मरकुस 3
3
सुकलो हाथ बिता माने चो चेंगा होतोर
1हुन फेर आराधना घर ने गेलो; हुता गोटक माने रलो जेचो हाथ सुकुन रये, 2आउर हुनमन हुनचो उपरे दोष लगातो काजे हुनचो घत ने भिडुन रवत कि दकोत, हुन सब्त चो दिने हुनके चेंगा करे दे कि नाई। 3हुन सुकलो हाथ बिता माने ले बल्लो, “मंजी ने उबा हो।” 4आउर हुनमन ले बल्लो, “काय सब्त चो दिने अच्छा करतोर ठीक आय नाहले खराप करतोर, जीव के बचातोर नाहले मारतोर?” मान्तर हुनमन ओगाय रला। 5हुन हुनमन चो मन चो कटर ले मुरमुरा होऊन भाती, हुनमन के रिस ले चारो बाटे दकलो, आउर हुन माने ले बल्लो, “आपलो हाथ लमाव।” हुन लमालो, आउर हुनचो हाथ अच्छा होली। 6तेबे फरीसी बाहरे जाऊन भाती तुरते हेरोदीमन चो संगे हुनचो बिरूद ने सलाह करूक मुरयाला कि हुनके कसन परकार नष्ट करूं दे।
भीड़ चो ईशु लगे ऐतोर
7ईशु आपलो चेलामन चो संगे झील बाटे गेलो: आउर गलील ले बड़े भीड़ हुनचो पाट-पाट होली। 8आउर यहूदीया, आउर यरूशलेम, आउर इदूमिया, आउर यरदन चो हुनपाट, आउर सूर आउर सयदा चो लगे-लगे ले गोटक बड़े भीड़ ऐ सुनुन भाती कि हुन कसन अकचकित चो कामकरू आय, हुनचो लगे ईला। 9हुन आपलो चेलामन ले बल्लो, “भीड़ चो कारन गोटक डोंगा मोचो काजे तिआर रओ बल्ले हुनमन मोके चेपाऊक नी सकोत।” 10कसनबल्लोने हुन खुबेमन के चेंगा करू रये, ऐईकाजे जितरो लोग रोग ने रवत, हुनके छिंवतो काजे हुनचो उपरे घसरते पड़ते रवत। 11अशुद्ध आत्मामन बले, जिदलदाय हुनके दकते रवत, तेबे हुनचो पुरे घसरते पड़ते रवत, आउर चिचयाऊन भाती बोलते रवत कि तुय माहापुरू चो बेटा आस; 12आउर हुन हुनमन के खुबे जनालो कि मोके उजागर नी करा।
ईशु बाटले बारा पठालोबितामन चो चुनाय जातोर
13फेर हुन डोंगरी थाने चेगलो, आउर जोनमन के हुन चाहते रये हुनमन के आपलो लगे हाग दिलो; आउर हुनमन हुनचो लगे ईला। 14तेबे हुन बारा झान मानेमन के चुनलो कि हुनमन हुनचो संगे-संगे रवत, आउर हुन हुनमन के पटाओ कि हुनमन परचार करोत, 15आउर दुष्टआत्मामन के निकरातोर अधिकार संगा ओत। 16हुनमन ऐ आत शिमोन जेचो नाव हुन पतरस संगालो, 17आउर जबदी चो बेटा याकूब आउर याकूब चो भाई यूहन्ना, जेचो नाव हुन बुअनरगिस बल्ले गरजन चो बेटा संगालो, 18आउर अन्द्रियास, आउर फिलिप्पुस, आउर बरतुल्मय, आउर मत्ती, आउर थोमा, आउर हलफई चो बेटा याकूब, आउर तदय, आउर शिमोन कनानी, 19आउर यहूदा इस्करियोती जोन हुनके धराऊन बले दिलो।
ईशु आउर बालजबूल
20तेबे हुन घर ने ईलो आउर असन भीड़ रूंड़ा होली, कि हुनमन रोटी बले नी खाऊक सकला। 21जिदलदाय हुनचो कुटुम चो लोगमन ऐ सुनला, तेबे हुनमन हुनके धरतो काजे निकरला; कसनबल्लोने हुनमन बोलते रवत कि हुनचो चेत असतीर निआय। 22शास्तरी बले जोन यरूशलेम ले ऐऊ रवत, ऐ बोलते रवत, “हुनचो ने शयतान आसे,” आउर “हुन दुष्टआत्मामन चो सरदार चो सायता ले दुष्टआत्मामन के निकराऊ आय।” 23ऐईकाजे हुन हुनमन के लगे हाग देऊन भाती हुनमन ले कहनीमन ने बोलुक मुरयालो, शयतान कसन ने शयतान के निकराऊक सकु आय? 24अगर कोनी राज ने फूट पड़ले, तो हुन राज कसन थीर रऊक सकु आय? 25आउर अगर कोनी घर ने फूट पड़ले, तो हुन घर कसन ने थीर रऊक सके? 26ऐईकाजे अगर शयतान आपली ची बिरूदी होऊन भाती आपली ने फूट डाले दे, तो हुन काय बनुन रऊक सके? हुनचो तो खात्मा ची होती।
27“मान्तर कोनी माने कोनी बलबीता चो घर ने ओलुन भाती हुनचो माल नी चोरूक सके, जिदलदाय ले कि हुन पयले हुन बलबीता के नी बान्दे; आउर तेबे हुनचो घर के चोरे दे।” 28“मय तुमचो ले सते बलें सें कि मानेमन चो पिलामन चो सपाय पाप आउर निन्दा जोन हुनमन कर सोत, छमा कराय जाये दे, 29मान्तर जोन कोनी पवितर आत्मा चो बिरूद निन्दा करे दे, हुन केबीई बले छमा नी करा जाये दे: मान्तर हुन अमर पाप चो गुनेगार ठेबु आय।” 30कसनबल्लोने हुनमन ऐ बोलते रवत कि हुनचो ने अशुद्ध आत्मा आसे।
ईशु चो आया आउर भाई
31तेबे हुनचो आया आउर हुनचो भाई ईला, आउर बाहरे उबा होऊन भाती हुनके हाग देऊक पठाला। 32भीड़ हुनचो लगे-लगे बसु रली, आउर हुनमन हुनचो ले बल्ला, “दक, तुचो आया आउर तुचो भाई बाहरे तुके डगराय सोत।” 33हुन हुनमन के जबाप दिलो, “मोचो आया आउर मोचो भाई कोन आत?” 34आउर हुनमन उपरे जोन हुनचो लगे-लगे बसु रवत, नंजराऊन भाती बल्लो, “दका, मोचो आया आउर मोचो भाई ऐमन आत। 35कसनबल्लोने जोन कोनी माहापुरू चो इच्छा थाने चले दे हुनी मोचो भाई, आउर भईन, आउर आया आय।”
Currently Selected:
मरकुस 3: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
