मरकुस 6
6
नासरत ने ईशु चो अपमान
1हुता ले निकरून भाती हुन आपलो देश ने ईलो, आउर हुनचो चेलामन बले हुनचो पाट-पाट गेला। 2सब्त चो दिने हुन आराधना घर ने उपदेश करूक मुरयालो, आउर खुबे असन लोग सुनुन भाती अकचकित होला आउर बोलुक मुरयाला, “ऐके ऐ गोठमन काहां ले ईली? ऐ कोन बिती गिआन आय जोन हुनके दिआ गेली से? कसन सामरत चो काम ऐचो हाथमन ले उजागर होऊ आय? 3काय ऐ हुनी बड़ई नुआय, जोन मरियम चो बेटा, आउर याकूब, योसेस, यहूदा, आउर शिमोन चो भाई आय? काय हुनचो भईनमन ऐथा आमचो मंजी ने नी रऊ आत?” ऐईकाजे हुनमन हुनचो बारे ने ठोकरना खादला। 4ईशु हुनमन ले बल्लो, “अगम गिआनी चो आपलो देश, आउर आपलो कुटुम, आउर आपलो घर के छांडुन आउर काहांय बले बेईजित नी होये।” 5हुन हुता कोनी सामरत चो काम नी करूक सकलो, मात्र खिन्डिक-असन बेमारमन थाने हाथ संगाऊन भाती हुनमन के चेंगा करलो। 6आउर हुनके हुनमन चो अबिश्वास थाने चकित होली, आउर हुन भोंवरक चो गाँवमन ने उपदेश करते बुललो।
ईशु बाटले बारा पठालोबितामन के पटातोर
7हुन बारा झान के आपलो लगे हाग दिलो आउर हुनमन के दुय-दुय करून पटाऊक मुरयालो; आउर हुनमन के अशुद्ध आत्मामन उपरे अधिकार दिलो। 8हुन हुनमन के हुकुम दिलो, “बाट चो काजे बड़गी छांडुन आउर काई नी धरा; ना रोटी, ना झोरा, ना थयली ने पयसामन, 9मान्तर बूटमन पिन्दा आउर दुय-दुय ठान कुड़तामन नी पिन्दा।” 10आउर हुन हुनमन ले बल्लो, “जाहांय बले तुमी कोनी घर ने जाआ से, तेबे जिदलदाय ले हुता ले बिदा नी हुआस हुदलदाय ले हुनी घर ने ठेबुन राआ। 11जोन जगा चो लोग तुमनमन के गरहन नी करोत आउर तुमचो नी सुनोत, हुता ले जाते ची आपलो तली पाँयमन चो धुरला फाफडून दिआस कि हुनमन थाने गोहई होओ।” 12तेबे हुनमन जाऊन भाती परचार करला कि मन फिरावा, 13आउर खुबे असन दुष्टआत्मामन के निकराला, आउर खुबे असन बेमारमन थाने तेल लगडून भाती हुनमन के चेंगा करला।
यूहन्ना डूबन देतो बिता चो हत्या
14हेरोदेस राजा बले हुनचो चरचा सुनलो, कसनबल्लोने हुनचो नाव फयलुन रये, आउर हुन बल्लो, “यूहन्ना डूबन देतो बिता मरलो थानले जीव उठलो से, ऐईकाजे हुनचो ले ऐ सामरत चो काम उजागर होये से।” 15दुसर लोगमन बल्ला, “ऐ एलिया आय।” मान्तर कितलो दुसर लोग बल्ला, “अगम गिआनी नाहले अगम गिआनीमन ले कोनी गोटक चो असन आय।” 16हेरोदेस ऐ सुनुन भाती बल्लो, “जोन यूहन्ना चो मुंडी मय कटाऊन रये, हुनी जीव उठलो से!” 17हेरोदेस आपलो भाई फिलिप्पुस चो बायले हेरोदियासनी चो लागुन, जेचो ले हुन बिहा करून रये, लोगमन के पटाऊन भाती यूहन्ना के धराऊन भाती जयलघर ने ढ़ाकुन रलो; 18कसनबल्लोने यूहन्ना हेरोदेस ले बोलु रलो, “आपलो भाई चो बायले के संगातोर तुके ठीक नुआय।” 