मत्ती 27
27
पिलातुस चो पुरे ईशु
1जिदलदाय बिहान होली तेबे सपाय परधान याजकमन आउर लोगमन चो सियानमन ईशु के मारतोर सहमती करला। 2हुनमन हुनके बान्दला आउर नेऊन भाती पिलातुस मुखिया चो हाथ ने सोपला।
यहूदा इस्करियोती चो आत्माहत्या
3जिदलदाय हुनचो धरातो बिता यहूदा दकलो कि हुन दोषी ठेबाय गेलो से तेबे हुन पसतालो आउर हुन तीस चाँदी चो सिका परधान याजकमन आउर सियानमन चो लगे आपस आनलो 4आउर बल्लो, “मय बेकसूर के मरातो काजे धराऊन भाती पाप करले से!” हुनमन बल्ला, “आमके काय आय? तुय ची जान।” 5तेबे हुन-हुन सिकामन के मंदिर ने पकाऊन भाती जाते गेलो, आउर जाऊन भाती आपन खुद के फांसी दिलो।
6परधान याजकमन हुन सिकामन के धरून भाती बल्ला, “ऐ मन के, भण्डार ने संगातोर नगत नुआय, कसनबल्लोने ऐ लऊ चो कीमत आय।” 7आउर हुनमन सलाह करून हुन सिकामन ले परदेशीमन चो तोपा जातो काजे कुमार चो बेड़ा घेनुन धरला। 8ऐई लागुन हुन बेड़ा आजी ले लऊ चो बेड़ा बलाया जाऊ आय। 9तेबे जोन बचन यरमिया अगम गिआनी चो बाटले बोला जाऊ रली हुन पुरा होली “हुनमन हुन तीस सिका बल्लोने हुन ठेबालो बिती कीमत के (जोन के इस्राएल चो पिलामन थानले कितलो लोगमन ठेबाऊन रला) धरला, 10आउर जसन परबु मोके हुकुम देऊ रलो असने ची हुनमन के कुमार चो बेड़ा चो कीमत ने देउन दिले।”
पिलातुस चो ईशु ले सवाल
11जिदलदाय ईशु मुखिया चो पुरे उबा रलो तेबे हाकिम हुनचो ले पचारलो, “काय तुय यहूदीमन चो राजा आस?” ईशु हुनचो ले बल्लो, “तुय खुद बोल सीस।” 12जिदलदाय परधान याजक आउर पुरनिमन हुनचो उपरे दोष लगाते रवत, तेबे हुन काई जबाप नी दिलो। 13ऐ थाने पिलातुस हुनचो ले बल्लो, “काय तुय नी सुनीस कि ऐ तुचो बिरूद ने कितलो गोहईमन दे सोत?” 14मान्तर हुन हुनके गोटक गोठ चो बले जबाप नी दिलो, ऐ थानले कि मुखिया के बड़े अकचकित होली।
ईशु के पिलातुस छांडुक नी सकलो
15मुखिया चो ऐ नियम रली कि हुन तिआर ने लोगमन चो काजे कोनी गोटक बंदी के जेके हुनमन मन करोत, छांडुन देते रलो। 16हुन समया हुनमन चो थाने बरअब्बा नाव चो गोटक नामी बंदी रलो। 17आउर जिदलदाय हुनमन रूंड़ा होला, तेबे पिलातुस हुनमन ले बल्लो, “तुमी कोके चाहायसास कि मय तुमचो काजे छांडुन देयें दें? बरअब्बा के, नाहले ईशु के जोन मसीह बलाऊ आय?” 18कसनबल्लोने हुन जानते रलो कि हुनमन हुनके कपट ले धराला से। 19जिदलदाय हुन नियाय आसन थाने बसु रलो तेबे हुनचो बायले हुनचो ले खबर पठाली, “तुय हुन धरमी चो मामला ने हाथ नी डाल, कसनबल्लोने मय आजी सपना ने हुनचो लागुन खुबे दुख उठाले से।”
20परधान याजकमन आउर सियानमन लोगमन के उच-उचाला कि हुनमन बरअब्बा के मांगोत, आउर ईशु चो नाश करा ओत। 21मुखिया हुनमन ले पूछलो, “ऐ दुनो झान ले कोन के मन करसास कि मय तुमचो काजे छांडुन देयें दें?” हुनमन बल्ला, “बरअब्बा के।” 22पिलातुस हुनमन ले पूछलो, “फेर ईशु के, जोन मसीह बलाया जाऊ आय, काय करू आंय?” सपाय हुनचो ले बल्ला, “हुन कुरूस थाने चेगाया जाओ!” 23हाकिम बल्लो, “केंव, हुन काय खराप करलो से?” मान्तर हुनमन आउर बले चिचयाऊन-चिचयाऊन भाती बोलुक मुरयाला, “हुन कुरूस थाने चेगाया जाओ।” 24जिदलदाय पिलातुस दकलो कि काई बन नी पढ़े से मान्तर ऐचो उलटा कोलार बड़ते जाये से, तेबे हुन पानी धरून भीड़ चो पुरे आपलो हाथ धोहलो आउर बल्लो, “मय ऐ धरमी चो लऊ ले बेकसूर आंय; तुमी ची जाना।” 25सपाय लोगमन जबाप दिला, “ऐचो लऊ आमचो उपरे आउर आमचो पिलामन उपरे होओ!”
