M. Mattayo 23

1PAMENE apo Yesu elaŵira na maumba na asambili ŵake 2echiti, Alembi ŵala na Afarisayo onkala pa chilimba cha Musa: 3teti kuuzya viri vyonse vyakumuuzyani vichiteni novisunga, sembe kuchita msachita umo mwakuchitira ŵeve; pakuti oingolaŵira, lomba ntochita yai. 4Inde, omanga mitolo yolema yosatwalika, noitwika pa mapewa a ŵantu, sembe ŵeve ŵeka sangainyezye na munwe waŵo. 5Milimo yaŵo yonse oichita kuti aŵonekere ku ŵantu: pakuti otuvulula tumicheka twa myendero yaŵo, nokuzya mpomponje, 6notemwa vikalo vya mchinzi pa vipotwa, na vilimba vya mchinzi mmasunagoge, 7na malonjero a pa walo, noitiwa na ŵantu Rabbi. 8Sembe mweo msaitiwa Rabbi: pakuti umo ni msambizi wanu, namwe monse nimwe pokwanu. 9Msatula muntu ausu wanu pa charo chino: pakuti umo ni Ausu wanu, wamene ula wa kumulu. 10Pambi msaitiwa asikuru: pakuti umo ni asikuru wanu, ni Kristo. 11Lomba wamene uyo operemera muli mweo aŵekuŵa mtumiki wanu. 12Ali wonse ati alitumpule yeka azasishiwe, naye ali wonse ati alisisye azatumpuliwe.

13Malilo kwanu, mwalembi na Afarisayo, mwaŵolipazya! pakuti musinkizya ufumu wa kumulu ku ŵantu: simuloŵamo mwaŵene, pambi simuzomezya aŵo oloŵamo kuloŵamo.

[14Malilo kwanu, mwalembi na Afarisayo, mwaŵolipazya! pakuti mukhamula ng'anda zya anakazi ŵofwilwa pamene pamulomba kolipazya na malizu anyinji: chikomo chake ni pamti mpinguliwe chiŵichiŵi ngako.]

15Malilo kwanu, mwalembi na Afarisayo, mwaŵolipazya! pakuti muzeŵentapo pa mmana na pasilya kuchisya umo woyaruka; nipo pamene akati ŵeni teti mumchisya mwana wa gehenna kupula mweo kaŵiri.

16Malilo kwanu, mwasululi ŵotulika menso, amene mkuti, Ali wonse ati alapizye pa chipupilo paliye kantu, sembe ali wonse ati alapizye pa goldi la mchipupilo ana mangaŵa. 17Mwe vipuŵa notulika menso: chikuru ni chini, goldi kansi kano chipupilo chulizizya goldi? 18Soti, Ali wonse ati alapizye popupila paliye kantu, sembe ali wonse ati alapizye pa mtulo uli pamulu pake ana mangaŵa. 19Mwe ŵotulika menso: chikuru ni chini, mtulo kansi kano popupila pouzizya mtulo? 20Teti wamene ula olapizya popupila olapizya peve na pa vyonse viri pamulu pake. 21Wamene ula olapizya pa chipupilo olapizya pa cheve na pa uyo onkalapo palapa. 22Naye wamene ula olapizya kumulu olapizya pa chilimba cha Mlungu na pa uyo onkalapo pamulu pake.

23Malilo kwanu, mwalembi na Afarisayo, mwaŵolipazya! pakuti mupeleka chimo cha mkumi cha chiŵoleŵole na mpiripiri na wengo, noleka vyamchinzi vya mdango, upinguzi na lusungu na chizomerezyo: ivi mngati mwivichita, vila navyo nkasa mngati muliyovileka. 24Mwasululi ampofu, mukasansamula kaimbu, sembe ngamila muimera.

25Malilo kwanu, mwalembi na Afarisayo, mwaŵolipazya! pakuti musuka kunja kwa ntumo na kwa lulilo, sembe mkati mwake muluzule uchenjezi na usalikanya. 26We Mfarisayo we mpofu, tangomsuke mkati mwa ntumo na mlulilo, kuti kunja kwake soti kuŵe kosukiwa.

27Malilo kwanu, mwalembi na Afarisayo, mwaŵolipazya! pakuti mulingana na mitupa yotuŵishiwa, iyo kunja yuŵoneka iweme, sembe mkati iluzule vifupa vya akufwa na usali wonse. 28Tetyo namwe soti kunja muŵoneka ŵolungama ku ŵantu, sembe mkati muluzule kulipazya na vyoifya.

29Malilo kwanu, mwalembi na Afarisayo, mwaŵolipazya! pakuti muimanga misitu ya aŵirizi noisamika mitupa ya ŵolungama, 30na kuti, Tingati tenzepo seo pa nsiku zya ausu wasu sembe tiliyosanzyana naŵo pa mlopa wa aŵirizi. 31Tetyo mulisimikizya mweka kuti nimwe ŵana a ŵala eŵapaya aŵirizi. 32Zuzyani nakale mlingo wa ausu wanu. 33Mwe njoka, mwe ŵovyalikwa kwa alupola, muze mpuzumuke tyani popinguzi wa ku gehenna? 34Chifukwa choteti, ŵonani, ni panutuma kuli mweo aŵirizi na anzeru na alembi; ŵambi ŵa aŵo muŵapaye noŵapachika pa msalaba; ŵambi ŵa aŵo muŵakwapule mmasunagoge ŵanu noŵakululusya mmunzi na mmunzi: 35kuti umzileni mlopa wonse wolungama wivwishiwa pa charo, kuyambila pa mlopa wa Abele ula wolungama kuza na mlopa wa Zakariya mwana wa Barakiya wimwipaya pakati pa malo ŵozila na popupila. 36Lezee numnenelani, Ivi vyonse viŵazile a luko luno.

37Aa Yerusalemi, Yerusalemi, wamene uŵapaya aŵirizi, noŵapozera myala aŵo ŵotumiwa kwake! kangani kansi kenisaka kwalonganika ŵana ŵako, nga ni nkuku myulonganikira tusiyosiyo twa ine mmapapiko a ine, namwe mwikana! 38Ŵonani, ng'anda yanu yusiiwa kwanu ya chiza. 39Pakuti numuuzyani, Simti muniŵone neo kuyambila lomba mpaka pamti mze mnene, Woŵirikila uyo akuza mzina la Asikuru.

Currently Selected:

M. Mattayo 23: MA23

Highlight

Copy