मत्ती 26
26
ईशु चो हत्या चो खराप उआट
1जिदलदाय ईशु ऐ सपाय गोठमन बोलुन चुकलो तेबे आपलो चेलामन ले बोलुक मुरयालो, 2“तुमी जानास कि दुय दिन चो पाचे फसह चो तिआर आय, आउर माने चो बेटा कुरूस उपरे चेगाया जातो काजे धराया जाये दे।” 3तेबे परधान याजक आउर परजा चो पुरनिमन कैफा नाव चो माहायाजक चो दुआर ने रूंड़ा होला, 4आउर आपस ने बिचार करूक मुरयाला कि ईशु के छंद ले धरून भाती मारूदें। 5मान्तर हुनमन बलते रवत, “तिआर चो समया नाई, काहांय असन नी होओ कि लोगमन ने बलवा मचुन जाओ।”
ईशु उपरे खुबे मोल इतर के छिंछतोर
6जिदलदाय ईशु बैतनिय्याह ने शिमोन कोढ़ी चो घर ने रलो, 7तेबे गोटक बायले लेकी संगमरमर पकना चो बनलो कोंड़ी ने खुबे मोल चो इतर धरून भाती हुनचो लगे ईली, आउर जिदलदाय हुन भात खाऊक बसलो तेबे हुनचो मुण्ड थाने रीकाली। 8ऐ दकुन भाती हुनचो चेलामन घुरयाला आउर बोलुक मुरयाला, “ऐचो केंव सत्यानाश करली? 9ऐके तो अच्छा रेट थाने बिकुन भाती कंगालमन के बाटुक सकते रऊँ।” 10ऐ जानुन भाती ईशु हुनमन ले बल्लो, “बायले लेकी के केंव कन्दरायसास? हुन मोचो संगे अच्छा करली से। 11कंगाल तो तुमचो संगे हरमेशा रऊ आत, मान्तर मय तुमचो संगे हरमेशा नी रये। 12हुन मोचो देंह उपरे जोन ऐ इतर रीकाली से, हुन मोचो तोपा जातो काजे करली से। 13मय तुमचो ले सते बलें सें, कि सपाय जगत ने जाहांय बले ऐ नगतखबर के परचार करा जाये दे, हुता हुनचो ऐ काम चो गोठ बले हुनचो सुरता ने करा जाये दे।”
यहूदा इस्करियोती चो बिश्वासघात
14तेबे यहूदा इस्करियोती, जोन बारा चेलामन थानले गोटक रलो, परधान याजकमन चो लगे जाऊन भाती बल्लो, 15“अगर मय हुनके तुमचो हाथे धराऊन देयें दें तेबे मोके काय दिआ से?” हुनमन हुनके तीस चाँदी चो सिका तवलुन भाती दिला। 16आउर हुन हुदलीदाय ले हुनके धरातोर मवका डगराऊक मुरयालो।
चेलामन चो संगे फसह चो आखरी भोज
17अखमीरी रोटी चो तिआर चो पयला दिने, चेलामन ईशु लगे ऐऊन भाती पचारूक मुरयाला, “तुय काहां मन कर सीस कि आमी तुचो काजे फसह खातोर तिआर करवां?” 18हुन बल्लो, “नंगर ने अनजान माने चो लगे जाऊन भाती हुनचो ले बल्ला, ‘गुरू बले से कि मोचो समया लगे आसे। मय आपलो चेलामन संगे तुचो थाने फसह मनाय दें’।” 19आउर चेलामन ईशु चो हुकुम मानला आउर फसह तिआर करला।
