Uan 14

Isus way Fagsadi Tam Dalan sa Tam Tama

1Isus nalong te, “Lag am gafanawa. Afanudi tuwa sas Diyus, ay afanudi yangay sa angku. 2Sa ku Mama at bale ngayu tuwa at silid. Nu bunwa katanya, kwa gfoyung ayu te, glo kwan, laman nanfamasadan aw sik ngay silid sa ayu. 3Ay nu ndasug akwa sanya, ay nu nafamasadan akwa sik ngay silid sa ayu, kafoli kyangay ban ay nantaban aw ayu, laman nus nganday aw, sanya tuwam. 4Ay gtungul wam ku dalan sa ku fakadasugan.” 5Ay Tumas nainto sas Isus te, “Em Fun, yami nasaful te, dada ro nu lumo o. Ay tain nu tumungul ami te, sanya am dalan?” 6Ay Isus nabalus te, “Aw wan at dalan, ay at matuyan, ay at faglelegun. We taw madasug sa tam Tama, nu dakway tumaban. 7Nu nasaful di am angku, nasaful yangay am ku Mama. Ay katsi long nasaful wam ay nalag anya.”

8Ay Filipi naet sas Isus te, “Em Fun, fasurei sa emi am Mama ay kin long.” 9Ay Isus nabalus te, “Glugo wan nu gufud aw ayu. Ay sangay yo nasaful angku, Filipi. Sik taw nu nalag tuwa angku, nalag yangay anggan ku Mama. Taw ro am fagnalongun te, ‘Fasurei sa emi am Mama?’ 10Go wo gafanud te, aw si kwa ku Mama, ay ku Mama si wa angku. Ku foyungan bundi ku namandianan fag longan. Ku Mama tuwa tagsi angku tagfagbulun at fagbulun mandi. 11Afanudi tuwa sa ku foyungan te, aw si kwa ku Mama, ay ku Mama si wa angku. Ay nu dyay am gafanud katanya, afanudi si ay nalag ku ngay nafagbulun. 12Matuyan iglong aw ayu te, nus nga sinu tagafanud sa angku, mafafagbulun yangay kata ku nafagbulun. Ay at fagbulun ban glabi yay ku fagbulun, anway aw, guli akwa sa ku Mama. 13-14Ay nus nge wain ay fagetun sa ku ngayan magbulun kwa fiya, laman aw at Baguwama, gfalag aw sa sangay taw te, ku Mama madaragang tuwa.”

Umdasug ban at Masine fag Falad

15“Nu kesug tuwam angku, gfaning tuwam ku ngay suguwan. 16Ay nanget ban aw sa tam Tama te, sugui sa ayu Tagfabitsug ay amatanganan. Ay kanya si tuwa ban ayu faggugat. 17Ay kanya ban fag Tagfabitsug, Masine fag Falad, tagfoyung sa ayu sa baliwa at matuyan. Ay at ngay taw ste swa daga wa ban kaumsig ka fag Masine fag Falad, anway wa nalag ay wa nasaful anya. Ay am long, nasaful wam anya, teway kanya si wa ban ayu, ay di gubun ayu faggugat.

18“Nu katanya, dakdi gubun ayu yud e gtarabang ayu. Ay gdog kyangay ban kafoli ste. 19Bandi tv at ngay taw ste swa daga wa lumag angku. Ay roro, am, lumag yay ban am angku. Ay gleleg yangay ban am, teway gleleg aw. 20Ay ginanya ban fag menit sumaful wam te, aw si kwa ku Mama. Ay am si tuwam angku. Ay aw si kyangay ayu.

21“Nus nga sinu tagfaning ku ngay suguwan, kanya takesug angku. Ay ku Mama kesug tuwa takesug angku. Ay anggan aw kesug kyangay takesug angku. Ay nanfasaful aw fiya fiya angku sa takesug angku.” 22Ay Udas (bunwa Udas Iskaryute) nainto sas Isus te, “Em Fun, taw ro fagsaun emi fagtvngvd nu gfasaful o fiya fiya emu? Ay taway at fagyudun sas fagdaul daga at ngay taw?” 23Ay Isus nabalus te, “Sik taw nu kesug tuwa angku, kanya gfaning tuwa ban ku longan. Ay ku Mama kesug ka fag taw. Ay si tuwa ban ami anya faggugat. 24Ay roro, sik taw nu dway kesug angku, wa gfaning ku longan. Ay ka fag longan ay nadungug, bunwa ku longan mandi. Tam Tama tuwa at nasugu angku at ke longan.

25“Nafoyung kwa ayu katanya kaduge aw gufud ayu. 26Ay tam Tama at sumugu ban ay Tagfabitsug tagtubus angku.#14:26 tagtubus angku: sis Grigu, sa ku ngayan. Ay kanya, at Masine fag Falad. Ay at nanfoyung ban ayu fagayu ay nanfaamatanganan ayu fagayu ku longan.

27“Aw, nafanabayan aktuwa ayu. Kata nu manabayan aw, anggan am, manabayan yangay am, di kata ste swa daga fag ngay taw at fagmanabayanun. Lag kabalu sa ay amatanganan. Ay dangay sigon kalimu. 28Ebi nadungug wam nu glong aw ayu te, lumo akyay ban. Ay gdog kyangay ban kafoli ste sa ayu. Nu kesug tuwam angku, guseganan tuwam, anway lumo akyay sa tam Tama. Ay tam Tama glabi tuwa angku nu madaragang. 29Ay katsi nafaguna akwa nafoyung ayu, laman gina ban umgurungan ku longan, gafanud tuwam. 30Ay katsi dakwa gfalugo sirut nu gelongan aw sa ayu. Anway gadasugun wan Satanas tagfun ste swa daga. Ay kanya we fagmadaragangun mafasugu angku. 31Dewa katanya at kumgurungan sa angku, gfaning aktuwa tam Tama at suguwan angku, laman at ngay taw ste swa daga sumaful ban te, kesug aktuwa tam Tama. Alindugi wan. Bastam wan.”

Currently Selected:

Uan 14: TAWEAST

Highlight

Copy