigun. Ay roro nu mafufuwama wa ban o, gfalugde ban o am take. Ay am iba way ban tagfasulun emu am balukas, ay e tumaban ban emu sa am fagyudun kaumsig fag talun.” 19(Isus at fagnalongun katanya, laman naguna nafoyung te, katanya Pedru nu mkate ban. Ay Pedru at fakateun ban gfasure ban Diyus at fagmasineun.) Ay nu ntabu wa Isus nu glong katanya, nalong sas Pedru te, “Aloi tuwa angku.”

Isus At Nesugan fag Tagadal

20Ay Pedru gina nbiling, nalag Isus at nesugan fag tagadal nu glo sit guyan. (Ka fag tagadal ebi at makbang fiya fiya Isus gina gfangon, ay ginanya nainto sas Isus te, “Em Fun, sinu ro at namoyung emu sat mauri fag ngay taw?”) 21Ay Pedru gina glag ka fag tagadal, nainto sas Isus te, “Ku Fun, tain ban at kumgurungan ka fag tagadal?” 22Ay Isus nabalus sas Pedru te, “Dewa aw kaumsig te, laman ka fag tagadal gleleg yap ban gugat anggan umdasug aw ste, wo e fagasalaganun sa anya. Ay o, aloi tuwa gugat angku.” 23Nu katanya, ka fag longan indungug sa sangay tagafanud sas Isus sik barita te, kanya fag tagadal wa ban kate. Ay roro Isus dewa nalong katanya, at masuwad bunwa te, kanya wa ban kate. At longan anway te, “Dewa aw kaumsig te, laman nin fag tagadal gleleg yap ban gugat anggan te, umdasug aw ste, wo e fagasalaganun sa anya.” 24Aw wan ka fag tagadal, at nafoyung katanya fag fagbulun ay at nariruk sigon katanya. Ay fagayu tam nasaful watam te, matuyan ku foyungan fagayu. 25Ngayu yay fiya fiya Isus at nafagbulun. Nu rumiruk way ro fagayu fagayu, nu ndain wa ro sumak at ngay rirukan sas fagdaul daga.

Currently Selected:

Uan 21: TAWEAST

Highlight

Copy