M. Mattayo 26

1NIPO yenzepo akasile Yesu malizu aŵa ŵonse eŵauzya asambili ŵake, 2Muziŵa kuti akazosila masiku aŵiri likuza pasaka, na Mwana wa muntu azavumbuliwe kupachikiwa pa msalaba. 3Pamene apo elongana akuru a ansembe na akuruakuru a ŵantu ku nsaka ya mkuru wa ansembe woitiwa Kayafa; 4naŵo enzopangana umo mwati amkatile Yesu pochenjera nompaya. 5Lomba echiti, Nte pa siku likuru, pangaŵe chiwawa pa ŵantu.

6Apo Yesu peenze mBetaniya mnanda ya Simoni wa manzonzo 7emzila mwanakazi enze na lukunku la alabastero la mafuta ŵonunkila a chitema chikuru, eŵatira pa mutu wake penzenkezi pakulya. 8Lomba asambili pechiŵona enyeka mitima echiti, Kwachenekeranji teti? 9Pakuti aŵa mafuta sembe esitiwa zinyinji nopewa kwa akavu. 10Sembe Yesu pechiziŵa eŵanenera, Mumzingwisyiranji mwanakazi? wachita mulimo uweme pali neo. 11Pakuti akavu muli naŵo nsiku zyonse pamo namwe, sembe neo ntemuli nane nsiku zyonse. 12Paŵatira mafuta aŵa pa muŵili wangu wachita ichi koŵikiwa kwangu mu msitu. 13Lezee numnenelani, Pali ponse evangelo iyi paiti ikoŵirizyiwa mvyaro vyonse, ichi soti chamene chachita mwanakazi uyu chiŵonenewa kuŵa chilukano chake.

14Pamene apo umo wa ŵala kumi na aŵiri woitiwa Yuda Iskariote echiya kwa akuru a ansembe 15echiti, Kansi munipe chinji, ninga nimsokolole kwanu? Naŵo emtemera ndalama makumi atatu. 16Chitatikile pamene apo yeve esakasaka nsita iweme yati amvumbuliremo.

17Lomba pa siku lotatika la mitanda iliye chizamba asambili emzila Yesu echiti, Mupangwa tikawamizyetu kuni kuti mulyereko pasaka? 18Echiti, Nkamuyani ku mzinda kwa chite nonena naye, Msambizi akuti, Nsita yangu yafwikila; nize nichite pasaka kwanu pamo na asambili ŵangu. 19Asambili naŵo ŵechita umo Yesu mwechiŵauzizya, ewamizyatu pasaka. 20Lomba chikaze chingulo enzenkezi pakulya pamo na asambili kumi na aŵiri; 21naye peŵenzekulya echiti, Lezee numnenelani kuti umo wa mweo anivumbule. 22Naŵo ŵendandaula kwene kantu ŵeyambolaŵira naye umo umo, Kansi nine, Asikuru? 23Eyasuka echiti, Uyo wapisya kwanja kwake pamo na neo mlulilo, wamene uyo ni ati anivumbule. 24Mwana wa muntu akuya umo mkwilembewera zyake, sembe malilo ku muntu ula wakuvumbuliwa naye Mwana wa muntu! ni chiweme ku muntu ula angati aliyovyalikwe. 25Yuda naye womvumbula eyasuka echiti, Kansi nine, Rabbi? Enena naye, Walaŵira. 26Nipo penzekulya ŵeve Yesu eula mtanda eshukisya nosuna, eŵapa asambili echiti, Ulani, ilyani; uyu ni muŵili wangu. 27Naye eula ntumo eyamika eŵapa echiti, Imwamoni monse, 28pakuti uyu ni mlopa wangu wa mapangano wovwishiwa kwanyinji kolekera viipa. 29Lomba nunena namwe, Sinti nimweko soti chotwala ichi cha mpesya mpaka siku lila linti nikamweko chalomba pamo na mweo mu ufumu wa Ŵata ŵangu.

30Naŵo akaimbe nzimbo eimamo na kuya ku lupiri lwa Elaya.

31Pamene apo Yesu enena naŵo, Mweo monse mpilingishiwe pali neo usiku uno: pakuti kwilembewa, Nize nimnyate chiŵeta, na mbelele zya mpingo zize zimwazike ng'ondo. 32Sembe nikazozyuka nize nimtangulileni ku Galilaya. 33Lomba Petro eyasuka enena naye, Chukanga ŵonse apilingishiwe pali mweo, neo sinti nopilingishiwa. 34Yesu echiti kwake, Lezee nukuuzya kuti usiku uno kombwe pakaliye nolila weo unikane katatu. 35Petro emnenera, Chukanga nifwe pamo namwe, sinti nimkaneni. Naŵo asambili ŵonse elaŵira tetyo.

