लूका 9
9
बारा पठालोबितामन चो पटाय जातोर
1फेर हुन बारहों के हाग देऊन भाती हुनमन के सपाय दुष्टआत्मामन आउर बेमारमन के चेंगा करतो सामरत आउर अधिकार दिलो। 2आउर हुनमन के माहापुरू चो राज चो परचार करतोर आउर बेमारमन के अच्छा करतो काजे पठालो। 3हुन हुनमन ले बल्लो, “बाट चो काजे काई नी धरा, ना तो बड़गी, ना झोरा, ना रोटी, ना रूपया आउर ना दुय-दुय ठान कुड़ता। 4जोन कोनी घर ने तुमी ठेबा, हुताय राहा, आउर हुनी थानले बिदा हुआ। 5जोन कोनी तुमके गरहन नी कर दे, हुन नंगर ले निकरते-निकरते आपलो पाँयमन चो धुरला फाफडून दिआस कि हुनमन थाने गोहई होओ।” 6आउर हुनमन निकरून भाती गाँव-गाँव नगतखबर सुनाते, आउर हर जगा लोगमन के चेंगा करते-करते फिरते रवत।
हेरोदेस चो घबरातोर
7देश चो चवथाई चो राजा हेरोदेस ऐ सपाय सुनुन भाती घबरालो, कसनबल्लोने कितलो बल्ला कि यूहन्ना मरलो थानले जीव उठलो से, 8आउर कितलो ऐ कि एलिया दका दिलो से, आउर दुसर लोग ऐ कि जुना अगम गिआनीमन थानले कोनी जीव उठलो से। 9मान्तर हेरोदेस बल्लो, “यूहन्ना चो मय तो मुण्ड काटा ले, अदायं ऐ कोन आय जेचो बारे ने असन गोठमन सुने से?” आउर हुन हुनके दकतोर इच्छा करलो।
पांच हजार लोगमन के खुआतोर
10फेर पठालोबितामन बाहडून भाती जोन काई हुनमन करला, हुनके सांगला; आउर हुन हुनमन के अलग करून बैतसैदा नाव चो नंगर घाई निलो। 11ऐ जानुन भाती भीड़ हुनचो पाट-पाट गेला, आउर हुन हरिक संगे हुनमन ले मिललो, आउर हुनमन ले माहापुरू चो राज चो गोठमन करूक मुरयालो, आउर जोन चेंगा होतोर चाह ते रवत हुनमन के चेंगा करलो। 12जिदलदाय दिन बुडूक मुरयाली तेबे बारहों ऐऊन भाती हुनचो ले बल्ला, “भीड़ के बिदा कर कि भोंवरक चो गाँवमन आउर बस्तीमन ने जाऊन भाती ठेबोत आउर भात चो उपाय करोत, कसनबल्लोने आमी ऐथा चिमचाम जगा ने आंसु।” 13हुन हुनमन ले बल्लो, “तुमी ची हुनमन के खातो काजे दिआस।” हुनमन बल्ला, “आमचो लगे पांच रोटी आउर दुय मछरी के छांडुन आउर काईची निआय; मान्तर हव, अगर आमी जाऊन भाती ऐ सपाय लोगमन काजे भात घेनुदें, तेबे होऊक सके।” हुन लोगमन तो पांच हजार मानेमन चो लगभग रवत। 14तेबे हुन आपलो चेलामन ले बल्लो, “हुनमन के पचास-पचास करून धाड़ी-धाड़ी बसाऊन दिआस।” 15हुनमन असने ची करला, आउर सपाय के बसाला। 16तेबे हुन-हुन पांच रोटी आउर दुय मछरी के धरलो, आउर सरग बाटे दकुन भाती धन्यबाद करलो, आउर छिड़ाऊन-छिड़ाऊन भाती चेलामन के देते गेलो कि लोगमन के बाटोत। 17तेबे सपाय खाऊन भाती संतुष्ट होला, आउर चेलामन बाचलो बिती गोंदामन ले बारा टुकना भरून भाती उठाला।
पतरस चो ईशु के मसीह मानतोर
18जिदलदाय हुन एकला ने पारथना करते रलो आउर चेलामन हुनचो संगे रवत, तेबे हुन हुनमन ले पचारलो, “लोग मोके काय बोलु आत?” 19हुनमन जबाप दिला, “यूहन्ना डूबन देतो बिता, आउर कोनी-कोनी एलिया, आउर कोनी ऐ कि जुना अगम गिआनीमन थानले कोनी जीव उठलो से।” 20हुन हुनमन ले पचारलो, “मान्तर तुमी मोके काय बोलु आस?” पतरस जबाप दिलो, “माहापुरू चो मसीह।” 21तेबे हुन हुनमन के जनाऊन भाती बल्लो कि ऐ कोचीई ले नी बल्ला।
आपलो मरना चो बारे ने ईशु चो अगम गोठ
22फेर हुन बल्लो, “माने चो बेटा काजे जरूरी आय कि हुन खुबे दुख उठाओ, आउर पुरनिमन आउर परधान याजक आउर शास्तरी हुनके नीच समजुन भाती मारून दे ओत, आउर हुन तीसर दिने जीव उठो।”
ईशु चो पाट-पाट हिन्ड़तोर मतलब
