Luka 19

1NAYE eloŵa enzopita pa Yeriko. 2Lomba ŵonani, muntu woitiwa zina lake Zakkeyo; enze mkuru wa msonko, naye enze msambazi. 3Naye esakomuŵona Yesu kuti ni ŵani; lomba aliyokumako chikomo cha winji, pakuŵa mfupi. 4Naye eutukila kuntanzi nokwera mchimuti cha mtanta kumuŵona: pakuti esakopitilila pa njira yamene ila. 5Nipo Yesu akafwike pamene etumpula menso nomuuzya kuti, Zakkeyo, puvyosika; pakuti lero nikankale pa ng'anda pako. 6Naye epuvyosika, empokelela notemwa. 7Naŵo akaŵone eng'onima ŵonse echiti, Wayoloŵa kunkala na muntu woponta. 8Naye Zakkeyo epanama echiti kwa Asikuru, Ŵonani, Asikuru, nuyaŵa pakati chuma changu noŵapa akavu; nane nikachenjerera ali wonse numuwezezya kane. 9Nipo Yesu emuuzya, Lero upuzumushi wazila ng'anda ino, pakuti yeve naye ni mwana wa Abrahamu. 10Pakuti Mwana wa muntu echizosaka nopuzumusya chotaika.

11Naŵo penzekumvwa ivi eyangizyapo nosimika linganizyo, pakuti enze pafupi na Yerusalemi, na kuti ŵelinga kuti ufumu wa Mlungu uŵoneke lomba pano. 12Teti echiti, Mwanangwa chite echiya ku charo cha kutali kuyolipokera ufumu nowerako. 13Naye eita alumbwana ŵake kumi, noŵapa ndalama kumi zya mina noŵauzya, Chitani nazyo makweo mpaka penti niwere. 14Sembe a mmunzi wake emtinka, etuma nkalamba kumsenselela kuti, Se situpangwa muntu uyu aŵotiyondolola. 15Lomba yenzepo akapoke ufumu nowerako euzya alumbwana ŵala ŵechipa ndalama aitiwe kwake, kuti aziŵe zyechishukamo pochita makweo. 16Wotatika echiza pa menso pake echiti, Asikuru, ndalama yanu nishuka nayo ndalama kumi ziyakene. 17Echiti kwake, Chiweme, we mlumbwana muweme; pewenze wochetekereka pa katontotonto uŵe na nsaka ya minzi kumi. 18Na wakaŵiri echiza echiti, Asikuru, ndalama yanu nishuka nayo ndalama zisano ziyakene. 19Echiti kwake soti, Nawe kumo uŵe pa minzi isano. 20Na muyake echiza echiti, Asikuru, ŵonani, si iyi ndalama yanu, inisunga yovungiwa mkanyula: 21pakuti nimuyopani, pamuli ŵantu ayumu mtima; muula chimuliyoŵika pansi nowezya chimuliyokomola. 22Echiti kwake, Mkanwa mwako wamwine ni mniti nkupingule, we mlumbwana muŵipa. Wiziŵa nine muntu muyumu mtima, nuula chiniliyoŵika pansi nowezya chiniliyokomola; 23teti nga nchinji pauliyopezya ndalama yangu kwa ŵala oyapuzisya, nane panaza sembe nailonda na pindu lake? 24Naye eŵauzya aŵo enzepeneme pafupi, Mulondeni ndalama iyo nompa uyo ali nazyo ndalama izyo kumi. 25Naŵo enena naye, Asikuru, ana ndalama kumi. 26Neo numuuzyani kuti ku ali wonse ali nako kuze kupewe; sembe kwa uyo aliye kantu, chukanga ako kali nako kaze kalondewe kwake. 27Lomba aŵa onipata, asapangwa neo noŵayondolola, izani naŵo kuno noŵapaya pa menso pangu.

28Naye akalaŵire teti epitilila kuyave ku Yerusalemi.

29Lomba yenzepo pechipanamila ku Betefage na Betaniya, ku lupiri luitiwa lwa Elaya, etuma aŵiri a asambili ŵake 30echiti, Nkoyani ku munzi woteezyana namwe; mkaloŵamo mfwange kabulu kakaliyokwerapo na muntu; kamangululeni mze nako. 31Kati ali wonse akamkonshani, Mukamangululilanji? mkati teti, Asikuru okasaka. 32Naŵo ŵetumiwa eimapo efwanga umo mwaŵauzizya. 33Lomba penzokamangulula kabulu ŵene a kene enena naŵo, Mukamangululilanji kabulu? 34Naŵo echiti, Asikuru okasaka. 35Naŵo echiza nako kwa Yesu: epozapo minjira yaŵo pa kabulu nomnkazikapo Yesu. 36Nipo penzekuya eyanzika minjira yaŵo pa njira. 37Naye penzopanamila lomba, pa msondo wa lupiri lwa Elaya, winji wonse wa asambili witatikosangalala nomlumba Mlungu na malizu akuru ku vyampamvu vyonse viwiŵona; 38wichiti, Yoŵirikila ni Mfumu ikuza mzina la Asikuru: mtendere kumulu, na mchinzi kumulu ngako. 39Naŵo ŵambi a Afarisayo a mu winji enena naye, Asambizi, tuzulani asambili ŵanu. 40Naye eyasuka echiti, Numuuzyani, angati aŵa amyalala myala iyi sembe yasema.

41Naye penzopanamila euŵona mzinda noulilila 42echiti, Ungati uziŵa pa siku lino, weo, vila viri vya mtendere! sembe lomba vyafisiwa pa menso pako. 43Pakuti nsiku ziti zize pali weo zyati akuzinge na linga ŵala opatana nawe, nokusinkizya nokulesya mmbali monse. 44Naŵo azakufwankule, na ŵana ŵako ŵali mkati mwako; sati azasiyemo muli weo mwala umo pamulu pa uyake, chifukwa uliyoziŵa nsita yokuzila kwako.

45Lomba eloŵa mchipupilo eyambofumyamo aŵo ŵositi ya 46echiti kwaŵo, Kwilembewa, Nanda yangu ize yakuŵa nanda yosengeramo: sembe mweo muichisya chikwe cha njivi.

47Naye mazuŵa ŵonse enzosambizya mula mchipupilo. Sembe akuru a ansembe na alembi na akuru a ŵantu esakompaya: 48naŵo aliyofwana mwati achitile; pakuti ŵantu ŵonse emzingilila nompulikana.

Currently Selected:

Luka 19: MA23

Highlight

Copy