Fagbulun 7

Esteban at Foyungan

1Ay fun taganyun nainto Esteban te, “Go matuyan ka fag ngay taw foyungan sa emi?” 2Ay Esteban nabalus te, “Ku ngay fadugsay, ay ku ngay mama, ay ku ngay mina, dungugani yap ku longan. Tam Diyus at madaragang ebi nsure sa tam aguyangan Abrayam kaduge sis talun Mesuputamiya, gina gyud naalin sas fulan Karan. 3Tam Diyus nalong anya te, ‘Loi wan, ay ubuni wan am daga ay am ngay kalongan sanya, ay loi wa sa ku foyungan emu fag talun.’#7:3 Fagsigadan 12:1. 4Ay Abrayam nalo wa fiya siginans taw Kaldiya at talun, ay nabanwan wa sas fulan Karan. Ay nu nkate wan Abrayam tama, Diyus nafaalin yay fiya Abrayam sanya ginan, ay indasug ste fag talun si tam fagbanwanan katsi. 5Ay ginanya dewa nalong katanya, Diyus di e nafon sas Abrayam nus di sirut fag daga. Dewa katanya, Diyus nafatuyanan wan tuy fag talun fagdaul sas Abrayam, laman ban kanya fag daga anggan sa at ngay sugfun at daga. Ginanya nu gfatuyanan gina yay Abrayam yud e unga. 6Ay Diyus nalong yangay anya te, ‘Am ngay sugfun ban namanwan ban sa tibak taw at talun. Ay mafanuguwanan ban. Ay nu gfauri ban am ngay sugfun sanya, 400k banwa. 7Ay aw wa ban at tagfauri kanya fag ngay taw at nanfanuguwanan anya. Ay nu ntabu wan, am ngay sugfun ban lumo wan sanya ginan ay nanseg ban angku ste fag talun.’#7:7 Fagsigadan 15:13,14. 8Ay tam Diyus e fatuyanan sas Abrayam. Katatuy at fatuyanan: ‘Tulii fagayu mangama.’ Ay nu katanya, Abrayam nu inke unga wa Isaak, natuli anya sis fawaluk menit. Ay Isaak inke unga Akub. Ay Akub inke unga labi duwa, tam ngay aguyangan.

9“Ay tam ngay aguyangan galabian wayay sat fadugsay at sadi, Use. Nafabili wa anya sa sik ngay taglo sas talun Iptu. Ay dewa katanya, Diyus gufud tuwa gugat anya. 10Ay Diyus nafatvngvdun Use gina e gfauri anya sis talun Iptu. Ay manga Diyus nafamanyun tuwa anya sik fagsafulun. Nu katanya, Faraun, at fun sis Iptu, kesug anya ay nafili anya laman gmagurang fagdaul Iptu ay fagayu at ngay fagmabalanun. 11Ay ginanya ndasug sik fanlunus sas fagdaul talun Iptu ay anggan sas talun Kanaan. Ay mason dawdaw ka fag fanlunus. Ay tam ngay aguyangan we fagbulan at fakonun. 12Ay Akub nu nadungug te, e fakonun yay sas talun Iptu, nasugu at ngay baguwama, tam ngay aguyangan. Kanya at taguna fagloan sas talun Iptu. 13Ay bandi sis faduwak loan Use nafoyung wa anya sat ngay fadugsay. Ay anggan tagsis fun bale daul at ngay taw nasaful te, Use e ngay fadugsay yay mangaro. 14Ay Use nagewan at tama Akub, ay fagayu at talafuwan. Ay at ngay taw nu fagayu wan sanya ginan 75. 15Ay Akub nalo wa fiya sas talun Iptu ay sanya wan nu kate ay anggan tam ngay aguyangan. 16Ay nauba wa at ngay butul sas fulan Sikim. Ay nalibing wa sas Abrayam nabili fag faglibingan ebi siginans Amur ngay unga.

17“Ay nu makbang wan nu gakagurunganun Diyus at nafatuyanan ebi sas Abrayam, tam ngay aguyangan inkayu yay baliwa sis talun Iptu, 18anggan wa te, e bagu fag fun sis talun Iptu at yud nasaful sa baliwas Use. 19Ay ka fag fun gfanluk tam ngay aguyangan ay nafatakan, ay gfabulun te, ‘Ukasi wan fagayu ay ngenge, laman we gleleg.’ 20Ay ginanya fag buknga Muisis nu kasalug. Ay kanya Diyus nesugan fag ngenge. Ay tuluk magdanun at magurang nu gfatvngvdun anya sat bale. 21Ay bandi at magurang nu nafasure wa at ngenge, Faraun at baguyna nabul wan ay nafadaul bilang at ngenge. 22Ay nafaadal Muisis sa baliwa fagayu fagsafulun sanya sis talun Iptu. Ay kanya madaragang tuwa nu gelongan ay manga nu gfagbulun.

