M. Mattayo 27

1LOMBA mkaze mmawa akuru ŵonse a ansembe na akuruakuru a ŵantu eyeruzyana kumsusya Yesu kuti ampaye: 2naŵo emmanga nomtanguzya kumpeleka kwa Pilato mmbili.

3Nipo Yuda wamene emvumbula apo akaŵone kuti wasuzuliwa ku imfwa eliyarusya mtima, ewezya ndalama zila makumi atatu kwa akuru a ansembe na akuruakuru 4echiti, Naponta panavumbula mlopa uliye mlandu. Ŵeve echiti, Ichi ni chinji kwasu? uziŵe weka. 5Naye ezimwazya ndalama pa malo pozila, eimapo echiyolimangilila pa mkosi. 6Naŵo akuru a ansembe ezitola ndalama echiti, Ni chosazomereka kuziika mchipaŵo cha nsembe, paziri chilipo cha mlopa. 7Epangana esita nazyo munda wa muumbi kuŵikamo alwendo. 8Chikomo choteti munda ula ni pauitiwa Munda wa mlopa kuza na lero kumo. 9Nsita yamene ila lisilizika ilo linenewa mwa Yeremiya muŵirizi lakuti, Ŵeula ndalama zila makumi atatu, chilipo cha ula etemewa chitema, wamene wechitema ŵana ŵambi a Israeli; 10ezitwala kuyosita nazyo munda wa muumbi, nga ni mwechiniuzizya Asikuru.

11Lomba Yesu epanama pantanzi pa mmbili: naye mmbili emkonsha kuti, Kansi niwe Mfumu ya Ayuda? Yesu enena naye, Mwalaŵira. 12Naye akasimikizyiwe na akuru a ansembe na akuruakuru aliyoyasuka kantu. 13Nipo Pilato emnenera, Kansi sukumvwa ivi vinyinji vyakukusimikizya? 14Naye ni myasuka na lizu limo, tetyo ni pechizizwa mmbili ngako. 15Lomba pa siku likuru mmbili echifwa kulimangululila liumba womangiwa umo wati apangwe. 16Enze naye nsita ila womangiwa woziŵikwa zina lake Barabba. 17Teti akaungane ŵeve Pilato eŵanenera, Ni yuni umupangwa nimmangululileni? Barabba kano Yesu woitiwa Kristo? 18Pakuti eziŵa kuti pa tima ni pamvumbula. 19Naye penzenkezi pa chilimba chopingula mkazi wake epezya kwake malizu akuti, Msachita kantu na muntu uyo wolungama: pakuti nazingwa ngako siku lino pa maloto chikomo chake. 20Naŵo akuru a ansembe na akuruakuru eŵapimfya maumba kusenga Barabba nomcheneka Yesu. 21Mmbili naye eyasuka echiti kwaŵo, Ni yuni wa aŵa aŵiri umupangwa nimmangululileni? Echiti, Barabba. 22Pilato enena naŵo, Nga Yesu woitiwa Kristo nimchite tyani? Ŵonse echiti, Napachikiwe pa msalaba. 23Naye echiti, Ni chinji, eifyanji? Lomba ekuwa ngako kuti, Napachikiwe. 24Teti Pilato akaŵone kuti aliyokumako, lomba kuti chenzouka chiwawa, eula manzi esamba ku manja pa menso pa liumba echiti, Neo niliye nawo mlandu mlopa wa uyu wolungama: ziŵani mweka. 25Nipo ŵantu ŵonse eyasuka echiti, Mlopa wake naukuŵa pali seo na pa ŵana ŵasu. 26Pamene apo eŵamangululila Barabba, sembe Yesu emkwapula nompeleka kupachikiwa.

27Nipo manjolinjoli a mmbili emtwala Yesu ku nsaka ya milandu, elonganika kuli yeve mpingo wonse. 28Naŵo emvula nomvwalika chovwinikila cha nkanzu. 29Epikilizya nkata ya minga emvwinikila ku mutu, na tete ku kwanja kwake kwendi; naŵo efukama mnkonde mwake nomfweya kuti, Timuŵoneni, Mfumu ya Ayuda! 30Emtira mata, eliula tete nomnyata pa mutu. 31Naŵo akasilomfweya emvula icho chovwinikila, emvwalika minjira yake nomtanguzya kuyompachika.