23हुन सपाय ले बल्लो, “अगर कोनी मोचो पाट-पाट ऐतोर चाह ले, तेबे आपन खुद ले इन्कार करो आउर रोजे दिना आपलो कुरूस उठाऊन भाती मोचो पाट-पाट ऐओ। 24कसनबल्लोने जोन कोनी आपलो जीव बचाऊक चाहा ये से हुन हुनके नी बचाए, मान्तर जोन कोनी मोचो काजे आपलो जीव के नी बचाए हुनी हुनके बचाए दे। 25अगर माने पुईतनाय जगत के पाये दे आउर आपलो जीव के नी बचाऊक सके नाहले हुनचो हानि उठाये दे, तेबे हुनके काय लाब होये दे? 26जोन कोनी मोचो ले आउर मोचो गोठमन ले लाज होये दे, माने चो बेटा बले, जिदलदाय आपलो आउर आपलो बुआ चो आउर पवितर सरग दूतमन चो महिमा संगे ऐये दे, तेबे हुनचो ले लाज होये दे। 27मय तुमचो ले सत बलें सें, कि जोन ऐथा उबा आसोत, हुनमन थानले कितलो असन आत कि जिदलदाय ले माहापुरू चो राज नी दकोत, हुलदाय ले मरना चो सुआद नी चाक दे।”
मूसा आउर एलिया संगे ईशु
28ऐ गोठमन चो कोनी आंट दिन पाचे हुन पतरस, यूहन्ना आउर याकूब के संगे धरून भाती पारथना करतो काजे डोंगरी थाने गेलो। 29जिदलदाय हुन पारथना करते रलो, तेबे हुनचो थोमना चो रूप बदलली, आउर हुनचो फटीई पंडरा होऊन बरूक मुरयाली। 30आउर दका, मूसा आउर एलिया, ऐ दुनो माने हुनचो संगे गोठयाते रवत। 31ये महिमा संगे दका दिला आउर हुनचो मरतोर गोठ गोठयाते रवत, जोन यरूशलेम ने होतो बिती रली। 32पतरस आउर हुनचो संगवारी निंद ले भरू रला, आउर जिदलदाय अच्छा ढंग ले तिआर होला, तेबे हुनचो महिमा आउर हुन दुनो मानेमन के, जोन हुनचो संगे उबा रवत, दकला। 33जिदलदाय हुनमन हुनचो लगले जाऊक मुरयाला, तेबे पतरस ईशु ले बल्लो, “हे मालिक, आमचो ऐथा रतोर नुकु आय: आउर आमी तीन तम्बू बनाऊ, गोटक तुचो काजे, गोटक मूसा काजे, आउर गोटक एलिया काजे।” हुन जानते नी रलो कि काय बले से। 34हुन ऐ बलते रलो कि गोटक बादरी ऐऊन भाती हुनमन के छांई होली, आउर जिदलदाय हुनमन हुन बादरी ले घिरुक मुरयाला तेबे डरला। 35तेबे हुन बादरी थानले ऐ शब्द निकरली, “ऐ मोचो बेटा आउर मोचो चुनलोर आय, ऐचो सुना।” 36ऐ शब्द होते ची ईशु ऐकला दका दिलो; आउर हुनमन ओगाय रला; आउर जोन काई दकुन रला हुनचो काई गोठ हुन दिनमन ने कोकीई नी बल्ला।
दुष्टआत्मा भीड़लो लेका के उजरातोर
37दुसर दिने जिदलदाय हुनमन डोंगरी थानले उतरला तेबे गोटक बड़े भीड़ हुनचो ले ऐऊन मिलली। 38आउर दका, भीड़ थानले गोटक माने चिचयाऊन भाती बल्लो, “हे गुरू, मय तुचो ले गुहार करें से कि मोचो बेटा उपरे दयाधरम कर; कसनबल्लोने हुन मोचो एकला बेटा आय। 39आउर दक, गोटक दुष्टआत्मा हुनके धरू आय, आउर हुन उधापड़े चिचयाऊन उठु आय; आउर हुन हुनके असन अलटू आय कि हुन मुंह ने फेपल भरते आनु आय; आउर हुनके घोंडराऊन मशकिल ले छांडु आय। 40मय तुचो चेलामन ले गुहार करले कि हुनके निकरावत, मान्तर हुनमन नी निकराऊक सकला।” 41ईशु जबाप दिलो, “हे अन्दबिश्वासी आउर टेनाहा लोगमन, मय केब ले तुमचो संगे रयें दें आउर तुमचो सहें दें? आपलो बेटा के ऐथा धरून आव।” 42हुन ऐते रलो कि दुष्टआत्मा हुनके आपटून भाती अलटलो, मान्तर ईशु अशुद्ध आत्मा के खिजलो आउर लेका के अच्छा करून हुनचो बुआ के सोपुन दिलो। 43तेबे सपाय लोग माहापुरू चो माहासामरत ले भकवा होला। मान्तर जिदलदाय सपाय लोग हुन सपाय काममन ले जोन हुन करते रलो, भक्याऊन रवत, तेबे हुन आपलो चेलामन ले बल्लो, 44“तुमी ऐ गोठमन थाने कान दिआस, कसनबल्लोने माने चो बेटा मानेमन चो हाथ ने धराया जातोर ने आसे।” 45मान्तर हुनमन ऐ गोठ के नी समजते रवत, आउर ऐ हुनमन ले लुकु रली कि हुनमन हुनके जानुक नी सकोत; आउर हुनमन ऐ गोठ चो बारे ने हुनचो ले पचारतो काजे डरते रवत।
सपाय ले बड़े कोन?
