यूहन्ना 6

पाच हजार एदम्याह खावडणेन

(मत्ती 14:13-21; मरकुस 6:30-44; लूका 9:10-17)

1आवो वातू ओवतो यीशु गलील समुन्द्र म्हणजे तीबिरीयान समुद्राम पुरललीउखीर गीयो. 2एने एक मोठली गेर्दी तानपासाडण आव लागिल काहाकाय चमत्कारान कामे दुखा-यापोर तो देखाळतालु ता ताह देखताला. 3तेवी यीशु डोंगरापोर चेडिन आपणो चेला हेऱ्यो बोह गीयो. 4एने यहूदीयान फसह तिवार आहने एतो. 5ताहेरया यीशु आपणा डोला उपेर केरीन एक मोठली गेर्दी तान आहने आव तालून देखील, तेवी फिलीपाह केईल, “आमु यान खाणेन केरता कारीन रूटू वेचातो लावूह?” 6तान हि वात ताह पारखणे केरता कियील काहाकाय ताह स्वताह मालूम एता कि ताह काय केरुहू हि. 7फिलीप ताह उत्तर आपील, “दोनशे दिनारान रोटा भी न्याह केरता पुरी नाहं कि ज्यामाय्रीन आखा थोडोक थोडोक जुळी.” 8ताहरी चेला मायरीन शिमोन पतरसान बाहाक आंद्रिया ने ताह कियील, 9“एक सोरो हि न्याहरी हि जाफाय पाच रोटा एने दुय मासा हेते पुण ओलाक माणहा केरता हे काय हि?” 10यीशु केदा, “माणहाह बोहाडीन आपु.” ता जागीपुर जादा खेड एता: तेवी माणुह तामायवाला एदम्यान सख्या पाच हजार एती, बोहीन गीया. 11तेवी यीशु रूटू विसील एने धन्यवाद आपील बोहनारा वाटीन आपील; तोहोलोच मासामारीन पुण जोलाक ताह लागत एता वाटीन आपील. 12जेवी तो खाइन तृप्त एय गीयो तर तान आपणो चेलाह कियील, “उग्रील टुकडा टुलू केरीन ली कि कायीच जगारील जाणे.” 13केरीन ताह टुलू किरील एने पाच रोटान टुकडा मायरीन खाणारा पासून उग्रील एता, तो बारा टोपला भूरील. 14तेवी जे आश्चर्य काम केरीन देखाडणे ताह ते माणुह देखीन केणेंन लागिल, “तो भविष्यवक्ता जो जगाम आवूह एतो खेरी खेरीच तोच हि.” 15यीशु हे होमजाडीन कि ते माहु देरावीन राजा बोनाडीन हि पोशा डोंगरापोर एखलाच निकलीन गीयो.

यीशुन पाणी पोर चालणेन

(मत्ती 14:22-33; मरकुस 6:45-52)

16ताहेरया हांजपोर एनी तर तान चेला गलील ने समुद्राम मेरापूर गीया. 17एने नावीपोर चेडिन समुद्राम पुरलेउखीर कफर्णहुमात जाहू लागिल तीबोखे रात एय गीयी एती एने यीशु एविवूर तान आहने आवा नाह एता. 18वादलो उढील तान वजेसे जावटो जोरेस आवील लागिल. 19ताहेरया तो कोस सवा कोस निकलीन गीया तेवी तास यीशुह समुद्रापुर चालतालून एने नावीन आहने आव तालून देखीन बियीन गीया. 20पुण तो ताह कियील, “मी हि; भिहू मा.” 21केरीन तो ताह नावीम चेढाविन लेणे केरता तियार एनो एने चालूच ती नाव ता जागापूर पोहचीलही ज्याडगी तो जात एता.

माणहान यीशुह होद्णो

22दिहीरा एक दिह ता गर्दी जे समुद्राम पुरलेउखीर उभी एती न्या एक नावीन सोडीन दिहिरी नाव नाहां एती; एने यीशु आपणो चेला बरोबर चेढील नाह एतो पुण फक्त तान चेलाच गीया एता. 23तेवी दिहीरा नाव तिबिरियुसामाय ताहरी आवीन जाहारी तान धन्यवाद आपील रूटू खाणु एता. 24ज्यानकेरता ताहेरया गर्दी देखील कि न्या यीशु एने चेला पुण नाहं तेवी ते नावीम चडणे एने यीशुह होदतेन होदतेन कफर्णहुमात पोचना.

