मरकुस 2
2
ईशु लकवा चो रोगी के चेंगा करतोर
1कितलो दिन चो पाचे हुन फेर कफरनहूम ने ईलो, आउर सुना गेली कि हुन घर ने आसे। 2फेर इतलो लोग रूंड़ा होला कि बाट चो लगे बले ठान नी रली; आउर हुन हुनमन के बचन सुनाते रलो। 3आउर लोग गोटक लकवा चो रोगी के चार मानेमन ले उठाऊन भाती हुनचो लगे आनला। 4मान्तर जिदलदाय हुनमन भीड़ चो कारन हुनचो लगे नी अमरूक सकला, तेबे हुनमन हुन छानी के जेचो खाले हुन रये, उगाढुन दिला; आउर जिदलदाय हुनमन हुनके उगाढुन सारला, तेबे हुन खटिया के जोन थाने लकवा चो रोगी पडुन रये, ओराला। 5ईशु हुनमन चो बिश्वास दकुन भाती हुन लकवा चो रोगी के बल्लो, “हे बेटा, तुचो पाप छमा होली।” 6तेबे कितलो शास्तरी जोन हुता बोसु रवत, आपलो-आपलो मन ने बीचार करूक मुरयाला, 7“ऐ माने केंव असन बले से? ऐ तो माहापुरू चो निन्दा करे से! माहापुरू के छांडुन आउर कोन पाप छमा करूक सके?” 8ईशु तुरते आपलो आत्मा ने जानलो कि हुनमन आपलो-आपलो मन ने असन बिचार करे सोत, आउर हुनमन ले बल्लो, “तुमी आपलो-आपलो मन ने ऐ बिचार केंव करेसास? 9सरल काय आय? काय लकवा चो रोगी ले ऐ बोलतोर कि तुचो पाप छमा होली, नाहले ऐ बोलतोर कि उठ आपलो खटिया उठाऊन भाती हिन्ड़ा बुला हो? 10मान्तर जेचो ले तुमी जाना कि माने चो बेटा के धरतनी थाने पाप छमा करतोर बले हक आसे।” हुन हुन लकवा चो रोगी ले बल्लो, 11“मय तुचो ले बलें सें, उठ, आपलो खटिया उठाऊन भाती आपलो घरे जा।” 12हुन उठलो आउर तुरते खटिया उठाऊन भाती सपाय चो पुरे ले निकरून भाती जाते गेलो; ऐ थाने सपाय भक्याला, आउर माहापुरू चो बड़ाई करून बोलुक मुरयाला, “आमी असन केबीई नी दकलु।”
ईशु चो लेवी के हाग देतोर
13हुन फेर निकरून भाती झील चो रेटे गेलो, आउर सपाय भीड़ हुनचो लगे ईली, आउर हुन हुनमन के उपदेश देऊक मुरयालो। 14जाते-जाते हुन हलफई चो बेटा लेवी के उसूली चो नाका थाने बसलोर दकलो, आउर हुनचो ले बल्लो, “मोचो पाट-पाट आव।” आउर हुन उठून भाती हुनचो पाट-पाट गेलो।
15जिदलदाय हुन हुनचो घर ने भात खाऊक बसलो, तेबे खुबे असन उसूली करतो बितामन आउर पापी, ईशु आउर हुनचो चेलामन चो संगे भात खाऊक बसला; कसनबल्लोने हुनमन खुबे असन रवत, आउर हुनचो पाट-पाट होऊ रवत। 16शास्तरीमन आउर फरीसीमन ऐ दकुन भाती कि हुन तो पापीमन आउर उसूली करतो बितामन चो संगे भात खाये से, हुनचो चेलामन ले बल्ला, “हुन तो उसूली करतो बितामन आउर पापीमन चो संगे खाये से पिये से!” 17ईशु ऐ सुनुन भाती हुनमन ले बल्लो, “अच्छा चेंगा के बईद चो जरूरत निआय, मान्तर बेमारमन के आसे: मय धरमीमन के नाई, मान्तर पापीमन के हाग देऊक ईले से।”
उपास चो बारे ने सवाल
18यूहन्ना चो चेलामन, आउर फरीसी उपास करते रवत; आउर हुनमन ऐऊन भाती हुनचो ले ऐ बल्ला, “यूहन्ना चो चेलामन आउर फरीसीमन चो चेलामन केंव उपास संगाय सोत, मान्तर तुचो चेलामन उपास नी संगावत?” 19ईशु हुनमन ले बल्लो, “जिदलदाय ले दुला बरातीमन चो संगे रऊ आय, काय हुनमन उपास करूक सकोत? आउर जिदलदाय ले दुला हुनमन चो संगे आसे, हुदलदाय ले हुनमन उपास नी करूक सकोत। 20मान्तर हुन दिन ऐये दे जिदलदाय दुला हुनमन ले अलग कराय जाये दे; हुन समया हुनमन उपास कर दे।” 21“नवा फटीईमन चो काप जुना फटीई थाने कोनी नी लगा ओत; नाहले हुन काप हुन थानले काई के झिके दे, बल्ले नवा, जुना ले, आउर हुन पयले ले खुबे फाटे दे। 22नवा दाखरस के जुना चामड़ा चो थयलामन ने कोनी नी संगा ओत, नाहले दाखरस थयलामन के फटाऊन देये दे, आउर दाखरस आउर थयलामन दुनो नष्ट होये दे; मान्तर दाख चो नवा रस नवा थयलामन ने भरू आत।”
ईशु सब्त चो परबु
23असन होली कि हुन सब्त चो दिने बेड़ामन बाटले होऊन भाती जाते रलो, आउर हुनचो चेलामन जाते-जाते खेड़ के टुटाऊक मुरयाला। 24तेबे फरीसीमन हुनचो ले बल्ला, “दक; ये सब्त चो दिने हुन काम केंव करे सोत जोन ठीक नुआय?” 25हुन हुनमन ले बल्लो, “काय तुमी ऐ केबीई नी पड़लासास कि जिदलदाय दाऊद के जरूरत होली, आउर जिदलदाय हुन आउर हुनचो संगवारी भूके होला, तेबे हुन काय करू रलो? 26हुन कसन अबियातार माहायाजक चो समया, माहापुरू चो भवन ने जाऊन भाती भेट चो रोटीमन खादला, जेचो खातोर याजकमन के छांडुन आउर कोकीई बले ठीक नुआय, आउर आपलो संगवारीमन के बले दिलो?” 27तेबे हुन हुनमन ले बल्लो, “सब्त चो दिन माने काजे बनालोर आसे, ना कि माने सब्त चो दिन चो काजे। 28ऐईकाजे माने चो बेटा सब्त चो दिन चो बले मालिक आय।”
Currently Selected:
मरकुस 2: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