23“Ay Muisis nu 40 wak banwa, e fasadan ganansiboun sat ngay kalongan, taw Israel. 24Ay nu nalag te, sik taw Iptu gfauri sik taw Israel, Muisis natarabang anya, ay anggan wa nafate ka fag taw Iptu. 25Muisis gamatangan te, ‘Satu ku ngay kalongan gsaful tuwa te, aw wan Diyus at nasugu laman nanfalfas anya. Ay roro yaya, wa gsaful.’ 26Ay balabag di, Muisis infoli yay fiya sa tiba ay nalag duwak taw Israel nu gbarangyan. Ay kanya kaumsig gfasine duwama, glong te, ‘Taw ro ay fagbarangyanun? Fag duwa am, taw Israel way am.’ 27Ay at tagfabarangyan at usama natulud Muisis ay nalong te, ‘Sinu at nafili emu laman o wan em fun ay em tagbuknga? 28Go am fasadan nanfate yangay o angku kata egmenit nu nafate o ka fag taw Iptu?’ 29Ay Muisis nu nadungug at longan, nalagyu wan ay nasa was talun Midyan. Ay sanya Muisis nu ke mangena ay nu ke unga, duwak baguwama.

30“Nu nlangfe wa 40k banwa, Diyus at tagfabarita at sadi nsure sas Muisis sa sik kayu sirut gigang, kaduge kanya sis talun at yud e taw, makbang wa sas Muyud Sinay. 31Ay Muisis nu nalag, nadulawan dawdaw ay inkakbang, laman nanfatuyanun. Ay nu makbang wan, nadungug tam Fun Diyus nu gelongan te, 32‘Aw wan am ngay aguyangan at Diyus. Abrayam, ay Isaak, ay Akub at Diyus.’#7:32 Nu Galin 3:6. Ay Muisis nu nadungug kudkulugan kalimu, ay wa glinggat sanya. 33Ay tam Fun Diyus nalong anya te, ‘Buli yap am sinilas, anway am fagsiyadan fag daga malayun sat masine fag daga. 34Ay nalag aw nu e gfauri ku ngay taw sis talun Iptu. Ay nadungug aw nu gatakan guro. Ay ku fagindasugun katsi laman nanfalfas aw anya sanya ginan. Ay katsi nansugu aw emu sas talun Iptu.’#7:34 Nu Galin 3:5,7-8,10.

35“Ay kanya yay Muisis, ebi at tiba nafayud te, ‘Sinu at nafili emu, laman o wan em fun ay em tagbuknga?’ Ay katsi Diyus wan at nasugu Muisis, laman at tagfangguna ay at nanfalfas taw Israel. Ay at tagtarabang anya ka fag tagfabarita at nalag sis kayu sirut tagigang. 36Ay Muisis wan at nafalfas taw Israel gina nafasure at madaragang ay madulawan fag ngay fagbulun sas talun Iptu, ay sas Dagat Maraska, ay sas talun at yud e taw. Nu gfagbulun katanya 40k banwa. 37Ay Muisis yay fiya at nalong sa sangay taw Israel te, ‘Diyus gfili ban sik taglong siginan ayu kata yangay angku.’#7:37 Diyuterunumyu 18:15. 38Ay tam ngay aguyangan nu sa was talun at yud e taw, Muisis wan tagbuknga sa tam ngay aguyangan ay sas tagfabarita at nafasulitanan anya sis Bugsul Sinay. Ay sanya nafon sas Muisis sik tagfon leleg fag longan, laman nanfoyung yangay sa antam.