कुरूस थाने चेगातो काजे सोपतोर
26ऐ थाने हुन बरअब्बा के हुनमन चो काजे छांडुन दिलो, आउर ईशु के कोड़ा माराऊन भाती सोपलो, कि कुरूस थाने चेगाया जाओ।
पलटनमन बाटले ईशु चो अपमान
27तेबे हाकिम चो पलटनमन ईशु के किला ने नेऊन भाती पुईतराय पलटन हुनचो भोंवरक रून्डला, 28आउर हुनचो फटीई निकराऊन भाती हुनके लाल रंग चो पटका पिन्दाला, 29आउर काटामन चो मुकुट गातुन भाती हुनचो मुण्ड थाने संगाला, आउर हुनचो उजा हाथ ने राज बड़गी दिला आउर हुनचो पुरे मांडी पाडून भाती हुनके मजाक उड़ाला आउर बल्ला, “हे यहूदीमन चो राजा, जुहार!” 30आउर हुनचो उपरे थुकला; आउर हुनी राज बड़गी धरून भाती हुनचो मुण्ड थाने मारूक मुरयाला। 31जिदलदाय हुनमन हुनचो मजाक करला, तेबे हुन पटका हुनचो थानले हिटाऊन भाती फेर हुनची फटीई हुनके पिन्दाला, आउर कुरूस थाने चेगातो काजे धरून गेला।
ईशु के कुरूस उपरे चेगातोर
32बाहरे जाते-जाते हुनमन के शिमोन नाव चो गोटक कुरेनी माने मिरलो। हुनमन हुनके फकाहा ने धरला कि हुनचो कुरूस उठाऊन धरून जाओ। 33हुन जगा थाने जोन गुलगुता बल्लोने खोपड़ी चो जगा बलाया जाऊ आय, अमरून भाती 34हुनमन पीता मिसा लो बिती दाखरस हुनके पिव तो काजे दिला, मान्तर हुन चाकुन भाती पिऊक नी चाहा लो। 35तेबे हुनमन हुनके कुरूस थाने चेगाला, आउर चिठ्ठीमन डालुन भाती हुनचो फटीई बाटला, 36आउर हुता बसुन भाती हुनचो राका देऊक मुरयाला। 37आउर हुनचो दोष पतर हुनचो मुण्ड चो उपरे लगाला, कि “ऐ यहूदीमन चो राजा ईशु आय”। 38तेबे हुनचो संगे दुय झान डाकु गोटक उजा आउर डेबरी, कुरूसमन उपरे चेगाला। 39ऐतो जातो लोग मुण्ड हलान-हलान भाती हुनचो निन्दा करते रवत, 40आउर ऐ बलते रवत, “हे मंदिर के घसरातो बिता आउर तीन दिन ने बनातो बिता, आपन खुद के तो बचाव! अगर तुय माहापुरू चो बेटा आस, तो कुरूस थानले उतरून आव।” 41ऐई रीति ले परधान याजक बले शास्तरीमन आउर सियानमन संगे मजाक करून-करून बलते रवत, 42“ऐ दुसर के बचालो, आउर आपन खुद के नी बचाऊक सके। ऐ तो ‘इस्राएल चो राजा’ आय। अदायं कुरूस थानले उतरून ऐओ तेबे आमी हुनचो उपरे बिश्वास करवां। 43हुन माहापुरू चो उपरे भरसा संगालो से; अगर हुन ऐके चाहाऊ आय, तेबे अदायं ऐके छंड़ाओ, कसनबल्लोने ऐ बोलु रलो, ‘मय माहापुरू चो बेटा आंय’।” 44ऐई परकार डाकु बले जोन हुनचो संगे कुरूसमन थाने चेगाया जाऊ रवत, हुनचो निन्दा करते रवत।
ईशु चो जीव जातोर
