Uan 13

Isus Nafegus at ngay Tagadal Darafa

1Gina bagu mdasug at fagmafulun sa baliwas Tagfabarita nu Glangfe, Isus nasaful wa te, “Indasug wan ku menit nu galoun aw ste ginans fagdaul daga. Ay gauliun akwa sa ku Mama.” Ay Isus matvngvd nu kesug at ngay taw ste swa daga. Ay kesug yangay ban anggan sas fakatabuwan fagdaul daga.

2Ginanya fag yabi, Isus ay at ngay tagadal kon at yafun. Ay aro ataw Satanas nafaamatanganan wa Udas, at tama Simun Iskaryute, laman moyung Isus sat mauri fag ngay taw. 3Ay Isus nasaful wa te, “Ku Mama at nafon angku fagayu at fagmadaragangun. Ay aw siginan akwas Diyus, ay guli akyangay ban sas Diyus.” 4Ay Isus inlindug siginan at fagfangonan, ay nabul at balukas tagsit tungud. Ay nabul sik falefe ay nafutus sit fagwan. 5Ay kanya natalin sik mamam sa sik fagsuwadan. Ay gfasigad wa gfegus gfasadsadian at ngay tagadal darafa. Ay at fanfatat at darafa at nafutus sit fagwan fag falefe. 6Ay nut si was Simun Pedru, Simun Pedru nainto Isus te, “Ku Fun, go sangay o tuwa ro daw tagfegus ku darafa?” 7Ay Isus nabalus te, “Yo gsaful ku fagbulun katsi. Bandi yay ban nu sumaful o.” 8Ay Pedru nalong te, “Dakwa long gfafegus sa emu ku darafa.” Ay Isus nabalus te, “Nu dakway nafegus am darafa, wo e fagmasadiun sa angku.” 9Ay Simun Pedru nalong sas Isus te, “E kin, ku Fun, bundi fagtvngvd ku darafa, anggan tuwa sigon ku daluwap ay ku alfuyu.” 10Ay Isus nafoyung te, “Sik taw nu naigus wan, malagsi wan at bilug, ay kanya ya gaigusun. At darafa wadi at fagfegusun. Ay maigusan wam, ay roro bunwa am fagayu.” 11(Ay Isus nasaful wa gugat te, kanya wa fiya fag taw at namoyung ro anya sas mauri fag ngay taw. Katanya at fagnalongun te, “Maigusan wam, ay roro bunwa am fagayu.”)

12Ay Isus nu ntabu wa nu gfegus at ngay tagadal darafa, gdog yay nabul aro at nabul fag balukas ay nasulun yangay, ay infoli wa sas fagfangonan, ay ginto sat ngay tagadal te, “Go nasaful wam aro ku nafagbulun at masuwad? 13Nafangayan wam angku te, ‘Em Takamoyung ay Em Magurang.’ Ay matuyan wa fiya ay longan. Kin, aw wan. 14Aw, ay Fun ay ay takamoyung nu nafegus aktuwa ay darafa, anggan am tanani tuwa fedfegusani ay iba at darafa. 15Anway nafaulit kwa ayu ku fagbulun. Ay anggan am, fagbuluni yangay sa ay iba, kata ay nalag ku fagbulun sa ayu. 16Matuyan iglong aw ayu te, ‘Sik fanuguwan wa glabi at fun. Ay sik nasugu wa glabi sat nasugu anya.’ 17Nu nasaful tuwam katanya ku longan, guseganan wam nu gfaning tuwam.

18“Ku nafoyung ayu fag longan bunwa sa ayu fagayu, anway nasaful kwa te, kayunya way ku nafili fag taw. Dewa katanya, laman umgurungan at marirukan sis Diyus at longan te, ‘Kanya fag taw at nafasfuwan angku gfangon, kanya takamabo way angku.’ 19Siginan ngay katsi gfaguna kwa gfoyung sa ayu, laman ku longan gina msure, gafanud tuwam te, aw wan Diyus at nafili fag Fun. 20Matuyan iglong aw ayu te, kanya nu gfantain tuwa sa ku nasugu fag taw, kanya gfantain sa angku. Ay kanya nu gfantain tuwa sa angku, kanya gfantain yangay sa at nasugu angku.”