यीशु जीवनान रोटू

25समुन्द्रान ती उगे ताहेरया ते ताह मिलना तेवी कियील, “हे गुरु, तू न्या केवी आवा?” 26यीशु ताह उत्तर आपील, मी तुमूह खेरीच खेरीच किथे तुमूह माहु जानकेरता होदतेन हि इही नाहं कि तुमूह आश्चर्य काम देखाडील पुण तुमूह तान केरता आवा कि रोटा खाइन तृप्त एय गीयो. 27नाश एणार खाणेन केरता मेहनत केरूह मा पुण ता खाणेन केरता जे अनंत जीवनबोर टिकने ज्या माणहान सोरो तुमुहू आपण्यू कारण आबुक म्हणजे बोगवानान तापोर छाप लागडी हि. 28तेवी ता ताह कियील आमु “बोगवानान काम केरणेन केरता काय केरज्यू?” 29यीशु ताह उत्तर आपील, “बोगवानान काम ज्यो हि का तुमूह तापोर ज्याह तो मोकलील हि तापोर विश्वास केरू.” 30तेवी तास ताह कियील, “ओवतो तुमूह कालो चिन्ह देखाडीन हि कि आमु ताह देखीन तुमरे पोर विश्वास केरुहू?” तू कालो काम देखाळतालु हि? 31आमरा पूर्वजनांनी जेंगलामाय मात्रा खाले; इही लिखील हि; तान ताह खाणेन केरता स्वर्गामाय रीन रूटू आपील. 32यीशु ताह कियील, मी तुमूह खेरीच खेरीच किथे कि मुसान तुमूह ती रूटू तर आपील नाहं पुण मारो आबुक तुमूह स्वर्गामाय रीन खेरो रूटू आपथु. 33कारण बोगवानान रूटू तीस हि जी स्वर्गामाय रीन उतरीन जगाह जीवन आपीह. 34तेवी तास ताह कियील, हे प्रभु हि रूटू आमूह दाडीन आपतेन रीवू.

35यीशु ताह कियील, जीवनान रूटू मी हि जो माहफाय आवथू जो मारपर विश्वास तो केधीच बुख्यो एय नाहं. 36पुण मी तुमूह कियील एता कि तुमूह माहु देखील हि तेभी पुण विश्वास केरतीन नाहं. 37जे काही आबुक माहु आपथु ता आखाज माहुफाय आवी एने जो कूण माहुफाय आवथू ताह मी केधीच काढहु नाहं. 38कारण मी मारी ईच्छा नाहं पुण माहु मोकलणारान ईच्छा पुरो केरणेन केरता स्वर्गामाय रीन उतरना हि. 39एने माहु मोकेलणा-या ईच्छा हि कि जे काही माहु आपील हि तामाय मी कायीच टाकान नाहा पुण ताह शेवटेस एक दिह पोशो जीवतालू उठाळील. 40कारण मारो आबाकने ईच्छा हि कि जो कूण सोरा देखणार एने तापोर विश्वास केरुहू तो अनंत जीवन मिलावूह; एने मी ताह शेवटेस एक दिह पोशो जीवतालो उटाडू.

41तामुळे यहूदी तापोर कुरकुर केरूह लागिल कारण तान कियील एता, जी रूटू स्वर्गामाय रीन उतरीन ती मीच हि. 42एने तास कियील, “काय हा योसेफान सोरो नाहं? ज्यान आहाक आबोक आमु ओळखणे? तर ओवतो तो कोहलो किथे कि मी स्वर्गातून उतरील हि.” 43यीशु ताह उत्तर आपील, “आपसामाय कुरकुर केरूह मा.” 44कूण माहफाय आवहू शकत नाहं जेवीवोर मारो आबुक ज्यान माहु मोकलील हि ताह हाजी भी देखायील वाचीन एने मी ताह शेवटेस एक दिह पोशा जीवतालू उटाडू. 45भविष्यवक्तान ग्रंथाम हे लिखील हि कि ता आखा बोगवाना फायरीन हिकाडील एती ज्या कुणी से आबापुररीन होमलील हि एने हिकना हि तो मारो आहने आवथू. 46इही नाहं कि कुणी आबाक देखील हि पुण जो बोगवाना फायरीन हि ताणुच फक्त आबाक देखील हि. 47मी तुमुहू खेरीच खेरीच किथे कि जो कूण विश्वास करने अनंत जीवन तान हि. 48जीवनान रूटू मी हि. 49तुमरो पूर्वजान जेंगलामाय मात्रा खादो एने मोरीन गीया. 50हि ती रूटू हि जी स्वर्गामाय रीन उतरी म्हणजे माणुह तामायरीन खाण्यू एने मोरण्यू नाहं. 51जीवनान रूटू जी स्वर्गामाय रीन उतरनी मी हि जर कूण आवो रोटामायरीन खाण्यू तो कायम जीवतालू रेहू; एने जी रूटू मी जगाच्या जीवनान केरीन आपण्यू ते मारा माह हि.

