Fagbulun 6

Nafili Fituk Mangama

1Ay ginanya fag ngay menit tagafanud sas Isus inkayu wan. Ay taw Udyu at ke fanlong Grigu, e nalimatan sa tibak taw Udyu at ke fanlong Ebriyu. Anway fagayu menit gina e nafon fakonun sa sangay burangday, we gfon sat ngay burangday. 2Nu katanya, Isus at Nasugu fag Labi Duwa nafaful Isus at ngay tagafanud ay nalong te, “Wa masine nu katuwas ami gfoyung Diyus at longan, laman nanfatvngvdun sa baliwa ngay fagnalagun. 3Nu katanya, em ngay fadugsay, siginan ay kaiban filii yap fituk mangama at masine at ugali, ay at mamatanganan, ay at Masine fag Falad si wa anya. Kanyai ban tagfatvngvdun sa sangay fagnalagun. 4Ay faggugat em fagbulun gdarangin ami ay gfoyung ami Diyus at longan.” 5Ay fagayu tagafanud kaumsig nu nadungug ka fag ngay Nasugu at longan. Nu katanya, nafili Esteban, sik mangama matvngvd nu gafanud sas Isus ay at Masine fag Falad si wa anya. Ay tiba at nafili: Filipi, ay Prukurus, ay Nikanur, ay Timun, ay Parmenas, ay Nikulas. Nikulas sik yud Udyu fag taw siginans Antiukia ay nafaning sa sangay taw Udyu at ugali. 6Ay at tiba nataban ka fag fituk nafili sa sangay Nasugu at akbang, ay kanya nated ka fag ngay nafili alfuyu ay nadarangin.

7Nu katanya, gtunglus nu karapyag Diyus at longan. Ay anggan at ngay tagafanud sas Erusalem inkayu yangay dawdaw. Ay anggan ngay taganyun ngayu yangay tagafanud sas Isus.

Tibak Taw Nagamat Esteban

8Diyus nafon sas Esteban at madulawan fag fagmadaragangun. Ay kanya ngayu at nafagbulun at madulawan ay at madaragang fag ngay fagbulun sa sangay taw faglagan. 9Ay roro sik ngay taw gfaringangan sas Esteban. Ka fag ngay taw siginans fulan Sirini, ay Aleandria, ay Silisya, ay Asia. Ay kanya katap sas Udyu at bale fakafulan at ngayan te, “Sik fulan taw at nalfas nu gafanuguwanan.” 10Ay ka fag ngay taw wa gbabo Esteban at longan teway at fagsafulun siginan tuwa at Masine fag Falad. 11Ay nu katanya nasugu sik ngay takamuwagan laman glong te, “Nadungug ami Esteban nu glong mauri sas Muisis ay sas Diyus baliwa.” 12Sat nasuguwan katanya nafadotaman at ngay taw, ay taw Udyu at ngay tagmagurang, ay anggan ngay tagfoyung Muisis at Suguwan. Ay ka fag fulan taw nagamat Esteban ay nataban sas Taw Udyu Tiba Tungud Tagmagurang. 13Ay nafatsanya yangay sik fulan taw at nanfamuwagan sas Esteban baliwa te, “Ka fag taw at foyungan faggugat mauri sa baliwa tam Diyus bale at mafilian ay anggan sas Muisis at Suguwan. 14Anway nadungug wami nu glong te, sik taw at ngayan Isus siginans fulan Nasaret, rumasras ban tam Diyus bale. Ay manga gfasaman way tam ugali siginans Muisis at foyungan ebi.” 15Ay ka fag ngay taw Udyu tagsulitanan daul nalinggat dawdaw Esteban, ay nalag at mata nu masulo kata Diyus at tagfabarita mata.

Currently Selected:

Fagbulun 6: TAWEAST

Highlight

Copy