20जिदलदाय संज होली तेबे हुन बारा झान चेलामन चो संगे भात खातो काजे बसलो। 21जिदलदाय हुनमन खाते रवत तेबे हुन बल्लो, “मय तुमचो ले सते बलेंसें कि तुमनमन ले गोटक मोके धरायदे।” 22ऐ थाने हुनमन खुबे मुरमुरा होला, आउर हरकोनी हुनचो ले पचारूक मुरयाला, “हे गुरू, काय हुन मय आय?” 23हुन जबाप दिलो, “जोन मोचो संगे थारी ने हाथ संगालो से, हुनी मोके धरायदे। 24माने चो बेटा तो जसन हुनचो बारे ने लिकलोर आसे, जाऊ ची आय; मान्तर हुन माने चो काजे दुख आय जेचो दुवारा माने चो बेटा धराया जाये से: अगर हुन माने चो जनम नी होती, तेबे हुनचो काजे अच्छा होती।” 25तेबे हुनचो धरातो बिता यहूदा बल्लो, “हे रब्बी, काय हुन मय आय?” हुन हुनचो ले बल्लो, “तुय बललीस।”
परबु भोज
26जिदलदाय हुनमन खाते रवत तेबे ईशु रोटी धरलो, आउर आशीष मांगुन भाती टुटालो, आउर चेलामन के देऊन भाती बल्लो, “धरा, खाआ; ऐ मोचो देंह आय।” 27फेर हुन बटका धरून भाती धन्यबाद करलो, आउर हुनमन के देऊन भाती बल्लो, “तुमी सपाय ऐ थानले पिआ, 28कसनबल्लोने ऐ बायदा चो मोचो हुन लऊ आय, जोन खुबेमन चो काजे पापमन चो छमा चो लागुन बहाया जाये से। 29मय तुमचो ले बलेंसें कि अंगुर चो रस हुन दिन ले केबीई नी पियें, जिदलदाय ले तुमचो संगे आपलो बुआ चो राज ने नवा नी पियें।” 30फेर हुनमन भजन गाऊन भाती जैतून डोंगरी थाने गेला।
पतरस चो इन्कार चो अगम गोठ
31तेबे ईशु हुनमन ले बल्लो, “तुमी सपाय आजी ची राती के मोचो बारे ने ठोकर खाआ से; कसनबल्लोने लिकलोर आसे, ‘मय धोरीमन के मारेंदें; आउर गोहड़ी चो मेंडामन जतखत होदे।’ 32मान्तर मय आपलो जीव उठलोर पाचे तुमचो ले पयले गलील ने जायें दें।” 33ऐ थाने पतरस हुनचो ले बल्लो, “अगर सपाय तुचो बारे ने ठोकर खावले खाओत, मान्तर मय केबीई बले ठोकर नी खायें।” 34ईशु हुनचो ले बल्लो, “मय तुचो ले सते बलेंसें कि आजी ची राती के कुकड़ा चो बासतोर पयले, तुय तीन हार मोचो ले मुकरून जासे।” 35पतरस हुनचो ले बल्लो, “अगर मोके तुचो संगे मरूक बले पड़ो, तेबले बले मय तुचो ले केबीई नी मुखरे।” आउर असने ची सपाय चेलामन बले बल्ला।
गतसमनी चो बनवाड़ी ने पारथना
36तेबे ईशु आपलो चेलामन चो संगे गतसमनी नाव चो गोटक जगा ने ईलो आउर आपलो चेलामन ले बोलुक मुरयालो, “ऐथाय बसुन राहा, जिदलदाय ले मय हुता जाऊन भाती पारथना करेंदे।” 37हुन पतरस आउर जबदी चो दुनो बेटामन के संगे धरून गेलो, आउर मुरमुरा आउर बाय बिकाल होलो। 38तेबे हुन हुनमन ले बल्लो, “मोचो जीव खुबे मुरमुरा आसे, ऐथा ले कि मोचो जीव निकरून जाये से। तुमी ऐथाय थेबा आउर मोचो संगे चेता रहा।” 39फेर हुन खिन्डिक आउर पुरे जाऊन भाती पाटा पडुन घसरलो, आउर ऐ पारथना करलो, “हे मोचो बुआ, अगर होऊक सके तो ऐ बटका मोचो ले गुचुन जाओ, तेबले बले जसन मय मन करें से असन नाई, मान्तर जसन तुय मन कर सीस असने होओ।” 