19ऐईकाजे हेरोदियासनी हुनचो ले बईर संगाते रली आउर ऐ चाह ते रली कि हुनके मरायें दें; मान्तर असन नी होली, 20कसनबल्लोने हेरोदेस यूहन्ना के धरमी आउर पवितर माने जानुन भाती हुनचो ले डरते रलो, आउर हुनके बचाऊन संगालो, आउर हुनचो गोठमन सुनुन भाती खुबे घबराते रलो, मान्तर हरिक ले सुनते रलो। 21ठीक मवका ईली जिदलदाय हेरोदेस आपलो जनम दिन ने आपलो परधानमन, आउर सेनापतीमन, आउर गलील चो बड़े लोगमन चो काजे भोज करलो। 22तेबे हेरोदियासनी चो बेटी भीतरे ईली, आउर नाचुन भाती हेरोदेस के आउर हुनचो संगे बोसतो बितामन के हरिक करली। तेबे राजा लेकी ले बल्लो, “तुय जोन मन कर सीस मोचो ले मांग मय तुके देयें दें।” 23आउर हुनचो ले किरिया खादलो, “मय आपलो आदो राज के बले जोन काई तुय मोचो ले मांग से मय तुके देयें दें।” 24हुन बाहरे जाऊन भाती आपलो आया ले पचारली, “मय काय मांगे दें?” हुन बल्ली, “यूहन्ना डूबन देतो बिता चो मुण्ड।” 25हुन तुरते राजा चो लगे भीतरे ईली आउर हुनचो ले गुहारली, “मय चाहा ये से कि तुय ऐबे यूहन्ना डूबन देतो बिता चो मुंडी गोटक थारी ने मोके मंगाऊन देस।” 26तेबे राजा खुबे मुरमुरा होलो, मान्तर आपलो किरिया चो लागुन आउर संगे बसलो बितामन चो लागुन हुनके टालुक नी चाह लो। 27आउर राजा तुरते गोटक पलटन के हुकुम देऊन भाती पठालो कि हुनचो मुण्ड काटून आनो। 28हुन जयलघर ने जाऊन भाती हुनचो मुण्ड काट लो, आउर गोटक थारी ने संगाऊन भाती आनलो आउर लेकी के दिलो, आउर लेकी आपलो आया के दिली। 29ऐ सुनुन भाती यूहन्ना चो चेलामन ईला, आउर हुनचो लाश के धरून गेला आउर कबर ने संगाला।
ईशु चो पांच हजार मानेमन के खुआतोर
30पठालोबितामन ईशु चो लगे रूंड़ा होऊन भाती, जोन काई हुनमन करला आउर सिकाऊ रवत, सपाय हुनके सांगला। 31हुन हुनमन ले बल्लो, “तुमी खुदे अलगे कोनी चिमचाम जगा ने ऐऊन भाती खिन्डिक बिसाहा।” कसनबल्लोने खुबे लोग ऐते जाते रवत, आउर हुनमन के खातोर मवका बले नी मिरते रये। 32ऐईकाजे हुनमन ड़ोंगा थाने चेगुन भाती, चिमचाम जगा ने अलगे गेला। 33खुबे लोगमन हुनमन के जातोर दकुन भाती चिताला, आउर सपाय नंगरमन ले रूंड़ा होऊन भाती हुता हिन्ड़ते पराला आउर हुनमन ले पयले जाऊन अमरला। 34हुन उतरून भाती बड़े भीड़ दकलो, आउर हुनमन उपरे जीव दुकालो, कसनबल्लोने हुनमन हुन मेंडामन चो असन रवत, जोनमन चो कोनी राका करू बिता नी रओ; आउर हुन हुनमन के खुबे असन गोठमन सिकाऊक मुरयालो। 35जिदलदाय दिन खुबे टरली, तेबे हुनचो चेलामन हुनचो लगे ऐऊन भाती बोलुक मुरयाला, “ऐ चिमचाम जगा आय, आउर दिन खुबे टरली से। 36हुनमन के बिदा कर कि भोंवरक चो गाँवमन आउर बस्तीमन ने जाऊन भाती, आपलो काजे काई खातो काजे घेनोत।” 