मत्ती 24

मन्दिरान विनाशन भविष्यवाणी

(मरकुस 13:1,2; लूका 21:5,6)

1तेवी यीशु मंदिरामाय रीन निकलीन जात एतो, तेवी ता चेला ताह मंदिरान रचना देखणे केरीन तान उगे आवा. 2ताह कियील, “तुमूह जो आखा दिखिह हि ना! मी तुमूह खेरो किथु, न्या देगडापूर दिगुड सुध उग्रील नाहं तो गाधल्या जाहू नाहं.”

संकट एने दुखे

(मरकुस 13:3-13; लूका 21:7-19)

3ताहेरया तो जैतुनान डोंगरापोर बोहील एतो, तेवी चेला एकांतात तान आहनी आवीन केया, “आमूह किजी कि ज्याह वातू केवी एय? तारो आवणेन एने जगान अंतान कालो चिन्ह रेंय?” 4यीशु ताह उत्तर आपील, “होमंबालीन रीवू! कूण तुमूह ठेगहू शकेल” 5काहाकाय जादा इही रेंय जो मारो नावान आवीन केह, मी मसीह हि एने मोकता ठेगती. 6तुमूह युद्ध एने युद्धान चर्चा होमलाय, तर बिय जावू मा कारण न्यान एने हेतेच, पुण ता टायीमा शेवेट एय नाहं. 7काहाकाय जाती उपेर जाती एने राज्या उपेर राज्य उठीह, एने जागु जागे दुष्काळ पोळी, एने भूकंप एय. 8जी आखा वातू पिडान सुरुवात एय. 9तेवी तुमूह क्लेश आपणे केरता तुमूह देरावीन आपती, एने तुमूह मारीन टाकील, एने मार नावान कारण ने आखा दिहरी जातीन माणहे तुमरो द्वेष केरती. 10तेवी जादा जन ठोकर खाय, एने एक दिहीराह देरावीन आपती, एने एक दिहीराहा द्वेष केरती. 11जुलुम जुठा भविष्यवक्ता उठीन उबरेती एने ठेगती. 12अधर्म वाढल्या मुळे जोलूम जाणान प्रेम हेलायजाय. 13पुण जो शेवेट ताहवोर धीर देरीन रेय एने तान उद्धार एय. 14एने राज्यान हे पोरचार आखा जगामाय किरील जाह कि आखा दिहरी जाती गवाही एय तेवी शेवेट आवी. 15केरीन जेवी तुमूह “उजाडणार अशुद्ध वस्तूह जीन चर्चा दानीएल भविष्यवक्ता उखेर रीन एयील एती, ती पवित्र मंदिरामाय उबरीयील देखहु जो वाची तो होम्जी 16तेवी जो यहूदियामाय एय तां बोयडा उखेर नाह जाणे जुवी. 17जा उपेर रेंय तो आपणो घेराम रीन सन्मान लेणे उतरणु मा. 18एने जो खेताम रेंय तो, आपणा फाडका लेणेन पासाण मा हिर केहू.” 19ता दिहामाय जी पेटावाली एने दुध पिवड्णारी रेंय, तान केरता हाय हाय. 20प्रार्थना केरतीन रीवू कारण तुमूह हियालाम किव्हा शब्बाथान एक दिह नाहणे नाय पुडे. 21काहाकाय ता समयी ओहलो बारो क्लेश एय, जोहलो जगान आरंभापासून एनो नाहं. 22एने ते दिह थोडो किरील नसतू तर कूण प्राणी वोचील नसते पुण निवाडल्या च्या कारणाने हे दिह थोडो किरील जाह. 23ता टायीमाह जर कूण तुमूह केय, “देखू यीशु न्या हि! पेल” ताहरी हि! ते विश्वास केरूह मा. 24कारण जुठा मसीहा एने जुठा भविष्यवक्ता उठीन उबरीयेल रेती, मोठा चिन्ह एने अद्भुत कृत्य देखाडीते एय तर निवाडीलाहा पुण ढगीत. 25देखू, मी पेल्ला तारीन हे आखा काही केरीन आपील हि. 26ज्ञान केरता ते तुमूह केतील देखू तो जेंगलामाय हि, तर बाहेर निकलीन जाणेन नाहं, देखू, तो माय वाला खोलीम हि, तर देखू विश्वास केरहू नाहं. 27कारण जीही उजालो पूर्व उगेरीन निकलेहेतीही पाचीम्पू चाम्केहे तिहीच माणहान सोराह आवणेन पोडी. 