Luka 14

1LOMBA yenzepo pechiloŵa yeve mnanda ya umo wa akuru a Afarisayo pa sabata kulya mitanda ŵeve ŵenzomlolesya. 2Lomba ŵonani, enzepo pantanzi pake muntu wa lutumba. 3Yesu naye poyasuka enena naŵo adango na Afarisayo echiti, Ni chowamila kansi kupozya pa sabata, kano ntemo? 4Lomba ŵemyalala. Naye emuula empozya emuuzya aye. 5Enena naŵo, Ni ŵani wa mweo akaŵa na bulu kano ng'ombe ikapona mu mbwina sangaizuule kansi lomba pano pa zuŵa la sabata? 6Lomba kwiŵakanga kuyasuka soti ku vintu ivi.

7Naye eŵasimikira linganizyo aŵo ŵeitiwa pechiŵona kuti enzolisalulila vilimba vya mchinzi, echiti kwaŵo, 8Apo ukaitiwa na muntu ku vipotwa vya ntengo usankala pa chilimba cha mchinzi, kano angaitiwe naye muntu wa mchinzi opula weo, 9naye uyo emuitani weo na yeve angazokunenera, Mpe uyu chikalo; pamene apo uzoyambochita nsoni zyonkala pa chikalo cha kuvuli. 10Sembe apo ukaitiwa nkoya nonkala pansi pa chikalo cha kuvuli, kuti akaza uyo ekuita azakuuzye, Chiuza, vwendera iza kuntanzi: ninga uŵe na ulemo pa menso pa aŵo ŵonse alinkezi pakulya nawe pamo. 11Pakuti ali wonse olikwezya azasishiwe, na uyo olisisya azakwezyewe.

12Naye emuuzya uyo soti wamuita, Ukateŵeta vilyo vya mzuŵa kano vya mchingulo usaita viuza vyako kano akwanu, kano enekwanu, kano anansi ŵako ena chuma; kano angakuite soti weo, na malyerano angochitiwa kwako. 13Sembe ukateŵeta winga woita akavu na ŵolemala na ŵopintya na mpofu: 14nawe wakuŵa na shuko; pakuti ŵeve aliye vyokuwezezya: pakuti uzopewe chilambu pozyuka kula kwa ŵolungama.

15Lomba umo wa ŵala enzenkezi pakulya pamo naye akamvwe ivi enena naye, Ana shuko uyo ati akalye mitanda mu ufumu wa Mlungu. 16Sembe yeve emuuzya, Muntu eteŵeta mulalilo ukuru, noita anyinji: 17naye etuma kapolo wake pa nsita yakulya kuyouzya aŵo ŵoitiwa, Izani; pakuti vyonse vyaikiwira katera. 18Naŵo ŵonse na mtima umo etatikochita mpandila. Woyamba emnenera, Nasita munda, nakuya kuuŵona: napapata munilekere. 19Muyake echiti, Nasita malupanda asano a ng'ombe, nikuyoziyezya: napapata munilekere. 20Muyake echiti, Nalingula mwanakazi, ni panakana kuza. 21Nipo kapolo echizomuuzya asikuru wake vintu ivi. Pamene apo mwine wa ng'anda echipya mtima, emuuzya kapolo wake, Nkoya luŵilo mmiseo na mnjira zya mmunzi, iza naŵo muno akavu na ŵolemala na mpofu na ŵopintya. 22Naye kapolo echiti, Asikuru, chimwapanga chachitiwa, na chikalo chilimo. 23Asikuru emuuzya kapolo, Nkoya muli alukulwe na mminda noŵakakamizya kuloŵamo, nanda yangu izule. 24Pakuti nunena namwe kuti yeka umo wa aŵo ŵeitiwa ati alaŵe mulalilo wangu.

25Lomba echiya naye pamo maumba akuru: naye echeuka eŵauzya kuti, 26Ali wonse akanizila, akakanotinka awisi na anyina na mkazi wake na ŵana ŵake na akwaŵo na alongosi, inde, na moyo wake mwine soti, sangaŵe msambili wangu. 27Ali wonse asatwala msalaba wake mwine nonikonka sangaŵe msambili wangu. 28Pakuti ni ŵani wa mweo akasakomanga lipembe ntotangulonkala pansi nopenda chitema cha line, kati ana zyokumanyira? 29Kano akalunduluzya myala ya mmfololwa nosakumakosilizya ŵonse ŵoŵonerera angatatikomseka 30kuti, Uyu eyambomanga, ntekumakosilizya. 31Ni mfumunji paikuyokumana nkondo na mfumu iyake singatangulonkala pansi nopangana kati ina mpamvu na myanda makumi kumi kukumana na ila ikuza kulwa nayo na myanda makumi kumi kupasya kaŵiri? 32Pambine pamene iyake paikali kutali yutuma nkalamba nokonsha mziti ziyanjanirane. 33Tetyo nali wonse wa mweo asaleka vyonse vyali navyo sangaŵe msambili wangu. 34Munyu nawo ni uweme: sembe kati chukanga munyu ukasukuluka ukondeshewe nanji? 35Suwamila kuŵikiwa pa msili kano pa chungu: oingoutaya. Uyo ana matu akumvwa naamvwe.

Currently Selected:

Luka 14: MA23

Highlight

Copy