36Nipo echiya Yesu pamo naŵo pa malo poitiwa Getsemane, echiti kwa asambili ŵake, Nkalani pano, neo nikuyolomba uko. 37Naye echiya pamo na Petro na ŵana aŵo aŵiri a Zebedayo, eyambondandaula novukuma mtima ngako. 38Nipo enena naŵo, Mzimu wangu undandaula kwene kantu mpaka kufwa: nkalani pano na kuŵa tuni pamo nane. 39Naye echiya pantanzi patonto echiwa uvuname, elomba kuti, Aa Ŵata, kati kukakumika ntumo ino naipitilile pali neo: lomba nte umo mnupangwila neo, sembe mmupangwila mweo. 40Nipo eŵazila asambili, eŵafwanga enze ntulo echiti kwa Petro, Mweo, simngasimpe nane kansita katonto? 41Simpani nolomba, mngaloŵe mkuyezyewa: mzimu upangwa chendi, sembe muŵili ni wolenda. 42Soti pakaŵiri ewererako esenga kuti, Aa Ŵata, kati iyi ntipitilila nikakana kumwamo, kupangwa kwanu nakuchitiwe. 43Nipo echiza soti eŵafwanga enze mtulo, pakuti menso ŵaŵo elemelwa. 44Naye eŵasiya soti ewererako esenga pakatatu kulaŵira soti malizu ŵamo na ŵamo. 45Nipo eŵazila asambili enena naŵo, Nkamuyonani lomba nopumula: ŵonani, nsita yafwikila. Mwana wa muntu ovumbuliwa mmanja mwa ŵoifya. 46Ukani takuya: ŵonani, uyo onivumbula ali pafupi.

47Nipo akalulaŵira, ŵonani, Yuda umo wa ŵala kumi na aŵiri echiza, enze na liumba likuru lina vinkalammanja na minkulu, lufumila kwa akuru a ansembe na akuruakuru a ŵantu. 48Lomba uyo emvumbula eŵauzya chiziŵikwilo echiti, Uyo unti nikafyonte ni wamene: mkateni. 49Lombalomba emzila Yesu echiti, Timuŵoneni, Rabbi, nomfyontesya. 50Yesu emnenera, Muyangu, chita icho chawazila. Pamene apo ŵechiza ŵemvumbatila Yesu nomuula. 51Nipo ŵonani, umo wa aŵo ŵenze naye Yesu etambulula kwanja kwake, esolola chinkalammanja chake nomnyata kapolo wa mkuru wa ansembe nomtenda kwatu. 52Yesu emuuzya, Wezya chinkalammanja chako mchilalo cha chine: pakuti ŵonse okata chinkalammanja azachenekeke na chinkalammanja. 53Ulinga kansi kuti siningamsenge Ŵata, naye lomba pano angatume kwangu ma wingo a malaika kupula kumi na aŵiri? 54Kati ni teti nga malembo aŵo angasilizike syani echiti kuze kuŵe teti? 55Pa nsita ila Yesu enena naŵo maumba, Mwafuma kansi na vinkalammanja na minkulu kunikata neo nga nine nyalufwimbi? Nsiku na nsiku nenzonkala mchipupilo kusambizya, namwe muliyonikata. 56Lomba ivi vyonse vyachitika kuti malembo a aŵirizi asilizike. Pamene apo asambili ŵonse emsiya noutuka.

57Naŵo ŵala emkata Yesu emtanguzya kwa Kayafa mkuru wa ansembe, pamene pala penzolongane alembi na akuruakuru. 58Petro naye emkonka patali ku nsaka ya mkuru wa ansembe, eloŵa nonkala pamo na manjolinjoli kuŵona nsilililo. 59Lomba akuru a ansembe na akuru ŵonse a milandu esaka untoni wa wenye womsusya Yesu kuti ampaye; 60naŵo aliyoufwanga, chukanga zichiza ntoni zinyinji zya wenye. Lomba pavuli pake zichiza ziŵiri 61zichiti, Uyu muntu echiti, Ningachisapule chipupilo cha Mlungu nochimanga masiku atatu. 62Lomba mkuru wa ansembe epanama enena naye, Suyasuka kantu? ichi ni chinji chakukusimikizya? 63Sembe Yesu enze cherere. Nipo mkuru wa ansembe emnenera, Nukulapisya kwa Mlungu wamoyo utiuzye kati niwe Kristo, Mwana wa Mlungu. 64Yesu enena naye, Mwalaŵira: lomba nunena namwe, Chitatikile lomba mze mumuŵone Mwana wa muntu alinkezi ku kwanja kwendi kwa vizo na kuza pa mikumbi ya kumulu. 65Pamene apo mkuru wa ansembe epezula minjira yake echiti, Uyu wanenera Mlungu msikila: tusakiranji ntoni ziyakene? ŵonani, lomba mwamvwa msikila uyu: 66mulinga syani? Ŵeve eyasuka echiti, Owamila kufwa. 67Nipo emtira mata pa chinso nomgung'ulagung'ula: ŵambine emnyata malupi 68echiti, Losya kuli seo, we Kristo: wakunyata ni ŵani?

69Lomba Petro penzenkezi pa luŵanza chimzila chituntulu chichiti, Nawe soti wenze na Yesu wa ku Galilaya. 70Sembe yeve ekana pa menso pa ŵonse echiti, Ntenuziŵa chiunena. 71Naye akafumile ku lukoro chituntulu chiyake chimuŵona chiuzya aŵo ŵenzepo, Uyu muntu soti enze na Yesu Mnazarete. 72Naye ekana soti na njazi kuti, Ntenumziŵa muntu. 73Nipo kansita katonto aŵo epanamapo echiza enena na Petro, Ng'aleze niwe soti wa aŵo, pakuti malaŵililo ŵako okusokolola. 74Pamene apo eyamboshamika nolapa kuti, Ntenumziŵa muntu. Lomba pano apa kombwe elila. 75Petro naye elikumbukila lizu lyechinena Yesu, Pakaliye nolila kombwe unikane katatu. Naye efumila kunja nolila kosinsima.

Currently Selected:

M. Mattayo 26: MA23

Highlight

Copy