मत्ती 12

श्ब्बाथान प्रभु

(मरकुस 2:23-28; लूका 6:1-5)

1तेवी यीशु शब्बाथान दिह खेतामरीन जातालु, तान चेलाह बुख लागिल, एने तो केणहे तोडीन खाणे लागगा. 2फरीसी ताह देखीन किया, “देख, तारा चेला जो काम केर्तेह जो शब्बाथ ने दिह केरणेन बरोबर नाहं सोतो.” 3तो ताह कियो, “काय तुमु वाच्या नाहं काय कि राजा दाविद एने तान हेरी ताहा बुख लागिल एती, तेवी ता काय किरील? 4राजा दाविद बोगवानान घेराम जाइन अर्पण किरील रूटू खाद्या. जो रुटो तान केरता एने तान हेरीन नाहं, फक्त पु याजकान केरता उचित एता. 5काय तुमु व्यवस्था पुस्ताकाम नाह वाचा का, याजक शब्बाथान दिह मंदिर माय शब्बाथान विधीह तोडणे तेभी तो निर्दोष ठेरतेह? 6पुण मी तुमूह किथु, का न्याहरी जो तो हि तो काय मंदिराह रीन भी मोठो हि. 7जर तुमूह ज्यान अर्थ जाणता, मी दया से आनंद इतू, बलीदान से नाह, ते तुमु निर्दोषाह दोषी नाय ठहरावता. 8काहाकाय माणहान सोरू शब्बाथ ने दिहान भी प्रभु हि.”

हुकील हाथ वाला माणहाह हुदारणेन

(मरकुस 3:1-6; लूका 6:6-11)

9तारीन निकलीन ओवतो तो तान आराधनालयमा आवु. 10देखू, ताहारी एक हुकील आथान एक माणुह एतो. ता यीशु पोर दोष लागाडीने केरन ताह फुशा “काय शब्बाथान दिह हजो केरणेन चन्गो केरणेन हाजो हि” 11तुमरे मायरीन “ओहलो कूण हि ज्यान एक मेंढरो हि एने तो शब्बाथान दिह खाडाम पोड ज्याय ती बाहेर काढहु नाहं का? 12एक माणहान किमुत एक मेंढराहरीन जादा नाह सोती का, तावजेसे शब्बाथान दिह भलाई केरणेन हाजो हि.” 13तेवी यीशु ता माणहाह कियो “तारो आथ ओगाण केर” तो आथ वाव्यो एने तो हाजो एय गीयो. 14तेवी फरीसी बाहेर निकेलीन एने तान विरुद्ध योजना बोनाव्या का ताह किहीकेरिन नाश केरुहू.

बोगवानान निवाडील दास

15पुण यीशु ज्यो जाणीन तारीन निकलीन गीयो. जुलुम माणहा तान पासाण चाल देना, एने ता आखा हाजो किऱ्यो. 16एने तान ताह आज्ञा केरील माहु प्रकट केरुहू मा. 17काहाकाय जो वचन यशाया भविष्यवक्ता द्वारे केयील एतो तो पुरो एने जुवी. 18“देखू, ज्यो मारो दास ज्याह मी निवाडील हि, ज्यो मारू प्रिय हि, मी आपणो आत्मा तापोर टाकूह एने तो अन्य जातीह न्याय ने सुवार्ता आपी. 19तो लेढाय नाय, एने आयडी, एने नाह बाजाराय तान आवाज होमलाय. 20तो चेन्दील जेड्या तोडी नाहय, एने दुवाताली बत्तीह ओलाडी नाय, जाहवोर न्यायाहा जीकाडी नाय. 21एने दिहरी जाती तान नावापुर आशा मेलती.”

यीशु एने शैतानान अधिकारी

(मरकुस 3:20-30; लूका 11:14-23)

22तेवी माणहाह एक आदोलो मुक्को मा दुष्टोत्मा एती ताफाय लावा एने तो ताह हाजो केरोय एने तो बोलणे लागो एने देखणे बाजगियो. 23ज्यापोर आखोच माणहे चक्कित एय गीयो केणेंन लागा काय, “ज्यो माणुह दाविदान सोरू हि काय” 24फरीसी माणहान जो होमलीन केणे लागा, “कि ज्यो ते दुष्ट आत्माह शैतानान अधिकारीन मोदेतसे काडीह.” 25तो विचार जाणीन ताह कियो, जा राज्याम फुट पुळीह तो नाश एय जाणे एने जा घेराम फुट पुळीह तो स्थिर नाहं रेत. 26एने जर शैतानच शैतानाह काढी ते तो आपणोच विरोद्धी एय गीयो, ओवतो तान राज्य किहिक बोणी. 27ओवतो मी जर शैतानान मोदेतसे दुष्ट आत्माह काडीथू, ते तुमरो माणहे कुणीन मोदेतसे निकालतेह? तावजेसे तोच तुमरो न्याय केरती. 28पुण मी जर बोगवानान आत्मा द्वारे दुष्ट आत्मा काडथू ते बोगवानान राज्य तुमरेफाय आव जायील हि. 29काय कूण ताकतवान माणहान घेरामाय रीगीन तान माल्मोत्ता लुट का? जाहवोर तो तान ओलोक ताकेतावार एय जाय. 30जो मारहे-या नाहं तो मारी विरुद्ध हि एने जो मारहे-या हेगालीत नाह तो, जगारीह. 31केरीन मी तुमूह किथु का माणहान प्रत्येक पापान एने निंदाह क्षमा केरनेमाय आवी. पुण पवित्र आत्मान निन्दाह क्षमा नाह सोती. 32एने जो कूण माणहान सोरान विरुद्धामाय एखादी वात केय, ते तान अपराध क्षमा केरनेमाय आवी, पुण जो पवित्र आत्मान विरुद्ध काहं केय तान तो अपराध नाह ते ज्या जूगात नाहं पोरला जगाम क्षमा केरणेम आवी.

