Fagbulun 2

Insure wan at Masine fag Falad

1Nu ndasug Pentekustes#2:1 Pentekustes: Linggati sas Tibak Longan at Famayamag sis guyuy. fag fagmafulun, fagayu tagafanud maful sa sik bale. 2Ay rodi tv, nadungug way sigad nu e gawang siginans banwa, kata sik bagyu ay inkapnu sat fagmafulan fag bale. 3Ay fagayu tagsanya e kata sik ngay dila afuy si at ngay tungud alfuyu. 4Ay at Masine fag Falad igmagurang sanya fag ngay taw. Ay fagayu gfasigad glong sa tibak fanlong at yud nasaful, nus nga setaw wa at Masine fag Falad at nafaamatanganan anya.

5Ay ginanya, e sik ngay taw Udyu siginan sangay talun sas fagdaul daga at tagbanwan sis Erusalem ay tagseg sas Diyus. 6Ay nu nadungug nu e gawang, kanya nful sanya, ay gadulawan dawdaw te, “Taw fakatanyaun at fagmafaelonganun tam ngay fanlong? 7Go sangay kanya fagayu bunwa taw Galiliya? 8Taw ro at fagnasafulun tam ngay fanlong? 9Madyay itam tiba siginan way tam stalun Partia, ay tiba stalun Midya, ay tiba stalun Elam, ay tiba stalun Mesuputamiya, ay tiba stalun Udiya, ay tiba stalun Kapadusiya, ay tiba stalun Puntu, ay tiba stalun Asia, 10ay tiba stalun Frigia, ay tiba stalun Famfilia, ay tiba stalun Iptu, ay tiba siginan ngay talun sas Libya makbang sas Sirene fag talun. Ay e ngay taw yangay siginans talun Ruma, dewa taw Udyu ay dewa at yud Udyu fag ngay taw at nafaning taw Udyu at ugali. 11Ay e ngay taw yangay siginans furu Kreta ay siginans talun Arabya. Ay gina ka fag ngay taw igfoyung Diyus at madaragang fag fagbulun, fagayu tam natogdungug tuwa tam at longan sa tam fanlongan mandi.” 12Ay fagayu taw nadulawan ay gadayuwan sat amatanganan, ay gidgintoan te, “Nataw takatanya at masuwad tam nadungug?” 13Ay tibak taw gfalingun te, “Ka fag ngay taw karanug way!”

Pedru nu Kamoyung

14Pedru nlindug gasfuwan Isus at Nasugu fag Labi Sadi ay gelongan dawdaw te, “Am fag ngay taw Udyu ay fagayu am tagbanwan sis Erusalem, dungugani ku longan. 15Yaya! Tuy fag ngay taw wa karanug kata ay fatugan, madyay katsi sfasiyam yays balabag. 16Kanya ay nalag fag fagbulun kagurungan way Diyus at taglong Uwel, ebi at nafoyung te,

17‘Diyus nalong te,

“Sa bans taguyan fag ngay menit ku Masine fag Falad nanfatsi aw sas fagayu taw.

Ay ay ngay baguwama ay ay ngay baguyna moyung ban ku ngay longan.

Ay ay ngay takabaguwama lumag ban Diyus at ngay famalag.

Ay ay ngay fufuwama nanfataginfanan aw ban.

18Ay ginanya fag ngay menit

ku Masine fag Falad nanfatsi akwa ban fiya sa ku ngay fanuguwan fag mangama ay ku ngay fanuguwan fag mangena.

Ay kanya nanfoyung ban ku ngay longan.

19Ay nanfalag aw at ngay madulawan sas banwa ay sas daga. Ay lumag sik taguk, ay sik afuy, ay sik matukba fag anus.

20Menit umkarum ay magdanun umraska kata sik taguk. Ay umgurungan wa fiya katanya bagu umdasug tam Fun at menit at malimu dawdaw.

21Ay ginanya, nus nga sinu tagafanud sa tam Fun umlangfe tuwa ban.”#2:21 Uwel 2:28-32.’ ”

22Pedru glong yay te, “Am fag ngay taw Israel, dungugani yap ku longan sa baliwas Isus, sik taw Nasaret. Kanya nafagbulun at madaragang ay at madulawan fag ngay fagbulun sa ay faglagan laman gfalag te, Diyus at nasugu anya. Ay nasaful wam katanya, teway nu kagurungan si wa ayu. 23Ebi Diyus nasaful wa te, e tumaban ban Isus sa ayu, ay katanya at fasadan wan. Ay am way at natuktuk Isus sas salibagan kayu. Madyay am wan at nasugu at mauri fag ngay taw laman igfate anya. 24Ay dewa katanya Diyus gdog yay nafaleleg Isus, ay nafalangfe anya siginans fakateun at faurianan. Anway fakateun di gbabo anya. 25Ay fun Dabid naguna nafoyung Isus at fagbulun te,

‘Gsaful aw te, ku Fun faggugat gufud tuwa angku, ay dakdi e nafanawaan teway di gfabayan angku.

