मरकुस 13

मन्दिरान नाशने भविष्यवाणी

(मत्ती 24:1-44; लूका 21:5-33)

1जेवी तो मन्दिरा मायरीन बाहेर निकलीन एतो, तेवी तान चेला मायरीन एक जन ताह कियील, “हे गुरु, देखू केव, एने मोठो दिगुड एने कोहलो मोठो मंदिर हि” 2एने यीशु ने ताह कियील, “तुमूह आज्यो मोठला मंदिराह देखताला: एक दिगुड पुण सुटणार नाहं जो पोडवजाहू नाहं.”

आखरी दिहान चिन्ह

3जेवी तो मन्दिरान ओगांण जैतुनान डोंगरापोर बोहील एतो तेवी पतरस याकूब यूहन्ना एने आंद्रिया ने एखालामाय ताह फुसील, 4“आमूह केवो का ज्याह वातू केव एने एय? हि ताहेरया ज्याह आखा वातू पुरो एय रेंय तर ज्यान नीशाणव काय रेहू” 5एने यीशु ताह केहू लागिल, होमंबालावा रीन वू, कूण तुमूह ठेगहू नाहा. 6कोलाक मारो नावान ते किथी आवूह “मी तोच हि” एने ते कोल्लाकाह थेगणार. 7जेवी तुमूह लेळाय विषय होमलहु, केवहव बातम्या होमबोलणार तर, बिऊ मा: ज्याह वातून एने आवश्यक हि, तेभी पुण ता समयव अंत एय. 8काहाकाय जाती पुर जाती, एने राज्या पुर राज्य चेढाय केरी. एने हर एक जागी भूकंप एय, एने काल पोडती. जो ते पिडान सुरुवात एय जायेल हि.

9“पुण तुमूह होमंबालीन रीवू; काहाकाय माणुह तुमूह सभा मायवोर लावा जाहू, आराधनालय माय चापका मारणार, तुमूह मारी य वजेसे अधिकाऱ्यांन एने राजान ओगांण गवाही आपणे केरता, उबरीन येल रेहू. 10पुण ऐवी आवश्यक हि का पेल आख्यू जात्यूमाय सुवार्ता पोरचार केरनेमाय आवी. 11जेवी ता तुमूह लेणे जाइन होप दियील तेवी पेलरीन चिंता केरुहू मा का आमु काय केहू पुण जो कायता समय पोर केवाय जाय तोच केज्यू काहाकाय बोलणार तुमूह नाहं पुण पवित्र आत्मा हि. 12बाहाक बायाकुच एने आबुक सोराच मारणे केरता देरीन आपण्यू एने सोरा आपणो आहाक आबाकने विरोधामाय उबरीन येल रेयव ताह मारीन टाकणे. 13एने मारो नावाव जेसे आखा तुमरो द्वेष केरुहू पुण जो शेवेट ताहवोर देरीन रेंय ताणुच उद्धार एय.”

मोठला दुखान समय

14पुण जेवी तुमूह “उजाडणार अशुद्ध वस्तूह जाहरी नाय जुवी ताहरी, नाय जुवी तां उबरीईल देखहु वाचणार सोम्जी लेय तेवी जो यहूदियामाय एय तां बोयडा उखेर नाह जाणे जुवी” 15एने जो घेरान छत्तापुर हि, तो तास रेणें जुवी बुंदे उतरणु नाहा कांही लेणेन घेराम सुद्द जाय नाय. 16एने जो खेताम रेंय तो, आपणा फाडका लेणेन पासाण मा हिर केहू. 17पुण तान हाय! हाय! ओहलो जो ता दिहामाय पेटावालव रेहू एने जो सोराह दुध पिवाडनार. 18प्रार्थना केरू का जो हियालामाय एहू नाहा. 19काहाकाय ता दिहामाय ओहलो दुख आवी का, ज्यो बोगवान पृथ्वी बोणाविल तेविरीन ऐवी वोर नाह एनो, एने नाह केवी एय. 20जर बोगवानन ता दिहान थोडो किरील नसतू तर काल्लोज माणुह वोचवनसतू पुण ता ठेरावीलतामाय ताह तान निवाडील हि तान केरता हे दिह थोडो किरील हि. 21तेवी जर कूण तुमूह केनार, देखू, मसीह न्या हि केवहव देखू तो ताहरी हि तर एने विश्वास केरणे मा. 22काहाकाय जुठा मसीह एने जुठा भविष्यवक्ता उठीन उबरीन येल रेहू एने जर शक्य एय गीयो तर जे ठेरावील हि ताह पुण ठेगहू केरसेक्तालू एने ताह आश्चर्य काम एने चिन्हे देखाडणार. काय निवाडीलाह भी भोटकाड देय. 23पुण होमंबालावा रेणेन, देखू मी पेलूच तुमूह केयेल आपील हि.

यीशुन पोशो आवणो

(मत्ती 24:29-31; लूका 21:25-28)

24पुण ता दिहामाय ता दुखांमायबव, सूर्य काळ एय जाहू एने चांद आपणो उजालो आपण्यू नाहं. 25एने आकाशा मायरीन तारा तूटठव रेहू एने आकाशान शक्ती आलविल जाहू. 26तेवी माणुह माणहान सोराह मोठला सामर्थ्य एने महिमा माय आकाशामाय आव तालून देखणार. 27ता टाईमपोर तो आपणा स्वर्गदूतांह मोकलीन, पृथ्वीन टूकेरीन आकाशान ता टोकापूर वोर चारू बाजुरीन आपणा निवाडील माणहाहा एक्ठा केरी.

अंजीरान झाडान वार्ता

(मत्ती 24:32-35; लूका 21:29-33)

28अंजीरान झाडापोरीन ज्यो वार्ता हिकू ताहेरया तान डाल कोमलाएईन तेह एने तामाय पानटा फूटनेण लागणू तेवी तुमूह सेमजव लेनो का होमलव आहने आवा हि. 29ज्यानहोस तुमूह पुण ज्याह वातू एतालोन देखूह तर होमजाडव लेणेन का तो दिह आहने आवा हि नापून बांणेच तो आवा हि. 30मी तुमूह खेरिनच किथे का, जेवी पुर ज्याह आखा वातू पुरो एता नाहं ताहउर ज्यां पिढव नष्ट एय नाहं. 31आकाश एने पृथ्वी एने नाहव शव एईन जाहू पुण मारा वचन रद्द एय नाहं.

जागता रेवो

(मत्ती 24:36-44)

32“तो दिह ता समयान विषयामाय कुणीह नाह मालूम, नाह ते स्वर्गदूता नाह ते सोराह” पुण फक्त पिताह मालूम हि. 33होमंबालावा एईन जा, जागता रीवू वू एने प्रार्थना केरू काहाकाय तुमूह मालूम नाहं का तो ठरावील टाइम केव एने आवूह. 34हे आज्यो माणहान होस हि जो आपणा घेर सोडीन प्रिनासाम गीयो आपणो दासाह अधिकार आपील तान आखा आप आपणा काम कियील एने दरिनाजान रक्षकाह पुण जागे रेनेस कियील. 35ज्यानकेरता जागता रेवू, कारण तुमूह मालूम नाहं तुमरो घेर मालिक जर आवूह हि हांजपोर, रातव, कुकडो आव र्नाराण टाइम केवहव हेकाले. 36केध्दव इही वमां का उचकाहूस तो आवीन जाहू एने तुमूह हूवताला देखणार. 37एने जे मी तुमूह किथे तोज आखाहुच किथे, “जागे रेवू.”

Currently Selected:

मरकुस 13: NLXNT

Highlight

Copy