46फेर हुनमन थाने ऐ बिवाद होऊक मुरयाली कि आमचो थानले बड़े कोन आय। 47मान्तर ईशु हुनमन चो मन चो बिचार जानलो, आउर गोटक लेका के धरून भाती आपलो लगे उबा करलो, 48आउर हुनमन ले बल्लो, “जोन कोनी मोचो नाव ले ऐ लेका के गरहन करू आय, हुन मोके गरहन करू आय; आउर जोन कोनी मोके गरहन करू आय, हुन मोचो पठालोबिता के गरहन करू आय, कसनबल्लोने जोन तुमीमन ने सपाय ले नानी ले नानी आय, हुनी बड़े आय।”
जोन बिरूद ने निआय, हुन पक्ष ने आसे
49तेबे यूहन्ना बल्लो, “हे मालिक, आमी गोटक माने के तुचो नाव ले दुष्टआत्मामन के निकरातोर दकलु, आउर आमी हुनके मना करलु, कसनबल्लोने हुन आमचो संगे होऊन भाती तुचो पाट-पाट नी होये।” 50ईशु हुनचो ले बल्लो, “हुनके मना नी करा; कसनबल्लोने जोन तुमचो बिरूद ने निआय, हुन तुमचो घाई आसे।”
यरूशलेम चो यातरा
51जिदलदाय हुनचो उपरे उठाया जातोर दिन पुरा होतो थाने रये, तेबे हुन यरूशलेम जातोर बिचार पक्का करलो। 52हुन आपलो पुरे दूत पठालो। हुनमन सामरीमन चो गोटक गाँव ने गेला कि हुनचो काजे जगा तिआर करोत। 53मान्तर हुन लोगमन हुनके उतरूक नी दिला, कसनबल्लोने हुन यरूशलेम जाते रलो। 54ऐ दकुन भाती हुनचो चेलामन याकूब आउर यूहन्ना बल्ला, “हे परबु, काय तुय चाहाय सीस कि आमी हुकुम देऊ, कि बादरी ले आईग घसरुन भाती हुनमन के भसम करून देओ?” 55मान्तर हुन उलटुन भाती हुनमन के खिजलो आउर बल्लो, “तुमी नी जानास कि तुमी कसन आत्मा चो आस। कसनबल्लोने माने चो बेटा लोगमन चो जीवमन चो नाश करूक नाई मान्तर बचातो काजे ईलो से।” 56आउर हुनमन कोनी दुसर गाँव ने जाते गेला।
ईशु चो पाट-पाट हिन्ड़तोर मतलब
57जिदलदाय हुनमन बाट ने जाते रवत, तेबे कोनी हुनचो ले बल्लो, “जाहां-जाहां तुय जासे, मय तुचो पाटे होयें दें।” 58ईशु हुनचो ले बल्लो, “लोकड़लीमन चो भील आउर बादरी चो चड़ीईमन चो डेरामन होऊ आय, मान्तर माने चो बेटा के मुण्ड संगातोर बले जगा निआय।” 59हुन दुसर ले बल्लो, “मोचो पाटे हो।” हुन बल्लो, “हे परबु, मोके पयले जाऊक देस कि आपलो बुआ के तोपुन देयें दें।” 60हुन हुनचो ले बल्लो, “मरलो बितामन के आपलो मोड़ी तोपुक देस, मान्तर तुय जाऊन भाती माहापुरू चो राज चो कथा सुनाव।” 61गोटक दुसर बले बल्लो, “हे परबु, मय तुचो पाटे होयें दें, मान्तर पयले मोके जाऊक देस कि आपलो घर चो लोगमन ले बिदा धरून ऐयें दें।” 62ईशु हुनचो ले बल्लो, “जोन कोनी आपलो हाथ नांगर थाने संगाऊन भाती पाटे दकु आय, हुन माहापुरू चो राज चो लायक नुआय।”
Currently Selected:
लूका 9: HLBNT
Highlight
Share
Copy
Want to have your highlights saved across all your devices? Sign up or sign in
Halbi Bible by The Love Fellowship is licensed under Creative Commons Attribution-ShareAlike 4.0 License.
