M. Mattayo 22

1NAYE Yesu eyasuka elaŵira naŵo soti mmalinganizyo echiti, 2Ufumu wa kumulu upalana na mfumu ngana yamene imteŵetera mwana wake vipotwa vya ntengo, 3ituma akapolo ŵake kwaita ku ntengo ŵala oitiwa: naŵo ekana kuza. 4Soti ituma akapolo ŵambi ichiti, Kaŵauzyeni ŵala oitiwa, Ŵonani, nateŵetera futira vyakulya vyangu: ng'ombe zyangu na zyonona zipaiwa, na vyonse vyaikiwilatu: izani ku vipotwa. 5Sembe ŵeve enyanyaizya na kuya, umo ku munda wake mwine, muyake ku makweo ŵake: 6naŵo esalapo eŵakata akapolo ŵake, eŵamvwisya vyankanza eŵapaya. 7Nipo mfumu inyeka mtima, ituma maumba ŵake a nkondo, iŵapululusya ŵala achipaya, noshoka munzi waŵo. 8Pamene apo inena naŵo akapolo ŵake, Vya ntengo vyaikiwilatu, sembe aŵo eitiwa ntenze ŵowamila. 9Teti nkoyani ku njiramampindwe: ali ŵonse amti mfwange ŵaiteni ku vipotwa. 10Naŵo akapolo ŵala echiya ku njira, eŵalonganika ŵonse ŵechifwana aipa na aweme: nayo ntengo izula na ŵenzepo. 11Lomba ikaloŵe mfumu kwaŵona ŵala ankalamo iŵonamo muntu enzeve chovwala cha ntengo: 12inena naye, Muyanguwe, waloŵa syani muno ulive chovwala cha ntengo? Naye enze nuu. 13Lomba mfumu ichiti kwa akapolo ŵake, Mmangeni manja na mendo, kampozeni ku mfinzi ya kunja; kwamene uko kuti kuŵe kulila nokukuta menu. 14Chikomo ŵoitiwa ni ŵanyinji, sembe ŵosaluliwa ni ŵopendeka.

15Nipo Afarisayo echiyoyeruzyana mwati amkatile mkulaŵira kwake. 16Etuma kwake asambili ŵaŵo pamo na ŵene Herode echiti, Msambizi, tuziŵa kuti nimwe achendi, muisambizya njira ya Mlungu pa vyendi, simupwerera muntu ali wonse: pakuti simulola chinso cha ŵantu. 17Tiuzyeni nakale, Mulinga syani? Kansi ni chozomereka kumsonkera Kaisari msonko, kano ntemo? 18Sembe Yesu eziŵa uŵi waŵo echiti, Ni chinji pamuniyezya, mwe mwaŵolipazya? 19Nilangizyeni ndalama ya msonko. Naŵo emletera kobiri. 20Eŵanenera, Nga ichi chimvwirimvwiri na malembo ni vya ŵani? 21Enena naye, Ni vya Kaisari. Pamene apo echiti kuli ŵeve, Teti mopeleka kwa Kaisari vintu viri vya Kaisari, na kwa Mlungu vintu viri vya Mlungu. 22Naŵo akamvwe teti ezizwa, emsiya eimapo.

23Siku lamene lila echiza kwake Asaduki, amene akuti kuuka kwa akufwa kuliye: emkonsha 24echiti, Msambizi, Musa enena, Kati muntu akafwa chiliye mwana mkwaŵo napyane mkazi wake novyalira mkwaŵo ŵana. 25Lomba enzeko kwasu pokwaŵo asano na aŵiri: wotatika elingula echifwa, lomba enzeve mwana, mkwaŵo ni pechipyana mkazi wake; 26na wakaŵiri soti tetila, na wakatatu, mpaka ku wakasano na kaŵiri. 27Nipo pavuli paŵo ŵonse na mwanakazi echifwa. 28Teti mkuuka uko kwa akufwa azaŵe mkazi wa ŵani wa aŵo asano na aŵiri? pakuti ŵonse enze naye. 29Yesu eyasuka enena naŵo, Muluvya pamsaŵaziŵa malembo kano mpamvu ya Mlungu. 30Pakuti mkuuka kwa akufwa ntolingula kano kulinguliwa: olingana na malaika kumulu. 31Lomba zyouka kwa akufwa mkaliyopenda kansi zila zinenewa kwanu na Mlungu zyakuti, 32Neo nne Mlungu wa Abrahamu, na Mlungu wa Isake, na Mlungu wa Yakobo? Mlungu nte wa akufwa, sembe wa amoyo. 33Naŵo maumba akamvwe ezizwa na chiyeruzyo chake.

34Lomba Afarisayo apo akamvwe kuti waŵakanya Asaduki ŵemyalala eungana pamo. 35Naye umo wa aŵo, wosambizya dango, emkonsha komuyezya echiti, 36Msambizi, tetulo likuru la mdango ni lini? 37Emuuzya, Womtemwa Asikuru Mlungu wako na mtima wako wonse, na moyo wako wonse, na nzeru zyako zyonse. 38Ili ni tetulo likuru lotatika. 39Na lakaŵiri lupalana nalo ni ili, Womtemwa mwanansi wako nga ni muulitemwera wamwine. 40Pa aŵa matetulo aŵiri mpopachikiwa dango lonse na aŵirizi.

41Lomba Afarisayo akalulongane Yesu eŵakonsha ŵeve 42echiti, Nga uyo Kristo mumlinga syani? ni mwana wa ŵani? Enena naye, Ni wa Davide. 43Echiti kuli ŵeve, Nga Davide omtuliranji pa Mzimu Asikuru, echiti,

44Asikuru echiti kwa Asikuru ŵangu,

Nkala weo kwanja kwangu kwendi,

Mpaka penti niŵaike ŵopatana nawe pansi pa malwayo ŵako?

45Teti Davide pakumtula yeve Asikuru, ni mwana wake syani? 46Penzeve na umo ekumomyasuka lizu, penzeve muntu kuyambila zuŵa lamene lila ekosa mtima kumkonsha soti kantu.

Currently Selected:

M. Mattayo 22: MA23

Highlight

Copy