Fagbulun 1

Umsure ban at Masine fag Falad

1Sama Teufilu, sa ebi taguna ku rirukan, nariruk aw fagayu Isus at foyungan ay at fagbulun ebi gina gfasigad nu gfagbulun 2ay anggan wa inkurug sas banwa. Ay nu makbang wa nu gakaurugun sas banwa, kanya e suguwan sat ngay Nasugu. Kanya ebi at nafili at nanfadasug at foyungan sa sangay taw. Kanya fag foyungan siginan at Masine fag Falad at fagmadaragangun. 3Ay nu nkate wan ay nu gdog gleleg wan, Isus insure yay sat ngay Nasugu. Ay sis 40k menit nafalag yay at madulawan fag ngay fagbulun, nanfasaful te, kanya gdog yay gleleg. Ay manga nafoyung yay sas Diyus nu gmagurang taw baliwa. 4Sayginan gina Isus gfangon gasfuwan at ngay Nasugu, kanya nalong te, “Lagi yap am glo siginans fulan Erusalem. Fanyai yap tam Tama at fatuyanan, kata ebi ku foyungan ayu. 5Ebi Uan Tagfasurung nafasurung taw sasad safa. Ay wa glugo e gfasurung yangay ban ayu sa at Masine fag Falad.”

E Naurug wa Isus sas Banwa

6Gina Isus ay at ngay Nasugu maful, nainto sas Isus te, “Em Fun, go manga katsi wan nu gfafoli o laman taw Israel gdog yay gmagurang sat daga ebi?” 7Ay Isus nabalus te, “Tam Tama wa kaumsig nu sumaful am te, seduge nu mgurungan katanya. Tam Tama tuwa tagsaful te, ginanya nu kagurungan at nafatuyanan mandi. 8Ay at Masine fag Falad gina mdasug sa ayu, mon ban ayu at fagmadaragangun. Ay nanfatuyan ban am ku longan sas fulan Erusalem, ay sas fagdaul talun Udiya, ay sas talun Samarya, ay anggan sas fagdaul daga at ngay taw.” 9Ay nu ntabu wan Isus nu glong katanya, inkurug wa sas banwa kaduge at ngay Nasugu glinggat. Ay anggan wa te we nalag, sik linyabu nafarum wayay. 10Ay kaduge at ngay Nasugu glinggat sas banwa, sik duwama gbalukasan malagsi nlindug wa daw sanya. 11Ay ka fag duwama nalong te, “Am fag ngay taw Galiliya, taw ro ay fagmalindugun yay ste ay ay fagtangdaun sas banwa? Kanya tam Isus, at kinkurug sas banwa. Kanya gdog yay ban kafoli ste, kata yangay aro nu glag am anya nu kaurug sas banwa.”

Isus At ngay Nasugu Nafili Matias at Fantubus Udas

12Isus at ngay Nasugu noli wa sas fulan Erusalem siginans Bugsul Ulibu. Ka fag bugsul makbang way, at kayayuwan manga sadik kilumitru. 13Ay nu ndasug wan nasakbo wa sasad bale, ay natunglus wa sa at tungud fag silid, sas fagtiyugan. At ngay ngayan, Pedru, Uan, Santiagu, Andres, Filipi, Tumas, Bartulume, Matiyu, sadi yak Santiagu, at tama Alfiu, Simun, sik takamabo sas taw Ruma, ay Udas, at tama sadi yak Santiagu. 14Ay kanya fagayu sadi tuwa at fasadan nu gdarangin faggugat gfasfuwan sik ngay mangena, ay anggan Maria, Isus tina, ay anggan Isus fadugsay fag ngay mangama.

15Ay ginanya fag ngay menit, Pedru nlindug sis 120k tagafanud buknga, ay nalong te, 16“Ku ngay fadugsay, agurungani wa nangus kata at marirukan sa baliwas Udas at nafoyungan Isus sa sangay taw at mauri. Anway ebi at Masine fag Falad nafoyung katanya sas fun Dabid. 17Ebi Udas, at sadi em ufud sa em ngay fagbulun Isus nafon emi. 18Ay bandi ataw Udas nabili sik daga, ay at fanbili siginan at fagbulun at mauri. Ay kanya ntong masuknunan sanya fag daga. Ay at ungdan inbugsang ay at funa nasat day bilug. 19Ay fagayu tagbanwan sis fulan Erusalem nasaful at kin-gurungan, ay nafangayan ka fag daga sat fanlongan te, Akeldama, at masuwad te, at ke taguk fag daga.” 20Ay Pedru nalong yangay te, “Marirukan sis Danyu fag fafil te,

‘Ubuni yud e gbanwan at fagbanwanan.

Ay lag gfabayan tibak taw nu nangungbus gbanwan.’#1:20 Danyu 69:25.

Ay marirukan yangay te,

‘Ay at fagbulun ebi ataw, falini wa sa tibak taw.’#1:20 Danyu 109:8.

21“Ay nu katanya, nanfili yap tam fiya at sadi tam ufud, siginan ebi at sadi tagufud antam kaduge tam Fun Isus maful antam, 22siginan ebi Uan Tagfasurung nasurung Isus ay anggan Isus inkurug sas banwa. Tam fagfiliun tagsanya ginani at sadik taw, tagfatuyan ban tagfasfuwan antam te, Isus gdog yay gleleg.” 23Ay at nafili duwak taw, Use ay Matias. Use e duwa yak ngayan, Barsabas ay Ustus. 24Ay ngay tagafanud gdarangin te, “O wan, em Fun Isus, at nasaful fagayu taw at amatanganan. Foyungi emi te, inday kanya fag duwama, at sadi am nafili fag taw, 25laman kanya yangay ban am Nasugu at sadi, at fantubus Udas sa tam fagbulun. Anway Udas nasaruy wayay ka fag fagbulun ay at fakadasugan sa wa takasakan anya.” 26Ay kanya fagayu nafe fagsafulan. Ay Matias at nafili. Kanya wan at kinfamut sas Isus at Nasugu fag Labi Sadi.

Currently Selected:

Fagbulun 1: TAWEAST

Highlight

Copy