झाड एने तान फोल

(लूका 6:43-45)

33“जर झाड हाजो केहो, ते फोलाह भी हाजो किवो, एने तान फोल खराब केहो, ते ता झाडाह भी खराब केवो. काहाकाय झाड तान फोला पोररीन ओलखाणे. 34हे गेयळेकान सोरा, तुमु खराब रीन हाजाली वातू किहिक केय सेकतेह? काहाकाय जो मोनमा बोरील हि तोच मुया पोर आविह. 35हाजो माणुह आपणो हाजो भांडारामरीन हाजो वातू काडीह. एने खराब माणुह आपणो खराब भांडारामरीन खराब वातूच काडीह. 36मी तुमूह किथे कि जो कूण खराब शब्द बोलीह ताह न्यायान दिह ताह हिसाब आपणे पोडी. 37कारण आपणो शब्दान द्वारे तू निर्दोष, एने आपणाच शब्दान द्वारेच तू गुनेगार ठेहरही.”

स्वर्गीय चिन्हान मांग

(मरकुस 8:11,12; लूका 11:29-32)

38तेवी शास्त्री एने फरीसी ताह केया, “मालिक, आमूह तुवा फायरीन काही चिन्ह देखणु हि.” 39तो उत्तर आपयो, “ज्यो दुष्ट एने व्यभिचारी पिडी माणहे चिन्ह देखणेन होद्तेह, ताह योना भविष्यवक्तान चिन्ह सोडीन काल्लोच भी चिन्ह ताहा देखणे जुडी नाय.” 40कारण जोहोलोज योना तीन दिह एने तीन रात मासान पेटाम रेणू, तिहीस करीन माणहान सोरो भी तीन दिह एने तीन रात पृथ्वीन पेटाम रेंय. 41न्यायान दिह निनवेन माणहा उठीन ज्या पिडीन माणहाह दोषी ठहरावती, काहाकाय ता योनान पोरचार होमलीन मोन फिराव्या, “देखू न्याहरी जो हि तो योनारी भी मोठू हि.” 42न्यायान दिह दक्षिणन राणी ज्या पिडीन माणहा हेरी उठीन, ज्या पिडी माणाहाच दोषी ठहरावी, काहाकाय ती दक्षिण रीन सुलेमानने ज्ञान होमलने आयील एती. पुण न्याहरी ते तारीन भी मोठू हि.

अदुरा हुदार से विपत्ती

(लूका 11:24-26)

43“जेवी अशुद्ध आत्मा कुणी मारयरीन निकलील, तेवी विश्वासान केरता सून सान जागाम विश्वास होदणे, पुण ताह सापडणे नाहं. 44तेवी तो किथी, कि ज्या घेराम रीन आवा एता आपणो तान घेराम पोशा फिरीन जाहू, एने तो फिरीन आवी तर ताह बुंदे इयील एने होमजाळीन देखील. 45तेवी तो जाइन आपणे रीन होवटो जुदाजुदा सात आत्मांना लीन आवी, तो ताहारी प्रवेश केरीन रेणे लागणू एने ता माणहान पासणली परिस्थिती पेक्षा जादा वाईट एईन जातेह, ज्याह दुष्ट आत्मा पुण ओहलाच एय.”

यीशुन आहाक एने बाहाक

(मरकुस 3:31-35; लूका 8:19-21)

46तो ता लोक समुदायाहे-या बोलतेच एतो तेवी तान आहाक एने बाहाक बाहेर उबरीयेल एता, एने ताहेरी बोलताला एता. 47एने कूण यीशुह कियील “देखू, तारी आहाक एने बाहाक बाहेर उबरीयेल हेते, तुवा हरया वातू केर्न्या हेते.” 48पुण ता उत्तर आपतेन तान कियील, “मारा आहाक एने कूण हि मारा बाहाक?” 49एने आपणो चेलाह आथ देखाडीन तान उत्तर आपील, देखू, मारी आहाक एने बाहाक. 50काहाकाय जो कूण मारो आबाकने जो स्वर्गामय हि तो तान ईच्छा पुर्ण केरीह तोच मारो बाहाक मारी बोणिक एने आहाक हि.

Currently Selected:

मत्ती 12: NLXNT

Highlight

Copy