40फेर हुन चेलामन चो लगे ऐऊन भाती हुनमन के सोहतोर भेटलो आउर पतरस ले बल्लो, “काय तुमी मोचो संगे गोटक घड़ी बले नी चेतुक सकलास? 41चेता राहा, आउर पारथना करते राहा कि तुमी परीक्षा ने नी पड़ा! आत्मा तो तिआर आसे, मान्तर देंह कमजोर आसे।” 42फेर हुन दुसरहार जाऊन भाती ऐ पारथना करलो, “हे मोचो बुआ, अगर ऐ मोचो पिवलो बिना नी गुचुक सके तो तुचो इच्छा पुरा होओ।” 43तेबे हुन ऐऊन भाती हुनमन के फेर सोहतोर भेटलो, कसनबल्लोने हुनमन चो आँईकमन झुमा ले भरून रली। 44हुनमन के छांडुन भाती हुन फेर जाते गेलो, आउर हुनी ची शब्दमन ने फेर तीसर हार पारथना करलो। 45तेबे हुन चेलामन लगे ऐऊन भाती हुनमन ले बल्लो, “अदायं सोहते राहा, आउर आराम करा: दका, बेरा ऐऊन अमरली से, आउर माने चो बेटा पापीमन चो हाथे धराया जाये से। 46उठा, जांव; दका, मोचो धरातो बिता लगे अमरलो से।”
ईशु के बन्दी बनातोर
47हुन ऐ बोलते रलो कि यहूदा जोन बारा झान ने गोटक रलो ईलो, आउर हुनचो संगे परधान याजकमन आउर लोगमन चो सियानमन चो बाटले बड़े भीड़, खंडामन आउर ठेंगामन धरून भाती ईली। 48हुनचो धरातो बिता हुनमन के ऐ सोयका देऊ रलो: “जेके मय चुमें दें हुनी आय; हुनके धरा।” 49आउर तुरते ईशु चो लगे ऐऊन भाती बल्लो, “हे रब्बी, जुहार!” आउर हुनके खुबे चुमलो। 50ईशु हुनचो ले बल्लो, “हे मीत, जोन काम काजे तुय ईली सीस, हुनके कर।” तेबे हुनमन लगे ऐऊन भाती ईशु उपरे हाथ लगाला आउर हुनके धरला। 51ईशु चो संगवारीमन थानले गोटक हाथ लमाऊन भाती आपलो खंडा झिकलो आउर माहायाजक चो दास उपरे चलाऊन भाती हुनचो कान काट लो। 52तेबे ईशु हुनचो ले बल्लो, “आपलो खंडा मयान ने संगाव कसनबल्लोने जोन खंडा चलाऊ आत हुनमन सपाय खंडा ले नष्ट करा जादे। 53काय तुय नी जानीस कि मय आपलो बुआ ले बिनती करूक सकें, आउर हुन सरग दूतमन चो बारा पलटन ले आगर मोचो लगे ऐबे हाजिर करून देये दे? 54मान्तर पवितर शास्त्र चो हुन गोठमन कि असने ची होतोर जरूरी आय, कसन पुरा होये दे?” 55हुन समया ईशु भीड़ ले बल्लो, “काय तुमी खंडामन आउर ठेंगामन धरून भाती मोके डाकु चो असन धरतो काजे निकरलासास? मय रोजे दिना मंदिर ने बसुन भाती उपदेश देते रले, आउर तुमी मोके नी धरलास। 56मान्तर ऐ सपाय ऐईकाजे होली कि अगम गिआनीमन चो बचन पुरा होओ।” तेबे सपाय चेलामन हुनके छांडुन भाती पराला।
कयफा चो पुरे ईशु