28जाहरी शरीर हि ताहरी गुवळा जमा एती. 29ता दिहामाय क्लेशा ओवतो सूर्य अंधाराहोस एय, चांद उजालो आपणे नाहं एने तारा आकाशा मायरीन पोडती, एने आकाशामाय वालो शक्ती डगमगली जाह. 30तेवी माणहान सोरान चिन्ह आकाशामाय देखाईल, एने तेवी पृथ्वी उपेर आखा जातीनी माणहे छाती ठीकीते, एने माणहान सोराह मोठली सामर्थ्या एने महिमा आकाशामाय वालो वाद्लापूर आवातल्या देखणे. 31एने तो महानादाबाहेर्यो आपणा दूतांह मोकली, एने आकाशाम आवी जीटूकेरीन ता टोकावोर चारू दिश्यामायरीन तान निवाडीलाहा एक्ठा केरी 32अंजीरान झाडापोरीन हे वार्ता हिकू: ताहेरया तान लोग कोमल एय जातेह एने पानटा गळू लागणू, तेवी तुमूह होमजाडीन लेनो कि होमली आहने आवा हि. 33आवो प्रमाणे ताहेरया तुमूह आखा वातू देखाह तर होमजाडीन ली कि तो आहने म्हणजे बायणाहेऱ्यो हि. 34मी तुमूह खेरो किथे कि जो ताहवोर आवो आखा वातू पुरो एता नाहं, तो ताहवोर आवो पिडीन शेवेट एय नाहं. 35आकाश एने पृथ्वी टोलीते जाह पुण मारी वचने केधीच टोलणार नाहं. 36ता दिहाह एने ता टायमान विषयाम कुणीहुच मालूम नाह सोतो, नाह स्वर्गान दूतांह नाह सोराह फक्त पित्याह 37जोहलो नोहान दिह एता, तोहोलोच माणहान सोरान आवणेन दिह भी रेंय 38काहाकाय जींही जल प्रलयान पेल्ला दिहामाय, जेदिह वूर नोहो जहाजांपुर नाह चेढील ताहवोर माणहे खाताला पिताला, एने तामाय वाराडे एताला 39एने जो ताहवोर जल प्रलय आवीन ता आखान वोयीन लेईन नाहं गीयो तो ताहवोर ताह कायीच मालूम पोडील नाहं, तोहोलोच माणहान सोरान आवणो एय. 40ता टाइम दुय जन खेताम रेंय, एक लियेल जाहो एने एकाह सोड देय. 41दुय बायकू गेरटीपूर देलती रेंय, एक विसील जाह एने दिहिरी सोडीन आपील जाह. 42ज्यानकेरता जागता रेवू, कारण तुमूह मालूम नाहं, कि तुमरो प्रभु कदिह आवी 43पुण हे सेमजीन ली कि केध्दीह घेर मालक्य मालूम हि कि चोर कायताहा टाइम न्यावालो तर घेर धनी जागो रेणू येतो, एने आपणा घेर फोडू आपील नसतू. 44जानकेरता तुमूह भी तीयारीम रेवू, कारण ज्या टायीमा विषयाम तुमूह विचार पुण किरील निह एय, ओहला वेलान माणहान सोरो आवीन जाह.

विश्वास योग्य दास एने दुष्ट दास

(लूका 12:41-48)

45“ता टायीमा विश्वास योग्य एने बुद्धिमान दास कूण हि, ज्याह स्वामींनी आपणो दास चाकारापुर सरदार नेमिल कि वेलेपूर ताह जेवण आपी? 46धन्य हि ते दास, ज्याह आपणो स्वामींनी ओहलोस केरतालून देखी. 47मी तुमूह खेरो किथे तो आपणो संपत्ती उपेर अधिकार आपी. 48पुण तो दुष्ट दास विचार केरणे लागी कि मारो स्वामीला आवील टाइम रेंय. 49तो दास दिहरा दासाह देंय एने आपणा सारकाह माणहा हेर्यो रूटू खाय एने दारू पिन साकवालू एय 50ते ता दासान मालक ओला एक दिह, जेवी तो तान वाट नाय जोवी, एने ओहली टायमे कि तो नाह जाणीत, 51उवतू मालिक ता दासान टुकडा केरी. ता दासाह मालिक कोपटी माणहामाय मोकली; एने ताहारी रडणेन एने दात किकडावणु रेंय.”

Currently Selected:

मत्ती 24: NLXNT

Highlight

Copy