26Ay nu katanya, guseganan aktuwa sa ku amatanganan.

Ay anggan ku bilug manabayan ay e fagsegun tuwa.

27Anway di o gubun angku sat matean at talun.

Ay di o gfabayan nu mruwas am nafili fag taw at matuyan.

28Nafoyung tuwo sa angku dalan tagsas leleg faggugat.

Ay guseganan aktuwa ban dawdaw,

anway o wan faggugat ku ufud.’#2:28 Danyu 16:8-11.”

29“Am ku ngay fadugsay, matuyan igfoyung aw sa ayu te, tam aguyangan, fun Dabid, inkate wan ay e nalibing wan. Ay anggan katsi gsaful yay tam te, sanya nu malibingan. 30Dabid, sik taglong. Kanya nasaful te, Diyus nafatuyanan sa anya te, ‘At sadi ban am kadagdagan, sik fun yangay ban kata emu.’ 31Ay Dabid naguna wa nasaful ay naguna wa nafoyung sa baliwa tam Fun nu gdog yay gleleg. Ay Diyus di ban mubun anya sat matean at talun. Ay manga at bilug di ban umruwas. 32Diyus gdog yay nafaleleg tam Isus. Ay ami, nasaful wami, anway nalag wami. 33Ay e naurug Isus ay malunggung wa si at Tama siyun baliwa fag day tigyangan, ay at Tama nafon at nafatuyan sas Isus fag Masine fag Falad. Ay Isus nafon yangay emi ka fag Masine fag Falad, kata ay nalag ay ay nadungug katsi. 34Bunwa Dabid at kinkabat sas banwa, ay dewa katanya, kanya nalong te,

‘Tam Fun Diyus nalong sa ku Fun te:

Malunggungi sas faglunggungan taglabi mauseganan si ku day tigyangan,

35anggan aw gfatsa am daga fagmadaragangun am ngay fabarangyan.’#2:35 Danyu 110:1.

36Ay nu katanya, fagayu tam taw Israel, asafuli tuwa te, ay nafate fag Isus sas salibagan kayu, kanya wan Diyus at nafili fag Fun, ay kanya wan tam Fun.”

37Ay at ngay taw nu nadungug katanya at longan, inlimu dawdaw, ay ginto sas Pedru ay anggan sa tibak Nasugu te, “Em ngay fadugsay, setain ban manga em fagbulun?” 38Ay Pedru nabalus te, “Ubuni ay ngay asalanan, ay asurungi sa tam Fun Isus at fagmadaragangun, ay e gfalyam wan ay ngay asalanan. Ay gfabul ban am tam Diyus at famanyun sa ayu, we tiba, at Masine fag Falad. 39Anway Diyus wan at nafatuyanan sa ayu ay sa ay ngay sisiyan, ay anggan sa at ngayayu fag ngay taw. At masuwad sas fagayu Diyus at nafili, at kinkakbang sa anya.”

40Ay ngayu yay Pedru foyungan, laman gfatuyan at ngay nalong. Kanya nalong te, “Falangfei ayu mandi ste ginan fag ngay taw at mauri at ugali.” 41Ay fagayu tagafanud sas Pedru foyungan, insurung wan. Ay at kinfamut sa at ngay tagafanud ginanya fag menit 3,000k taw. 42Ay kanya faggugat maful, laman nandungugan sas Isus at ngay Nasugu at foyungan. Ay kanya guseganan e fagmasadiun nu kon tam Fun at yafun, ay nu gdarangin.

Ngay Tagafanud e Fagmasadiun

43Ay ngay taw nadulawan dawdaw nu nalag Isus at ngay Nasugu at madaragang ay madulawan fag ngay fagbulun. 44Ay fagayu tagafanud e fagmasadiun tuwa sat amatanganan. Ay at nanuranan sigon sa tuwas fagayu tagafanud. 45Ay ka fag ngay taw nafabili wan at ngay daga ay anggan at ngay nanuranan, ay at ba singku nafafafud wa sas fagayu tagafanud, nus nga seyu at nayudanan. 46Kayu menit kayu menit at ngay tagafanud maful sis Diyus bale, ay gafudan tinafay si at ngay bale, ay matvngvd kanya nu guseganan gafudan at ngay fakonun. 47Ay kanya gseg sas Diyus. Ay ngay taw sat ngaba dayu kaumsig at ngay tagafanud at ugali takatanya. Ay kayu menit kayu menit Diyus gfainfamutan tuwa at bagu kinlangfe.

Currently Selected:

Fagbulun 2: TAWEAST

Highlight

Copy