39“Ay roro tam ngay aguyangan kauri way gfaning Muisis. Ay igfayud way anya. Ay kaumsig yay gakafoliun sas talun Iptu. 40Ay kanya nalong way sas Arun te, ‘Awati sik ngay fagsegan tagtarabang emi. Anway wami nasaful te, dada wan am ariyan at nataban antam siginans talun Iptu.’#7:40 Nu Galin 32:1. 41Ay ginanya, ka fag ngay taw naawat wa fiya kata sik baka riyangan, ay nafon sik anyun ay guseganan sa ka fag baka. 42Sat nafagbulun katanya, Diyus naubun wan, ay nafabayan wa nu gseg sa sangay galeme sis banwa. Kata Diyus at ngay taglong at rirukan ebi te,

‘Am fag ngay taw Israel, ebi ay ngay aguyangan gina sis talun at yud e taw 40k banwa, kadugenya go batang tuwa naanyun sa angku? Yaya long!

43Ay katsi guba yay am ay tawtawan Mulek at bale ay anggan ay tawtawan Refan tagfafaningan galeme.

Ay fagnaawatun laman ay fagsegan.

Ay nu katanya, nanfatsa ban aw ayu sas day talun Babilunya.’#7:43 Amus 5:25-27.”

44Esteban glong yay fiya te, “Ebi tam ngay aguyangan sas talun at yud e taw e fasamanan tuwa Diyus bale. Kanya fag bale, naawat gfaning Diyus at longan sas Muisis te, awati katatuy. 45Ay tam ngay aguyangan wan at nauba ka fag bale nu ndasug ste fag talun gina Uswe nataban. Ay kanya nabul at daga siginan ka fag ngay tagbanwan ste, anway Diyus naayan anya. Ay kanya fag bale sanya yay anggan wa ndasug fun Dabid at ngay menit. 46Ay Diyus kaumsig fun Dabid at ugali. Ay fun Dabid get sas Diyus te, ‘Nu kaumsig o nanfaawat ban aw am bale, laman nanseg sanya Akub at kadagdagan. 47Ay roro fun Sulumun way ban at takawat Diyus bale.’

48“Ay roro tam Tiba Tungud fag Diyus wa gbanwan sa sangay taw at naawat fag ngay bale. Kata Diyus at taglong at nafoyung te,

49‘Tam Fun glong te, banwa ku faglunggungan, ay daga ku fagsiyadan.

Tain ban ay fagnangawatun ku bale?

Ay dada ban ku fagfafiyan ku lufuy?

50Madyay aw wadi at naawat fagayu?’#7:50 Isayas 66:1-2.”

51Ay Esteban nalong yangay sanya fag ngay taw Udyu tagsulitanan daul te, “Gfaning way am gugat am fasadan mandi, ay wam gadunguganun at matuyan fag longan. Nus nga setaw ay aguyangan at fagbulun, katanya yangay ay fagbulun. Gfabarangyan way am gugat at Masine fag Falad. 52Ay ngay aguyangan nafauri way fagayu Diyus at taglong. Ay nafate wan ebi at ngay tagfoyung te, ‘Umdasug ban at Matuyan fag Taw.’ Ay am wan at nafoyung at Matuyan fag Taw sat mauri fag ngay taw ay nafate wam. 53Nadungug wam Muisis at longan siginans Diyus at ngay tagfabarita, ay wam nafaning.”

Ngay Taw Nafalang Esteban Batu

54Ay ka fag ngay Taw Udyu Tiba Tungud Tagmagurang nu nadungug Esteban at longan indotama dawdaw ay magvm. 55Ay roro at Masine fag Falad si was Esteban. Ay kanya natangda sas banwa ay nalag Diyus at fagmadaragangun ay fagmasineun. Ay nalag yangay Isus nu malindug sis Diyus at siyun baliwa fag day tigyangan. 56Ay Esteban nalong te, “Linggati! Nalag aw banwa nu maluwangan. Ay Taw at Baguwama malindug sis Diyus at siyun baliwa fag day tigyangan.” 57Ay ka fag ngay taw Udyu guro dawdaw ay gtabun at talinga. Ay mafali nu nkakbang nan-gamat Esteban. 58Ay naguyudan sas day fulan laman nanfalang anya batu. Ay at ngay takamuwagan tagfatuyan nafamato yay at ngay falefe sa sik baguwama at ngayan, Saulu. 59Ay gina gfalang sas Esteban, Esteban matvngvd nu get sas Diyus te, “Ku Fun Isus, fatsai emu ku falad.” 60Ay Esteban natudan ay gbiya nu guro te, “Ku Fun, lag gamatangan tuy fag ngay taw at fagbulun at mauri.” Ay nu nalong wa katanya, tam Diyus nabul wan.

Currently Selected:

Fagbulun 7: TAWEAST

Highlight

Copy