37हुन जबाप दिलो, “तुमी ची हुनमन के खातो काजे दिआस।” हुनमन हुनचो ले बल्ला, “काय आमी दुय सव दीनार चो रोटी घेनु आंव, आउर हुनमन के खुआऊ आंव?” 38हुन हुनमन ले बल्लो, “जाऊन भाती दका तुमचो लगे कितलो रोटी आसे?” हुनमन पता लगाऊन भाती बल्ला, “पांच आउर दुय मछरी बले।” 39तेबे हुन हुनमन के हुकुम दिलो कि सपाय के कचा लाटा थाने धाड़ी-धाड़ी ले बसाऊन दिआस। 40हुनमन सव-सव आउर पचास-पचास करून धाड़ी-धाड़ी बसला। 41हुन-हुन पांच रोटी के आउर दुय मछरी के धरलो, आउर सरग चो बाटे दकुन भाती धन्यबाद करलो, आउर रोटी के छिड़ाऊन-छिड़ाऊन भाती चेलामन के देते गेलो कि हुनमन लोगमन के बाटोत, आउर हुन दुय मछरी के बले हुन सपाय ने बाटुन दिलो। 42सपाय खाऊन भाती संतुष्ट होऊन गेला, 43आउर हुनमन गोंदामन ले बारा टुकना भरून भाती उठाला, आउर खिन्डिक मछरी बले। 44जोनमन रोटी खादला, हुनमन पांच हजार मनुक पिला रवत।
ईशु पानी उपरे हिन्ड़लो
45तेबे हुन तुरते आपलो चेलामन के ड़ोंगा थाने चेगतो काजे हट करलो कि हुनमन हुनचो ले पयले हुनपाट बैतसैदा ने जाओत, जिदलदाय ले कि हुन लोगमन के बिदा करो। 46हुनमन के बिदा करून हुन डोंगरी उपरे पारथना करूक लाय गेलो। 47जिदलदाय संझ होली, तेबे ड़ोंगा झील चो मंजी रली, आउर हुन ऐकला भूईं थाने रलो। 48जिदलदाय हुन दकलो कि हुनमन घाटुन-घाटुन घबराऊन गेला सोत, कसनबल्लोने लेहरा हुनमन चो पुरे ले रली, तेबे राती चो चार पाहार चो लगे हुन झील थाने हिन्ड़ते-हिन्ड़ते हुनमन चो लगे ईलो; आउर हुनमन ले पुरे निकरून जाऊक चाहते रलो। 49मान्तर हुनमन हुनके झील थाने हिन्ड़तोर दकुन भाती समजला कि भूत आय, आउर चिचयाऊन उठला; 50कसनबल्लोने सपाय हुनके दकुन भाती घबराऊन रवत। मान्तर हुन तुरते हुनमन के गोठयालो आउर बल्लो, “हिम्मत करा: मय आंय; नी डरा!” 51तेबे हुन हुनमन चो लगे ड़ोंगा थाने ईलो, आउर लेहरा ठेबुन गेली: आउर हुनमन खुबे भक्याला। 52कसनबल्लोने हुनमन हुन रोटीमन चो बारे ने नी समजु रवत, कसनबल्लोने हुनमन चो मन कटर होऊन रये।
गन्नेसरत ने रोगीमन के चेंगा करतोर
53हुनमन हुनपाट उतरून भाती गनेसरत ने अमरला, आउर ड़ोंगा के घाट ने लगाला। 54जिदलदाय हुनमन ड़ोंगा थानले उतरला, तेबे लोग तुरते हुनके चिताऊन भाती, 55लगे-लगे चो सपाय देश ने पराला, आउर बेमारीमन के खटियामन थाने डालुन भाती, जाहां-जाहां खबर पावला कि हुन आसे, हुता-हुता धरून फिरला। 56आउर जाहां काहांय हुन गाँवमन, नंगरमन, नाहले बस्तीमन ने जाते रये, लोग बेमारीमन के हाटमन ने संगाऊन भाती हुनचो ले गुहारते रवत कि हुन हुनमन के आपलो फटीई चो आंचर ची के छिंऊक देओ: आउर जितरो हुनके छिंवते रवत, सपाय चेंगा होते रवत।
Currently Selected:
मरकुस 6: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