57तेबे ईशु चो धरतो बितामन हुनके कैफा नाव चो माहायाजक लगे धरून गेला, जोन थाने शास्तरी आउर पुरनिमन रूंड़ा होऊन रवत। 58पतरस लापी ची लापी हुनचो पाट-पाट माहायाजक चो दुआर लगले गेलो, आउर भीतरे जाऊन भाती आखरी दकतो काजे पलटनमन संगे बसलो। 59परधान याजक आउर पुईतराय माहासभा ईशु के मारतो काजे हुनचो बिरूद ने झूठा गोहई चो खोज ने रवत, 60मान्तर खुबे असन झूठा गोहईमन चो ईलो थानले बले नी पावला। आखरी ने दुय झान ईला, 61आउर बल्ला, “ऐ बल्लो से कि मय माहापुरू चो मंदिर के घसराऊक सकें आउर हुनके तीन दिन ने बनाऊक सकें।”
62तेबे माहायाजक उबा होऊन भाती ईशु ले बल्लो, “काय तुय काई जबाप नी देईस? ऐ लोग तुचो बिरूद ने काय गोहई देये सोत?” 63मान्तर ईशु ओगाय रलो। तेबे माहायाजक हुनचो ले बल्लो, “मय तुके जीवता माहापुरू चो किरिया देयें सें कि अगर तुय माहापुरू चो बेटा मसीह आस, तो आमके बोलुन देस।” 64ईशु हुनचो ले बल्लो, “तुय खुद बललीस; मान्तर मय तुमचो ले ऐ बले बलें सें कि अदायं ले तुमी माने चो बेटा के सर्वशक्तिमान चो उजा बाटे बसलोर, आउर बादरी चो कुमरामन उपरे ऐतोर दका से।” 65ऐ थाने माहायाजक आपलो फटीई चिरलो आउर बल्लो, “ऐ माहापुरू चो निन्दा करलो, अदायं आमके गोहईमन चो काय जरूरत? दका, तुमी ऐबे ऐ निन्दा सुनलासास! 66तुमी काय बिचारसास?” हुनमन जबाप दिला, “ऐ बद होतोर लायक आय।” 67तेबे हुनमन हुनचो थोमना थाने थुकला आउर हुनके ठुसा मारला, दुसरमन थापड़ मारून बल्ला, 68“हे मसीह, आमचो ले अगम गोठ करून बोल कि कोन तुके मारला?”
पतरस चो ईशु के इन्कार करतोर
69पतरस बाहरे दुआर ने बोसुन रलो कि गोटक दासी हुनचो लगे ईली आउर बल्ली, “तुय बले ईशु गलीली चो संगे रलीस।” 70हुन सपाय चो पुरे ऐ बोलते-बोलते इन्कार करलो, “मय नी जाने तुय काय बोल सीस।” 71जिदलदाय हुन बहारे डेवना ने गेलो, तेबे दुसर दासी हुनके दकुन भाती हुनमन ले जोन हुता रवत बल्ली, “ऐ बल्ले तो ईशु नासरी चो संगे रलो।” 72हुन किरिया खाऊन भाती फेर इन्कार करलो, “मय हुन माने के नी जाने।” 73खिन्डिक बेर पाचे लोगमन जोन हुता उबा रवत, पतरस चो लगे ऐऊन भाती हुनचो ले बल्ला, “सते तुय बले हुनमन थानले गोटक आस, कसनबल्लोने तुचो बोली तुचो भेद खोलुन देये से।” 74तेबे हुन पसताऊक आउर किरिया खाऊक मुरयालो, “मय हुन माने के नी जाने।” आउर तुरते कुकड़ा बासली। 75तेबे पतरस के ईशु चो बल्लो गोठ सुरता ईली, “कुकड़ा बासतोर पयले तुय तीन हार मोचो इन्कार कर से।” आउर हुन बाहरे जाऊन भाती हुमारून-हुमारून गागलो।
Currently Selected:
मत्ती 26: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
