M. Mattayo 24

1LOMBA Yesu efuma mchipupilo enzekuya; naŵo asambili ŵake ŵemzila kumlangizya mamangiwilo a chipupilo. 2Naye eyasuka echiti kwaŵo, Simuviŵona ivi vyonse kansi? lezee numnenelani, Nteuti usiiwe pano mwala umo pamulu pa uyake wamene nteuti uzogodomolewe.

3Nipo yeve penzenkezi pa lupiri lwa Elaya emzila asambili pansei echiti, Tiuzyeni, ivi viŵepo zuŵanji? ni chinji chiti chiŵe chiziŵikwilo chakuza kwanu, nosilizika kwa nsita ino? 4Yesu eyasuka eŵanenera, Nkochenjerani muntu asamluvisyani. 5Pakuti ŵanyinji ŵaŵaze pa zina langu nonena, Ne nne Kristo, noŵaluvisya anyinji. 6Muze mumvwe vya nkondo na mbili zya nkondo: ŵonani kuti msafipa mitima: pakuti ivi sivingalekoŵapo, lomba kusila kukaliye. 7Chikomo mtundu uukirane nosusyana na mtundu, na ufumu kususya ufumu: soti viŵemo vilala noteng'endeka kwa vyaro mmalo mmalo. 8Sembe ivi ni chiyambi cha mazuzyo. 9Pamene pala azamvumbuleni ku matamano nompayani, namwe mze mtinkiwe na mitundu yonse chikomo cha zina langu. 10Pamene pala anyinji azapilingishiwe nosokololana notinkana. 11Anyinji aŵirizi achipazyo azauke noluvisya anyinji. 12Nipo chikomo chopasya viipa chitemwano cha anyinji chimyalale. 13Sembe uyo ati akoselele kuza na kunsindiko, wamene uyo azapuzumuke. 14Evangelo iyi yofumu yakuŵirizyiwa pa charo chonse chakunkalapo ŵantu yakuŵa untoni ku mitundu yonse; pamene apo ninga kuze kusila.

15Teti apo mkazoŵona mapasuliwe a tanta, ŵala enenewa na Daniyele muŵirizi, alupaname pa malo pozila (wamene uyo opendapo naziŵe), 16pamene apo aŵo ali mu Yudaya nautukire ku malupiri: 17uyo ali pa mtenje wa ng'anda asasika kufumya vila viri mng'anda yake: 18uyo naye ali pa munda asawera kuzoula chovwinikila chake. 19Malilo kwa ŵala ana vumo na ŵala onyonsya pa nsiku zila! 20Namwe sengani kuti kuutuka kwanu kusaŵa pa mwera, pambi pa sabata: 21pakuti pamene apo paze paŵe mkululusyo ukuru, siwenzepo wotetyo chitatikile pa chiyambiyambi cha charo kuza na lero, inde, sipati paŵe wotetyo. 22Angati ziliyochepeshewa nsiku zila sembe uliye nopuzumukapo muŵili weka umo: sembe chikomo cha ŵala ŵotoŵolewa nsiku zila zize zichepeshewe. 23Kati muntu akati kuli mweo pamene pala, Ŵonani, Kristo ali pano, kano, Ali uku, msamvwila. 24Pakuti azauke ŵolipazya Kristo na aŵirizi achipazyo, amene ati azaŵonesye viziŵikwilo na vyozizwisya vikuru, lona kuti aŵaluvisye kati kukakumika chukanga aŵo otoŵolewa. 25Ŵonani, namuuzyirani kaŵera pakukaliyoŵapo. 26Teti kati akati kwanu, Ŵonani, ali mmalambo, msayako: Ŵonani, ali mvipinda vya kuntambo, msamvwila. 27Pakuti nga ni umo kalaŵelaŵe mkofumila ku matulilo a zuŵa noŵonekera chukanga mpaka ku maloŵero, ni mkuti kuŵere kufwika kwa Mwana wa muntu. 28Pali ponse pali chitumbi, pamene pala paze paungane makuŵi.

29Lomba pano apa, akazosila matamano a nsiku zila, zuŵa lize lifipishiwe, na mwezi nteuti uzotuŵe, na ntandala zize zipone kufumila kumulu, na mpamvu zya kumulu zize zisung'unzikiwe. 30Pamene apo ni pechiti chize chiŵoneke mululu chiziŵikwilo cha Mwana wa muntu: pamene apo mitundu yonse ya mcharo cha pansi ize imbume: nayo ize imuŵone Mwana wa muntu akuza pa makumbi a mululu ana vizo na mchinzi ukuru. 31Naye azatume malaika ŵake nolila kwa mbata ikuru, naŵo azaŵalonganike pamo ŵosaluliwa ŵake a pa mpepo zine, kufumila kunsilililo kwa mululu kuza na kunsilililo kuyake.

32Lomba pali chiku sambilani linganizyo lake: apo lomba msambo wake pauli uŵisi notumba matepo ŵake muziŵa kuti mainza apanamila; 33tetyo namwe soti mkazoŵona ivi vyonse ziŵani kuti yeve wapanamila, inde pa mulyango. 34Lezee numuuzyani, Luko luno silingalope mpaka ivi vyonse paviti visilizike. 35Charo cha kumulu na cha pansi vize vilope, sembe malizu ŵangu sangolopa. 36Lomba zya siku lila na kamfunda kala paliye muntu oziŵa, chukanga malaika a kumulu, chukanga Mwana, sembe Ŵata ŵeka. 37Umo mwenzele masiku a Nowa ni mkuti kuŵere kufwika kwa Mwana wa muntu. 38Nga ni pa masiku ŵala pakaliyekuza manzi a yamba mwenzolyera na kumwa, nolingulana nolingulisyana, mpaka siku lila lyechiloŵeramo Nowa mchiwato, 39naŵo nteziŵa mpaka yamba pelichiza noŵakokolola ŵonse, ni mkuti kuŵere kufwika kwa Mwana wa muntu. 40Pamene apo azaŵe mmunda analume aŵiri; umo auliwe, umo asiiwe: 41anakazi aŵiri ati azaŵopera pa mpero; umo auliwe, umo asiiwe. 42Teti iŵani tuni: pakuti simuziŵa siku lakuza Asikuru ŵanu. 43Lomba ziŵani ichi, chakuti mwine wa ng'anda angati eziŵa nsita yolonderana yakuza njivi, sembe echesya, sembe aliyozomezya kuti ng'anda yake ituliwe. 44Teti namwe soti mwakuŵa menso: pakuti pa kamfunda kamsalingilila akuza Mwana wa muntu. 45Ni ŵani kansi kapolo ula wozomereka na wa nzeru, wechiika asikuru ŵake pa ŵala a mnanda yake, kuŵapa vilyo vyaŵo pa nsita yake? 46Wa shuko ula kapolo wamene asikuru ŵake pakuza wati afwange ochita teti. 47Lezee numuuzyani kuti azamuŵike pa vyonse vyali navyo. 48Sembe kati kapolo ula muŵipa akati mu mtima wake, Asikuru ŵangu achelwa, 49noyambonyata akapolo ayake, na kulya na kumwa pamo na ŵokolwa; 50asikuru ŵa kapolo ula aaze pa siku lasalolera yeve na pa kamfunda kasaziŵa yeve, 51azamtendetende nomchisya kuŵa pamo na ŵolipazya: kwamene kula kuze kuŵe kulila nokukuta menu.

Currently Selected:

M. Mattayo 24: MA23

Highlight

Copy