Luka 13

1LOMBA enzepo ŵambi pa nsita yamene ila amene emuuzya zya Agalilaya, ŵechisanzya Pilato mlopa waŵo na nsembe zyaŵo. 2Naye eyasuka enena naŵo, Kansi mulinga kuti Agalilaya aŵa ŵenze aipa kupula Agalilaya ŵonse pechimvwa mazuzyo aŵa? 3Numuuzyani, Yai: lomba mkakanoyaruka mitima namwe kumo monse mze mchenekeke tetila. 4Kano ŵala kumi na asano na atatu, ŵeliponera lipembe la pa Silowamu noŵapaya, mulinga kuti ŵenze anyaluŵifya kupula ŵonse onkala mu Yerusalemi? 5Numuuzyani, Yai: lomba mkakanoyaruka mitima namwe kumo monse mze mchenekeke.

6Lomba esimika linganizyo ili lakuti, Muntu ngana enze na chiku wozikiwa mmunda wake wa mipesya, naye echizosakiramo vyotwala aliyofwanamo kantu. 7Nipo enena na wolima mipesya, Ŵona, virimika ivi vitatu nikuzosaka vyotwala muli chiku uyu niliyofwanamo: muwisye; ni chinji pakuingolonda msoko? 8Naye eyasuka enena naye, Asikuru, mlekeni na chaka chino, tanganimsakulile noŵikamo vipombwe: 9nipo akatwala pavuli pake naaŵe; sembe kati ntemo, ninga mumtende.

10Naye enzosambizya msunagoge liyake pa zuŵa la sabata. 11Lomba ŵonani, mwanakazi ana mzimu wolwala virimika kumi na visano na vitatu; naye enze wofokoŵala, sangaŵinuke peka patonto. 12Naye Yesu akamuŵone emuita nomuuzya, Mwanakaziwe, wamangululiwa mkulwala kwako. 13Naye emsintilila manja: nipo lomba pano apa eyondololewa nomchinzika Mlungu. 14Lomba mkuru wa sunagoge ponyeka mtima Yesu papozya pa sabata eyampukila eŵanenera maumba, Zuŵapo nsiku zisano na imo zyakukatilamo ŵantu milimo: teti mwakuzopozyewa mzyamene izyo, nte pa siku la sabata. 15Sembe Asikuru emyasuka na kuti, Mwe mwaŵolipazya, kansi mweo monse pa sabata ntemumangulula ng'ombe yake kano bulu wake pa chilyero noipesera ku manzi? 16Nga uyu mwanakazi pakuŵa mwana wa Abrahamu, wechimanga Satana, ŵonani, virimika kumi na visano na vitatu, kansi nte chiweme kumangululiwa pa chomangira ichi pa zuŵa la sabata? 17Naye penzolaŵira ivi, ŵomsusya ŵonse ekolewa nsoni: na liumba lonse litemwa na vyonse vyamchinzi vichitika naye.

18Teti echiti, Nga ufumu wa Mlungu uli nga ni chinji? niulinganisye nanji? 19Ulingana na kambuto ka sinape kechiula muntu nokataya mmunda mwake; nako kekula na kuŵa chimuti, na tuni twa mlulezi twenzonkala mmisambo ya chine. 20Naye echiti soti, Niulinganisye nanji ufumu wa Mlungu? 21Ulingana na chizamba chechiula mwanakazi nochifisa mmilingo itatu ya unga, mpaka wonse pewiŵila.

22Lomba echiya epita pa mizinda na pa minzi enzosambizya noyave ku Yerusalemi. 23Nipo muntu enena naye kuti, Asikuru, kansi ŵala opuzumushiwa ni ŵopendeka? Naye eŵauzya, 24Mokoselela kuloŵa pa mulyango popatikizya: pakuti numnenelani anyinji azasakoloŵapo, sati akumeko. 25Mnecho akati uke nozalapo pa mulyango, namwe mkatatikopanama panja nokunta ku chisasa na kuti, Asikuru, mtizulileko; naye akayasuka nonena namwe, Sinumziŵani kwamwafuma; 26ninga motatikonena, Tenzekulya na kumwa pa menso panu, na mweo mwenzosambizya pa njira zyasu; 27naye anene kuti, Numuuzyani, sinuziŵa kwamwafuma; fumaponi pali neo, mwe mwa milimo iipa. 28Kuze kuŵepo kulila nokukuta menu, apo pamti mkaŵone Abrahamu na Isake na Yakobo na aŵirizi ŵonse mu ufumu wa Mlungu, na mweo mweka ŵopozewa kunja. 29Naŵo azafume ku matulilo a zuŵa na ku maloŵero na ku mpoto na ku mwera nonkala pansi mu ufumu wa Mlungu. 30Lomba ŵonani, alipo ŵosalilila amene azaŵe ŵotangula, alipo ŵotangula amene azaŵe ŵosalilila.

31Pa nsita yamene ila echiza Afarisayo ŵambi echiti kwake, Fumaponi mwakuya: pakuti Herode osakompayani. 32Naye eŵauzya, Kamuuzyeni nkandwe uyo, Ŵona, nufumya viŵanda nopozya lero na mailo, na mazo nize niwamyiwe. 33Lomba nakuya ulwendo wangu lero na mailo na mazo: pakuti sichukumika kuti muŵirizi achenekeke kunja kwa Yerusalemi. 34Aa Yerusalemi, Yerusalemi, uŵapaya aŵirizi noŵapozera myala ŵala otumiwa kwake! kangani kenisakolonganika pamo ŵana ŵako nga ni nkuku myulonganikira tusiyosiyo twa ine mmapapiko a ine, namwe mwikana! 35Ŵonani, ng'anda yanu yusiiwa kwanu ya chiza: nane numuuzyani, Simuniŵona soti mpaka pamti mnene, Ana shuko uyo akuza mzina la Asikuru.

Currently Selected:

Luka 13: MA23

Highlight

Copy