लूका 15

टाकायील मेंढरान वार्ता

(मत्ती 18:12-14)

1ऐवी ताहेर्यो चुंगी लेणार एने पापी आखा तान होमलानेन तान आहने आविह एता. 2तेवी फरीसी एने यहूदी धर्मशास्त्री बोडबोड केरतीन कियेल, “हा माणुह तर पापी माणहान स्वागत केरीन हि एने ताहेऱ्यो जेवण केरतीन हि.” 3ज्यापूर यीशु ताह हा वार्ता होमलायेल: 4“होमजू तुमरे माय वालो कुणी फाय शंभर मेंढरे हेते एने तामायरीन एक टाकाईल तर काय तो नव्याण्णव मेंढरे जेंगलामाय सोडीन ते टाकायेल पासाण जाहो जेवीवोर ते सापडील नाहं. 5ओवतो ते मेंढरो ताह सापडेल, तेवी ताह आनंदमाय ताह आपणो खांद्यापूर विसीन लेणे; 6एने ताहेर्यो तो गिर पोशा जाथू तेवी आपणो दोस्ताहा एने शेजाऱ्यांना आहने हादाडळीन ताह किथे, मारहे-या आनंद केरू काहाकाय मारा टाकाईल मेंढरो सापडील हि. 7मी तुमूह किथी हि ज्यानहोस कुणी एका मोन फिरावणारान पापी केरता, ता नव्याण्णव धर्मीन एदम्यारीन, ज्याह बोदलणेन जरुरत नाहं स्वर्गाम आनंद किरील जाहो.”

टाकायील सिक्कान वार्ता

8“किवा होमजू कूण बायकू हि, जीफाय दहा चांदीन सिक्के हि एने, तीन एक शिक्का ढाकणे तर काय ती दिवू लागाडील घेराम जेविपोर झाडत रेंय, एने लक्ष आपील होदेह रेहू जेवीवोर ते सापेडतालो नाहं? 9एने ताहेर्यो तीह ते सापडीलील तेवी ती आपणो दोस्ताहा एने शेजाऱ्यांना आहने हादाडळीन केनार, मारहे-या आनंद केरू काहाकाय मारो शिक्का जो टाकाईल एतो तो सापडील हि. 10मी तुमूह केणेन कि ज्यानहोस एक मोन फिरावणार पाप्यान केरता पुण बोगवानान दूतांन उपस्थित ताजागेन आनंद किरील जाहो.”

उड़ाऊ सोरान वार्ता

11ओवतो यीशु कियील, “एक माणहान दुय सोरा एता.” 12आत्या सोरो आपणो आबाक कियील, “जी संपती मारो वाटान हि, ती संपती माहु आपील आप” तेवी आबुक आपणो दुयसोराह संपत्ती वाटीन आपील. 13एविवूर जुलुम टाइम एनी नाहां एती, कि आत्या सोरो आपणी संपत्ती लीईल एने सेटो देशाम जाणेन निकलील, एने ताजागेन मोज्यामारणे केरीन आपणी आखा मालमत्ता विसीन टाकील. 14ताहेर्यो तान आखा संपती निवरील एती तेविरीन ता देशाम भयानक दुष्काळ पोडील एतो तेवी तो अडचणीम रेहू लागिल. 15जानकेरता तो ता देशाम कुणी माणहाउगी जाइन. मोजरीन केरूह लागिल तान ताह आपणो खेताम डुकरे चारणे केरता मोकलीन आपील. 16ताजागेन तान विचार किरील कि ताह मुंग्या खाणेन जुडी, जे डुकरे खाणे एता, पुण कूण ताह एक मुंग्या पुण आपील नाहं. 17ओवतो ताह ताहेर्यो तो शुद्धीपूर आवा तेवी बोल्णु, मारो आबाक फाय इही कोलाक मोज-या हि ताहेऱ्यो खाइन पुण उगरी एने मी न्या उपाशी मोरतालू हि. 18ऐवी मी यारीन मारो आबाक फाय जाह एने ताह केहू, “आबुक मी स्वर्गान बोगवान एने तार विरुद्धामाय पाप किरील हि.” 19ऐवी ओगाण मी तारो सोरो केणेन केरीन योग्य नाहं माहु आपणो मोज-या होमजाडीन मेलीन ले.

उड़ाऊ सोरान वापस आवणो

20तेवी तो उठीन आपणो आबाक फाय निकलील ऐवी तो काही अंतर सेटो वालू एतो, तेवी तान आबुक ताह देखील, एने तान आबाक तापोर जुलुम दया आवी तेवी तो दोवळतीन जाइन तान आपणो गेलामाय गळा रीगाडीन तान मुक्के लीईल. 21“सोरो आपणो आबाक कियील, आबुक, मी तारो नेजेकेरीन एने स्वर्गान विरुद्ध पाप किरील हेते मी ऐवी तुमरो सोरो केणेन केरीन योग्य नाहं.” 22पुण आबुक आपणो दासांना कियील, जेल्दी हाजो कपडे लावो एने ज्या ते रीगाडू तान आथाम मुंदी एने पायांम चाट्या रीगाडू. 23पुष्ट ओहलो पशु लीन काटू ताह खाइन आपु आनंद केरूह. 24काहाकाय जो मारो सोरो मोरणु एतो, ऐवी जोहलो जीवतालू एनो हि, हा टाकील एतो पुण ऐवी तो सापडील हि, तेवी ते आनंद केरूह लागिल.

मोठला सोरान केणो

25“ऐवी तान मोठू सोरो खेताम एतो. ताहेर्यो आवा एने घेरान आह्ने पोचना, तेवी तान गाण्य नाचणेन आवाज होमलील. 26तान आपणो एक दासाह हादाडळीन फुसील हे, आखा काय चालना हि? 27दासान ताह कियील, तारो बाहाक आवा हि, एने तारो आबुक सुरक्षित एने हाजो देखीन एक पुष्ट पशु काटील हि. 28मोठू बाहाक जादा किसवानु तो माय जातच नाह एतो तेवी तान आबुक बाहेर आवा एने ताह होमजाडील. 29पुण तान आबाक उत्तर आपील, देखू, मी वो-ह्यांनवो-हे तारी सेवा केरतीन आवा हि मी तारो काल्लोबी आज्ञा विरोध किरील नाहं पुण तुमूह माहु एक बोकडा आपील नाहं कि मी आपणो दोस्ती हे-यो आनंद केरूह. 30पुण ताहेर्यो तारो हा सोरो, आवा ज्यान वेश्यामाय आपणा आखा धन खेरचील, तान केरता तू मोठू पुष्ट पशु मारील. 31आबुक ताह कियील, मारो सोरा, तू कायमने मारो आहने हि एने जे काही माहफाय हि ता आखा तारोच हि. 32पुण आमूह आनंद एणेन जुवी एने तिवार साजरा केरुहू तारो हा बाहाक जो मोरणु एतो, ऐवी पोशो जीवतालू एनो; हि हा टाकाईल एतो, ऐवी सापडेल हि.”

Currently Selected:

लूका 15: NLXNT

Highlight

Copy