मरकुस 1
1
यूहन्ना डूबन देतो बिता चो परचार
1माहापुरू चो बेटा ईशु मसीह चो नगतखबर चो मुर। 2जसन यशाया अगम गिआनी चो किताब ने लिकलोर आसे
“दक, मय आपलो दूत के तुचो पुरे पटायें से,
जोन तुचो काजे बाट सुधराये दे।
3रान ने गोटक हाग देतो बिता चो शब्द सुना देये से कि
परबु चो बाट तिआर करा, आउर हुनचो
सड़कमन सीदा करा।”
4यूहन्ना ईलो, जोन रान ने डूबन देते, आउर पापमन चो छमा काजे मन फिराव चो डूबन चो परचार करते रलो। 5पूईतराय यहूदी परदेश चो, आउर यरूशलेम चो सपाय रतो बितामन निकरून भाती हुनचो लगे गेला, आउर आपलो पापमन के मानुन भाती यरदन लंदी ने हुनचो ले डूबन धरला। 6यूहन्ना ऊंट चो रूंआ चो फटीई पिन्दुन आउर आपलो करांड ने चामड़ा चो पट्टा बान्दुन रते रये आउर थापामन आउर रान ओंडार खाते रलो, 7आउर ऐ परचार करते रलो, “मोचो पाचे हुन ऐतो बिता आय, जोन मोचो ले शक्ति बिता आय; मय ऐ लायक नुआय कि लोऊन भाती हुनचो पनही चो बांदन ढिलें। 8मय तो तुमीमन के पानी ले डूबन दिले से मान्तर हुन तुमीमन के पवितर आत्मा ले डूबन देयेदे।”
ईशु चो डूबन
9हुन दिनमन ने ईशु गलील चो नासरत ले ऐऊन भाती, यरदन ने यूहन्ना ले डूबन धरलो। 10आउर जिदलदाय हुन पानी ले निकरून भाती उपरे ईलो, तेबे तुरते हुन बादरी के उगाढ़ी होतोर आउर आत्मा के परेयां चो असन आपलो उपरे उतरतोर दकलो। 11आउर ऐ आकाशबानी होली, “तुय मोचो लाड़रा बेटा आस, तुचो ले मय हरिक आंसे।”
ईशु चो परीक्षा
12तेबे आत्मा तुरते हुनके रान चो बाटे पठालो। 13रान ने चालीस दिन तक शयतान हुनचो परीक्षा करलो; आउर हुन रान पशुमन चो संगे रलो, आउर सरगदूत हुनचो सेवा करते रवत।
गलील ने ईशु चो परचार
14यूहन्ना चो धराया गेलोर पाचे ईशु गलील ने ऐऊन भाती माहापुरू चो राज चो नगतखबर परचार करलो, 15आउर बल्लो, “समया पुरा होली से, आउर माहापुरू चो राज लगे ईली से; मन फिराआ आउर नगतखबर थाने बिश्वास करा।”
चार झान मछरी धरूमन के हाग देतोर
16गलील चो झील चो कटा-कटा जाते-जाते, हुन शिमोन आउर हुनचो भाई अन्द्रियास के झील ने झारी पकातोर दकलो; कसनबल्लोने हुनमन मछरी धरतो बितामन रवत। 17ईशु हुनमन ले बल्लो, “मोचो पाटे ईआ; मय तुमके मानेमन के धरतो बिता बनायें दें।” 18हुनमन तुरते झारीमन के छांडुन भाती हुनचो पाट-पाट गेला। 19खिन्डिक पुरे जाऊन भाती, हुन जबदी चो बेटा याकूब, आउर हुनचो भाई यूहन्ना के, ड़ोंगा ने झारीमन के जतनाते दकलो। 20हुन तुरते हुनमन के हाग दिलो; आउर हुनमन आपलो बुआ जबदी के भुतियारमन चो संगे ड़ोंगा थाने छांडुन भाती, हुनचो पाट-पाट गेला।
दुष्टआत्मा भीड़लो माने के अच्छा करतोर