32Naŵo penzofuma ekumana na muntu wa pa Kurene zina lake Simoni: wechikakamizya kuya naŵo pamo kuti atwale msalaba wake. 33Nipo akafwike pa malo poitiwa Golgota, ni kuti, Pa malo pa chingolomwa, 34emmwensha mvinyu woyovizyana na ndulu, naye akaulaŵe ntepangwa kumwa. 35Nipo akampachike eyaŵana minjira yake pakati paŵo popoza mlondola: 36enkala pansi enzomlolesya pamene pala. 37Naŵo esaŵika pamulu pa mutu wake mfundo ya mlandu wake ilembewa kuti, UYU NI YESU, MFUMU YA AYUDA. 38Nsita yamene ila twipachikiwa naye pamo tupondo tuŵiri, kamo kwanja kwendi, kamo ku manzyere. 39Ŵala enzopita emtafulila nopukumula mitu yaŵo 40na kuti, We usapula chipupilo nochimanga nsiku zitatu, ulipuzumusye weka: kati niwe Mwana wa Mlungu sika pa msalaba. 41Tetyo naŵo akuru a ansembe emfweya, pamo na alembi na akuruakuru, echiti, 42Epuzumusya ŵambi; yeve mwine sangalipuzumusye. Uyu ni Mfumu ya Israeli; nasike lomba pa msalaba nase timmvwile. 43Emchetekera Mlungu: nampokesye lomba kati ompangwa: pakuti echiti, Neo nne Mwana wa Mlungu. 44Nato soti tupondo twipachikiwa pamo naye twimtotofya na malizu amene ŵala.

45Lomba kutatikila nsita yakasano na kamo penze mfinzi pa charo chonse mpaka nsita yakasano na kane. 46Nga ni pa nsita yakasano na kane Yesu elila na malizu akuru, Eli, Eli, lama sabakitani? ni kuti, Mlungu wangu, Mlungu wangu, mwanisiiranji? 47Ŵambi a aŵo epanamapo pechimvwa echiti, Uyu muntu omuita Eliya. 48Lomba pano apa muyake eutuka eula chinkupule, echizuzya na mvinyu wolula, nochisomeka pa tete nommwensha. 49Ayake echiti, Lekani, tiŵone kano Eliya azampuzumusye. [Muyake eula fumo emlasa mchitumba: mwifuma manzi na mlopa.] 50Naye Yesu elila soti na malizu akuru nosindika mzimu wake. 51Nipo ŵonani, chinyula chochinga cha mchipupilo chipazuka pakati kufumila kumulu mpaka pansi; na charo chisung'unzika, na maluŵambe eng'anuka, 52na mitupa izuliwa, na vitanda vinyinji vya asanto enze mtulo vizyushiwa; 53efuma mmitupa pavuli pozyuka kwake noloŵa mu mzinda wozila noŵaŵonekera anyinji. 54Lomba kenturiyo na aŵo ŵenze naye pamo enzomlolesya Yesu pechiŵona chisung'unzyo cha charo na vintu vichitika eyopa ngako echiti, Ni chendi uyu enze Mwana wa Mlungu. 55Naŵo anakazi anyinji enzepo enzololesya kutali, amene emkonka Yesu kufumila ku Galilaya nomtumikila: 56pali paŵo penze Mariya Magadalene, na Mariya anyina a Yakobo na Yose, na anyina a ŵana a Zebedayo.

57Nipo chikaze chingulo echiza muntu msambazi wa ku Arimateya zina lake Yosefe, wamene uyo soti enze msambili wa Yesu: 58uyu echiya kwa Pilato nosenga chitanda cha Yesu. Pamene apo Pilato esuzula chiuliwe. 59Naye Yosefe echiula chitanda, echipombezya na nyula ituŵa, 60echiika mchikwe chake mwine chalomba chechifokola mchimwala: naye ekunkuzizyapo mwala ukuru pa mulyango wa chikwe noimapo. 61Naye Mariya Magadalene enzepo, na Mariya muyake, enzenkezi pafupi na msitu.

62Nipo mmawa mwake, nilo siku lokonkana na Chiwamizyo, akuru a ansembe na Afarisayo eungana kwa Pilato 63echiti, Kalonga, talukana kuti woŵepa ula echiti penze moyo, Siku la mazo nize nizyuke soti. 64Teti suzulani kuti msitu uzalishiwe mpaka mazo, kano angaze asambili ŵake nompunsha nonena ku ŵantu, Wazyuka kwa akufwa: nawo mpumvya wosalilila uzopule ula wotatika. 65Pilato eŵanenera, Muli naŵo achilindila: nkamuyani, kauzalisyeni umo mmukumira. 66Naŵo echiya echizalisya chikwe nochimatilila mwala, na achilindila enze naŵo pamo.

Currently Selected:

M. Mattayo 27: MA23

Highlight

Copy