Luka 18

1LOMBA eŵasimikira linganizyo lakuti aŵolomba nsiku zyonse nosatembuka; 2echiti, Enzemo mmunzi chipingula wosayopa Mlungu nopwazya ŵantu: 3enzemo na mwanakazi wofwilwa mmunzi mwamene, naye enzomzila kaŵirikaŵiri kuti, Muniwezezyemo ku muyangu wa mlandu. 4Yeve ekana kwa nsita: sembe pavuli pake enena yeka, Chukanga sinumuyopa Mlungu nopwazya ŵantu, 5lomba pakuniŵevya uyu mwanakazi wofwilwa nimuwezezyemo anganivufye posensera kwake. 6Naye Asikuru echiti, Imvwani chechinena chipingula uyu wosalungama. 7Nga kansi Mlungu sangaŵawezezyemo ŵosaluliwa ŵake, amene omkuwila usiku na mzuŵa, ŵakuchitira kalekelezi? 8Numuuzyani kuti apuvyoŵawezezyamo. Sembe akaza Mwana wa muntu kansi azafwange mvwano pa charo cha pansi?

9Naye eŵasimikira soti linganizyo ili ŵambi elichetekera ŵeve ŵeka kuti nise ŵolungama na kwapwazya ŵonse ayaŵo: 10Ŵantu aŵiri echiyoloŵa mchipupilo kulomba, umo ni Mfarisayo, muyake ni wamsonko. 11Mfarisayo ula epanama nosenga teti mwa yeka, Mlungu, numlumbani pakuti sinili neo nga ni mwalili ŵambi, ŵochenjerera, ŵosalungama, a uchende, chukanga nga ni uyu wamsonko. 12Nulitana vilyo kaŵiri sabata limo; nupeleka chimo cha mkumi cha vyonse vinupoka. 13Sembe wamsonko epanama patali, ekanoŵinula chukanga menso ŵake kumulu; elikunta pa chifuŵa echiti, Mlungu, munichitile chifundo neo niluŵipe. 14Nikuti kuli mweo kuti uyu muntu echiya ku ng'anda yake echishiwa wolungama kumpula muyake; pakuti ali wonse olikwezya azasishiwe; sembe wamene olisisya azakwezyewe.

15Nipo emletera malucheche ŵaŵo soti aŵakumye: sembe asambili akaŵone eŵatuzula. 16Sembe Yesu eŵaita kwake echiti, Tulekeni tuŵana tunizile, msatulesya: pakuti ufumu wa Mlungu ni wa toteti. 17Lezee numuuzyani, Ali wonse ati akanopokera ufumu wa Mlungu nga ni kamwana saloŵamo peka patonto.

18Lomba mmbili chite emkonsha kuti, Msambizi muweme, nga nichitenji nikapyane moyo wosasila? 19Yesu enena naye, Unituliranji muweme? paliye muweme sembe umo, ni Mlungu. 20Uŵaziŵa matetulo, Usachita uchende, Usapaya, Usapunsha, Usachita untoni wa wenye, Wolen ekezya auso na anyoko. 21Echiti, Ivi vyonse nuvi unga kutatikila penenze mlumbwana. 22Akamvwe Yesu emuuzya, Chintu chimo chikali chukusoŵa: sita vyonse vyuli navyo noyaŵira akavu, ninga ukaŵe na chuma kumulu: iza wonikonka. 23Sembe akamvwe ivi etatikokwinyilila, pakuti enze na chuma chinyinji. 24Nipo Yesu pomuŵona echiti, Ati kukosa ku msambazi kuloŵa mu ufumu wa Mlungu! 25Pakuti ni chipepu ku ngamila kupita pa liso la mnyenda kupula ku msambazi kuloŵa mu ufumu wa Mlungu. 26Ŵa echimvwa echiti, Nga ni ŵani angapuzumushiwe? 27Lomba echiti, Vyosakumika ku ŵantu ni vyokumika kwa Mlungu. 28Naye Petro echiti, Ŵonani, seo tisiya kwasu nomkonkani. 29Naye eŵauzya, Lezee numnenelani, Paliye muntu esiya ng'anda, kano mkazi, kano akwaŵo, kano emvyala, kano ŵana, chikomo chofumu wa Mlungu, 30wamene ati akanopokera vyopula ngako pa nsita ino, na mcharo chikuza ni moyo wa chilalukile.

31Pamene apo eliulira aŵo kumi na aŵiri eŵanenera, Ŵonani, tikuya ku Yerusalemi, navyo vyonse vilembewa mwa aŵirizi ŵala vize visilizike ku Mwana wa muntu. 32Pakuti azavumbuliwe ku Mitundu, nayo ize imfweye nommvwisya vyankanza nomtila mata: 33ize imkwapule nompaya: nipo siku la mazo azazyuke soti. 34Naŵo aliyoziŵe kantu ka ivi; malizu amene aŵa efisika kwaŵo, naŵo aliyoziŵe vinenewa.

35Lomba yenzepo penzopanamila yeve ku Yeriko, chite wotulika menso enzenkezi mmbali mwa njira nosenga: 36pakumvwa liumba lenzopita ekonsha, Ichi ni chinji? 37Emuuzya kuti ni Yesu Mnazarete opita. 38Naye eŵirikizya kuti, Yesu, mwe mwana wa Davide, munichitire lusungu. 39Nipo aŵo ŵotangula emfyangila kuti amyalale: lomba eŵirikizya kopula ngako, Mwe mwana wa Davide, munichitire lusungu. 40Pamene apo Yesu epanama euzya kuti aletewe kwake: naye akaze pafupi emkonsha, 41Upangwa nikuchitirenji? Echiti, Asikuru, kuti nilole soti. 42Yesu enena naye, Ulole soti: mvwano wako wakupuzumusya. 43Lomba pano apa elola soti nomkonka, kumchinzika Mlungu: naŵo ŵantu ŵonse poŵona emlumba Mlungu.

Currently Selected:

Luka 18: MA23

Highlight

Copy