45दुसर पाहार ले धरून भाती तीसर पाहार ले हुन पुईतराय देश ने अंधार छाऊन रली। 46तीसर पाहार चो लगे ईशु बड़े शब्द ले चिचयाऊन भाती बल्लो, “एली, एली, लमा शबक्तनी?” बल्लोने “हे मोचो माहापुरू, हे मोचो माहापुरू, तुय मोके केंव छांडुन दिलीस?” 47जोन हुता उबा रवत, हुनमन थानले कितलो ऐ सुनुन भाती बल्ला, “हुन तो एलिया के हाग देये से।” 48हुनमन थानले गोटक तुरते परालो, आउर चिमटा धरून भाती सिरका ने चबरलो, आउर राज बड़गी थाने संगाऊन भाती हुनके चुपरालो। 49दुसरमन बल्ला, “रा, दकवां एलिया हुनके बचाऊक ऐऊ आय कि नाई।” 50तेबे ईशु फेर बड़े शब्द ले चिचयाऊन भाती जीव छांडलो। 51आउर दका, मंदिर चो परदा उपर ले खाले तक फाटून भाती दुय गोंदा होली: आउर धरतनी डोलली आउर पकनामन चिड़कली। 52आउर कबरमन खुलुन गेली, आउर सोहलोर पवितर लोगमन चो खुबे असन लाश जीव उठली। 53आउर हुनचो जीव उठलोर पाचे हुनमन कबरमन थानले निकरून भाती पवितर नंगर ने गेला आउर खुबेमन के दका दिला। 54तेबे सुबेदार आउर जोन हुनचो संगे ईशु चो पाहारा देते रवत भुईं डोल आउर जोन काई होऊ रली हुनके दकुन भाती ऐकदाय डरला आउर बल्ला, “सत-सत ऐ माहापुरू चो बेटा रलो!” 55हुता खुबे असन बायले लेकी जोन गलील ले ईशु चो सेवा करते-करते हुनचो संगे ऐऊ रवत, लापी ले ऐ दकते रवत। 56हुन थाने मरियम मगदलीनी, आउर याकूब आउर योसेस चो आया मरियम, आउर जबदी चो बेटामन चो आया रली।
ईशु के माटी देतोर
57जिदलदाय संज होली तेबे यूसुफ नाव चो अरिमतिया चो गोटक सवकार माने, जोन खुद ईशु चो चेला रलो, ईलो। 58हुन पिलातुस चो लगे जाऊन भाती ईशु चो लाश मांगलो। ऐ थाने पिलातुस देतोर हुकुम दिलो। 59यूसुफ लाश के धरलो, हुनके उजर चदर ने गुन्ड़ीयालो, 60आउर हुनके आपलो नवा कबर ने संगालो, जोन हुन पकना ने खोड़ाऊन रलो, आउर कबर चो बाट थाने बड़े पकना उलटाऊन भाती गेलो। 61मरियम मगदलीनी आउर दुसर मरियम हुता कबर चो पुरे बसुन रवत।
ईशु चो कबर थाने राका
62दुसर दिने जोन तिआर चो दिन चो पाचे चो दिन रली, परधान याजकमन आउर फरीसीमन पिलातुस चो लगे रूंड़ा होऊन भाती बल्ला, 63“हे मालिक, आमके सुरता आसे कि हुन भरमातो बिता जिदलदाय हुन जीव रलो, बोलुन रलो, ‘मय तीन दिन चो पाचे जीव उठेंदें।’ 64आउर हुकुम देस कि तीसर दिन ले कबर चो राका करा जाओ, असन नी होओ कि हुनचो चेलामन ऐऊन भाती हुनके चोरून नेओत आउर लोगमन ले बोलुक मुरयाओत, हुन मरलो बितामन थानले जीव उठलो से। तेबे पाचे चो धोका पयले ले बले खराप होयेदे।” 65पिलातुस हुनमन ले बल्लो, “तुमचो लगे राका करूमन तो आसोत। जाआ, आपलो समज चो अनुसार राका करा।” 66आउर हुनमन राका करूमन के संगे धरून भाती गेला, आउर पकना उपरे सील लगाऊन भाती कबर चो राका करला।
Currently Selected:
मत्ती 27: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