Isus Nafoyung at Namoyung ban Anya

(Mat. 26:20-25; Mar. 14:17-21; Lukas 22:21-23)

21Isus nu nafoyung wa katanya, kabalu dawdaw sat amatanganan. Ay wa nasuksuk nu nalong te, “Matuyan iglong aw ayu te, am wa ro at sadi at moyung angku sat mauri fag ngay taw.” 22Ay at ngay tagadal gfanlinggatanan, anway wa nasaful te, “Sinu ro manga ami Isus at faglongan at masuwad?” 23Ay Isus at tagadal at sadi masarare tuwa sis Isus at dubdub, kanya Isus at fakesugun fag tagadal. 24Ay Simun Pedru nafalelegan at alfuyu sat usama te, “Oi wan taginto sa tam Fun te, ‘Sinu am faturunanan?’ ” 25Ay kanya fag tagadal at masarare namasingian nalong sas Isus te, “Em Fun, foyungi emi te, sinu ami.” 26Ay Isus nabalus te, “Nus nganday wa ro ku fagfonan ku nafasurung fag tinafay, kanya wa ro.” Ay Isus nafasurung wa fiya ay nafon sas Udas. 27Ay Udas nu nabul wa ka fag tinafay, Satanas wan tagmagurang anya. Ay Isus nalong sas Udas te, “Mafalii tuwa nu gfagbulun o am fagbulun.” 28Ay nus di sadik tagadal sis fagfangonan we nasaful Isus at longan aro tv at masuwad. 29Ay tibak tagadal gamatangan te, unda Isus nasugu Udas te, “Bilii tam fagayudanun ban sa tam yafun.” Ay tibak tagadal gamatangan te, unda Isus nasugu Udas te, “Foni sas taw at yud e kwa.” Fakatanyaun at ngay tagadal nu gamatangan anway Udas tagsandig at singku. 30Ay Udas nu naon wan ka fag tinafay, nalo wan. Ay ginanya mayabi wan.

Sik Bagu fag Longan

31Udas nu nalo wan, Isus nafoyung te, “Katsi long, aw, Taw at Baguwama, ku fagmasineun gakasureun wan. Ay anggan Diyus at fagmasineun gakasureun yangay.” 32Ay Diyus at fagmasineun nu nsure wan siginan ku fagbulun, Diyus yangay at nanfasure ku fagmasineun. Ay wa glugo tv nu gfasure ku fagmasineun. 33Sisiyan am, wa glugo sirut nu ste aw gufud ayu. Ay masarapan yay ban am angku. Kata ebi ku longan sa sangay taw Udyu at ngay tagmagurang, katanya yangay anggan sa ayu ku longan katsi te, sa ku fakadasugan, wa ban am madasug. 34Nanfoyung kyay ayu sik longan bagu te, laman ban kedkesugan tuwam. Kata nu kesug aw ayu, katvngvdi yangay anya nu kedkesugan am. 35Nu katanya tuwa ay fagbulun, fagayu taw sumaful ban te, am wan ku ngay tagadal, nu kedkesugan tuwam.

Isus Naguna Nafoyung Pedru nu Kamayud sa Anya

(Mat. 26:31-35; Mar. 14:27-31; Lukas 22:31-34)

36Simun Pedru nainto sas Isus te, “Ku Fun, dada ban nu galoun o?” Ay Isus nabalus te, “Sa ban ku fagloan, yo mafaalo angku katsi. Sa yay ban tibak menit nu galo o angku.” 37Ay Pedru nainto yangay sas Isus te, “Ku Fun, sangay dada ban o, nu dakway masud emu katsi? Mafamasadan akwa nangate anway sa emu.” 38Ay Isus nabalus te, “Go mafamasadan wo fiya nangate katvngvdan nu kesug o angku? Matuyan iglong aw emu te, bagu ro tabag tumarakit, tulu ginan ro nu kamayud o te, wo gsaful angku.”

Currently Selected:

Uan 13: TAWEAST

Highlight

Copy