52जापोर यहूदी हे केयीन आपसामाय वादावाद केरूह लागिल हा माणुह कोहलो आमूह आपणो माह खाणेन आपुह शकणे. 53यीशु ताह कियील, मी तुमूह खेरीच खेरीच किथे कि जेवीवोर तुमूह माणहान सोरो माह खाण्यू नाहं एने तान रक्त पिनार नाहं तुमु तामाय जीवन नाहं. 54जो मारा माह खाहोव एने रक्त पिथी अनंत जीवन ताणुच हि; एने मी ताह शेवटेस एक दिह पोशा जीवतालू उटाडू. 55कारण मारा माह खेरीते खाणेन वस्तु हि एने मारा रक्त खेरीते पीणेन वस्तु हि. 56जो मारा माह खाहोव एने मारा रक्त पिथी तो कुणबी स्थिर बोणावीन रेहू एने मी तामाय बोणावीन रेंय. 57जोहलो जीवतालू आबुक म ला मोकलील हि एने मी आबाकमुळे जीवतालू हि तोहोलोच तो पुण जो माहु खाण्यू मारीवजेसे जीवतालू रेहू. 58जी रूटू स्वर्गामाय रीन उतरनी जिच हि ता रूटू सारखी नाहं जीह पूर्वजान बुंदे एने मारीन गीया; जो कूण हि रूटू खाण्यू तो कायम जीवतालू रेहू. 59ज्याह वातू तान कफर्णहुमात एक आराधनालय निडालो लिकाडतालु आपतेलीन कियील.

अनंत जीवनान वाचणे

60तान चेला मायरीन कुणीन हे होम्लीन कियेल, “ज्याह केठीन वातू हि यान कूण होमबोलणार?” 61यीशु आपणो मोनाम हे सेमजीन लीईल कि ज्याह वातुपोर मारा चेला कुरकुर केरतीन हि ताह फुसील काय ज्याह वातीपुरी तुमूह जेठ लागत हि? 62जर तुमूह माणहान सोरो जाहारी तो पेल्ला एतो ताहारी उपेर जातेन देखणार तर काय एय? 63आत्मा तर जीवन आपणार हि शरीरामायरीन काही फायदा नाहं; ज्या वातू मी तुमूह केदाह हि ती आत्मा हि एने जीवन पुण हि. 64पुण तुमूमायरीन कोलाक जन इही हेते जे विश्वास केरतीन नाहं कारण यीशु पेल्लारीन होमजाडणे एतो कि जे विश्वास केरतीन नाहं ते कूण हि; एने कूण माहु देरावीन आपण्यू. 65एने तान कियील, ज्यामुळेच मी तुमूह कियील एता कि जेवीवोर हे वरदान आबाफायरीन आपील जात नाहं ताहउर तो माहफाय आवहू शकत नाहं.

पतरसान विश्वास

66ज्यापोर तान चेला उलटो फिरीन गीया एने ताबादमाय ताहेऱ्यो गीया नाहं. 67तेवी यीशु ता बारा चेलाह कियील, “काय तुमूह पुण जाणेन हि का?” 68शिमोन पतरसाने ताह उत्तर आपील, हे प्रभु आमु कुणी फाय जाणेन? अनंत जीवनान वातू तर तारीच आहने हि. 69एने आमु विश्वास किरील एने होमजी गीया कि बोगवानान पवित्र जन तूच हि. 70यीशु ताह उत्तर आपील, “काय मी तुमरो बाराणा निवाडील नाहं? तेभी पुण तुमुमायवालो एक जन शैतान हि.” 71हे तान शिमोन इस्कर्योतचा सोरो यहूदान विषयातमाय कियेल एता कारण तोच तो बारा मायरीन एक एतो, ताह देरावीन आपणार.

Currently Selected:

यूहन्ना 6: NLXNT

Highlight

Copy