21तेबे हुनमन कफरनहूम ने ईला, आउर हुन तुरते सब्त चो दिने आराधना घर ने जाऊन भाती उपदेश करूक मुरयालो। 22आउर लोग हुनचो उपदेश ले अकचकित होला; कसनबल्लोने हुन हुनमन के शास्तरीमन चो असन नाई, मान्तर अधिकारी चो असन उपदेश देते रये। 23हुनी समया, हुनमन चो आराधना घर ने गोटक माने रलो, जेचो थाने गोटक अशुद्ध आत्मा रली। 24हुन चिचयाऊन भाती बल्लो, “हे ईशु नासरी, आमके तुचो ले काय काम? काय तुय आमके नष्ट करूक ईली सीस? मय तुके जाने, तुय कोन आस? माहापुरू चो पवितर जन!” 25ईशु हुनके धमकाऊन भाती बल्लो, “ओगाय रा; आउर हुनचो थानले निकरून जा।” 26तेबे अशुद्ध आत्मा हुनके अलटून भाती, आउर बड़े जोर ले चिचयाऊन भाती हुनचो थानले निकरली। 27ऐ थाने सपाय लोग अकचकित होऊन भाती आपन ने बहस करूक मुरयाला, “ऐ काय गोठ आय? ऐ तो कोनी नवा उपदेश आय! हुन हक चो संगे अशुद्ध आत्मामन के बले हुकुम देऊ आय, आउर हुनमन हुनचो हुकुम मानु आत।” 28आउर हुनचो नाव तुरते गलील चो लगे-लगे चो पूईतराय दुसर राज ने फयलली।
बेमारीमन के चेंगा करतोर
29हुन तुरते आराधना घर ले निकरून भाती, याकूब आउर यूहन्ना चो संगे शिमोन आउर अन्द्रियास चो घरे ईलो। 30शिमोन चो सतरी जर ने पढु रली, आउर हुनमन तुरते हुनचो बारे ने हुनचो ले बल्ला। 31तेबे हुन लगे जाऊन भाती हुनचो हाथ धरून हुनके उठालो; आउर हुनचो जर उतरून गेली, आउर हुन हुनमन चो सेवा करूक मुरयाली। 32संझ चो समया जिदलदाय बेर बसली तेबे लोग सपाय बेमारमन के आउर हुनमन के, जोनमन थाने दुष्टआत्मामन रली, हुनचो लगे आनला। 33आउर पूईतराय नंगर चो लोग दुआर थाने रूंड़ा होला। 34हुन खुबे के जोन नाना परकार चो बेमारमन ले दुखी रवत, चेंगा करलो, खुबे असन दुष्टआत्मामन के निकरालो, आउर दुष्टआत्मामन के बोलुक नी दिलो, कसनबल्लोने हुनमन हुनके चिता ते रवत।
ऐकला ने ईशु चो पारथना करतोर
35बड़े बिहाने दिन निकरतोर ले खुबे पयले, हुन उठून भाती निकरलो, आउर गोटक रान जगा ने गेलो आउर हुता पारथना करूक मुरयालो। 36तेबे शिमोन आउर हुनचो संगवारी हुनचो खोज ने गेला। 37जिदलदाय हुन मिरलो, तेबे हुनचो ले बल्ला, “सपाय लोग तुके डगराय सोत।” 38हुन हुनमन ले बल्लो, “ईआ; आमी आउर कोनी लगे-लगे चो गाँवमन ने जांवा, कि मय हुता बले परचार करेंदे, कसनबल्लोने मय ऐईकाजे निकरले से।” 39आउर हुन सपाय गलील ने हुनमन चो आराधना घरमन ने जाऊन-जाऊन भाती परचार करते आउर दुष्टआत्मामन के निकरा ते रलो।
ईशु चो कोढ़ी के चेंगा करतोर
40गोटक कोढ़ी हुनचो लगे ईलो, हुनचो ले गुहार लो, आउर हुनचो पुरे मांडी पाडून भाती हुनचो ले बल्लो, “अगर तुय चाह लो ने तो मोके शुद्ध करूक सकीस।” 41हुन हुनचो उपरे जीव दुकान भाती हाथ बड़ालो, आउर हुनके छिंऊन भाती बल्लो, “मय चाहायें सें तुय शुद्ध होऊन जा।” 42आउर तुरते हुनचो कोढ़ छांडली आउर हुन शुद्ध होलो। 43तेबे हुन हुनके जनाऊन भाती तुरते बिदा करलो, 44आउर हुनचो ले बल्लो, “दक, काचीई ले काई नी बोल, मान्तर जाऊन भाती आपन खुद के याजक के दकाव, आउर आपलो शुद्ध होलोर बारे ने जोन काई मूसा ठेबालो से हुनके भेट चेगाव कि हुनमन थाने गोहई होओ।” 45मान्तर हुन बाहरे जाऊन भाती ऐ गोठ चो खुबे परचार करूक आउर ऐथा तक फयलाऊक मुरयालो कि ईशु फेर खुलम खुला नंगर ने नी जाऊक सकलो, मान्तर बाहरे रानमन ने रलो; आउर भोंवरक ले लोग हुनचो लगे ऐते रवत।
Currently Selected:
मरकुस 1: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
